Friday, September 1, 2017

Home Financial News មាសប្រែប្រួលតិចតួច បន្ទាប់ពីស្ទុះឡើងថ្លៃខ្លាំងជាថ្មីកាលពីយប់មិញ

មាសប្រែប្រួលតិចតួច បន្ទាប់ពីស្ទុះឡើងថ្លៃខ្លាំងជាថ្មីកាលពីយប់មិញ

ការជួញដូរមាសនៅថ្ងៃសុក្រចុងសប្តាហ៍នេះត្រូវបានគេមើលឃើញថា មានការប្រែប្រួលតិចតួចបន្ទាប់ពីបានហក់ឡើងថ្លៃដល់តម្លៃខ្ពស់បំផុតដូចទៅនឹងតម្លៃឡើងថ្លៃដើមសប្តាហ៍នេះកាលពីយប់មិញ នៅពេលដែលស្ថានការណ៍ភូមិសាស្ត្រនយោបាយកូរ៉េខាងជើងមានភាពតានតឹងឡើងវិញ។

ការជួញដូរមាសតាមស្បតបានហក់ឡើងដល់តម្លៃ ១ ៣២១,២០ ដុល្លារក្នុងមួយអោន ហើយនេះបានធ្វើឲ្យវាឡើងថ្លៃបាន ២% សម្រាប់ពេញមួយសប្តាហ៍នេះ។ ចំណែកទីផ្សារមាសរបស់អាមេរិកវិញ បានឡើងថ្លៃ ០,៤% ត្រូវបានជួញដូរក្នុងតម្លៃ ១ ៣២៦,៨០ ដុល្លារក្នុងមួយអោន។

មាសឡើងថ្លៃច្រើនកាលពីយប់មិញស្របពេលដែលទិន្នន័យនៃការចំណាយរបស់អតិថិជនអាមេរិកបានបង្ហាញថា វាមានកំណើនទាបជាងការរំពឹងទុកសម្រាប់ខែកក្កដាកន្លងទោនេះ ហើយអតិផរណាប្រចាំឆ្នាំក៏មានកំណើនមួយក្នុងល្បឿនយឺតបំផុតក្នុងរយៈពេលជាងមួយឆ្នាំមកនេះ។ ទិន្នន័យខាងលើធ្វើឲ្យមានការព្យាករណ៍ថា ការដំឡើងអត្រាការប្រាក់របស់ធនាគារកណ្តាលអាមេរិកសម្រាប់ខែធ្នូខាងមុខ អាចនឹងក្លាយជារឿងមិនអាចទៅរួច។

យ៉ាងណាក៏ដោយ អ្វីដែលធ្វើឲ្យ អ្នកជួញដូរអន្ទះសាទៀតនោះគឺ ការរង់ចាំអ៊ុតមើលលទ្ធផលរបាយការណ៍ការងារទាំងមូលរបស់អាមេរិក (US Payrolls) សម្រាប់ខែសីហាដែលនឹងប្រកាសឲ្យដឹងនៅយប់ថ្ងៃសុក្រនេះ។

ងាកទៅមើលស្ថានភាពភូមិសាស្ត្រនយោបាយវិញ យន្តហោះចម្បាំងកូរ៉េខាងត្បូង និងជប៉ុនបានចូលរួមធ្វើសមយុទ្ធរួមគ្នាមួយជាមួយយន្តហោះទម្លាក់គ្រាប់បែក B-1B របស់អាមេរិកនៅពីលើ និងនៅជិតឧបទ្វីបកូរ៉េកាលពីថ្ងៃព្រហស្បតិ៍ម្សិលមិញ។ សមយុទ្ធយោធានេះធ្វើឡើងនៅក្នុងរយៈពេលពីរថ្ងៃប៉ុណ្ណោះ បន្ទាប់ពីកូរ៉េខាងជើងបានបង្កើនភាពតានតឹងឡើងវិញដោយការបាញ់មីស៊ីលរំលងទឹកដីជប៉ុនកាលពីដើមសប្តាហ៍នេះ។

នៅអាមេរិកវិញ ក្រសួងការបរទេសរបស់ខ្លួនបានប្រាប់ទៅរដ្ឋាភិបាលរុស្ស៊ីឱ្យបិទស្ថានកុងស៊ុលរបស់ខ្លួននៅទីក្រុងសាន់ហ្វ្រាន់ស៊ីស្កូទាំងស្រុង និងអគារស្នាក់នៅនានារបស់បុគ្គលិកស្ថានកុងស៊ុលនេះដើម្បីឆ្លើយតបទៅនឹងការដាក់ទណ្ឌកម្មសេដ្ឋកិច្ចជាថ្មីទៀតរបស់ខ្លួនទៅនឹងរដ្ឋាភិបាលទីក្រុងមូស្គូ ជុំវិញជម្លោះនៅតំបន់អ៊ុយក្រែន៕

ប្រភព៖ cnbc