ដើមខែថ្មី ដុល្លារឡើងថ្លៃថ្ងៃច័ន្ទនេះ

ទីផ្សារជួញដូរប្រាក់ដុល្លារបានចាប់ផ្តើមយ៉ាងល្អនៅខែតុលានេះ ធៀបទៅនឹងប្រាក់អឺរ៉ូ និងទីផ្សាររូបិយប័ណ្ណនានា ខណៈដែលអ្នកជួញដូរកំពុងផ្តោតអារម្មណ៍លើស្ថានការណ៍នយោបាយនៅអេស្ប៉ាញជុំវិញការបោះឆ្នោតប្រជាមតិដើម្បីគាំទ្រឲ្យមានការផ្តាច់ខ្លួននៅក្នុងរដ្ឋមួយមានឈ្មោះថា Caltalonia។

សន្ទស្សន៍ជួញដូរប្រាក់ដុល្លារធៀបទៅនឹងរូបិយប័ណ្ណនានាបានឡើងថ្លៃ ០,១% ស្ថិតនៅទីតាំងតម្លៃ ៩៣,១៩២។ ធៀបទៅនឹងលុយអឺរ៉ូវិញ ប្រាក់ដុល្លារបានឡើងថ្លៃ ០,១% ត្រូវបានជួញដូរក្នុងតម្លៃ ១.១៧៩៦ ដុល្លារ ខណៈដែលអ្នកជួញដូរកំពុងតាមដានលើព្រឹត្តិការណ៍ក្រោយកាបោះឆ្នោតនៅអេស្ប៉ាញ បន្ទាប់ពីមានការប៉ះទង្គិចគ្នារវាងប៉ូលិស និងក្រុមអ្នកតវ៉ាផ្តាច់ខ្លួននៅក្នុងរដ្ឋ Caltalonia។

ធៀបទៅនឹងលុយយ៉េនវិញ ប្រាក់ដុល្លារបានឡើងថ្លៃ ០,២% ត្រូវបានជួញដូរក្នុងតម្លៃ ១១២,៧១ យ៉េនក្នុងមួយដុល្លារ។ ការឡើងថ្លៃនៃប្រាក់ដុល្លារបានកើតមានឡើងខណៈដែលទីផ្សារជួញដូរនៅលើផ្សារភាគហ៊ុនអាស៊ីមួយចំនួនបានបិទការជួញដូរក្នុងថ្ងៃនេះដូចជា ចិន កូរ៉េខាងត្បូង ហុងកុង ឥណ្ឌា និងអូស្ត្រាលីក្នុងថ្ងៃឈប់សម្រាកប្រចាំឆ្នាំ។

ទិន្នន័យនៅព្រឹកថ្ងៃច័ន្ទនេះបានបង្ហាញថា វិស័យឧស្សាហកម្មរបស់ជប៉ុនបានស្ថិតនៅក្នុងកំណើនដ៏ល្អបំផុតមួយមិនធ្លាប់មាននៅក្នុងត្រីមាសចុងក្រោយនេះ។ លទ្ធផលខាងលើគឺជាក្តីសង្ឃឹមមួយសម្រាប់ធនាគារកណ្តាលរបស់ប្រទេសនេះដើម្បីសម្រេចចិត្តលើគោលនយោបាយហិរញ្ញវត្ថុរបស់ខ្លួនឡើងវិញ ដែលវារួមចំណែកយ៉ាងសំខាន់ពីតម្រូវការនៅលើទីផ្សារអន្តរជាតិ។

ងាកទៅមើលសេដ្ឋកិច្ចអាមេរិកវិញ ការចំណាយរបស់អ្នកប្រើប្រាស់បានកើនឡើងតិចតួចប៉ុណ្ណោះនៅក្នុងខែសីហាកន្លងទៅ ខណៈដែលព្យុះសង្ឃរា Harvey និងព្យុះ Irmaនៅពេលកន្លងមកបានជះឥទ្ធិពលដល់វិស័យឧស្សាហកម្មរបស់ប្រទេសនេះ។ ទាំងនេះបានបណ្តាលអតិផរណាប្រចាំឆ្នាំ មានកំណើនយឺតបំផុតមិនធ្លាប់មាននៅក្នុងរយៈពេលជិតពីរឆ្នាំកន្លងទៅ ដែលអាចបញ្ជាក់ជាមុនថា សេដ្ឋកិច្ចទីក្រុងវ៉ាស៊ីនតោនត្រូវតែធ្វើកំណែទម្រង់បន្ថែមទៀតនៅក្នុងត្រីមាសទី៣នេះ។

ការឡើងថ្លៃនៃប្រាក់ដុល្លារនេះបានកើតមានឡើងបន្ទាប់ពីលោកស្រី Janet Yellen ប្រមុខធនាគារកណ្តាលអាមេរិកបានលើកឡើងពីគម្រោងដំឡើងអត្រាការប្រាក់បើទោះបីជាសេដ្ឋកិច្ចនៅពេលបច្ចុប្បន្នទទួលរងពីផលប៉ះពាល់ពីព្យុះ Irma និង ព្យុះ Harvey ដែលបញ្ចប់ទៅថ្មីៗក៏ដោយ។ បន្ថែមពីនេះ វាក៏ត្រូវអរគុណផងដែរនូវភ្លៀងខៀវពីភាពចម្រូងចម្រាសក្នុង គោលនយោបាយពន្ធដារថ្មីរបស់លោក Trump ដែលកំពុងបោះជំហានទៅមុខសម្រាប់គោលនយោបាយសេដ្ឋកិច្ចជាតិ៕

ប្រភព៖ cnbc