ថ្ងៃនេះដុល្លារបន្តឡើងថ្លៃជាថ្មីទៀត

ការជួញដូរប្រាក់ដុល្លារគិតមកដល់ថ្ងៃអង្គារព្រឹកនេះ ត្រូវបានគេមើលឃើញ ថាបានបន្តឡើងថ្លៃជាថ្មីទៀតធៀបទៅនឹងលុយយ៉េនរបស់ជប៉ុន និង ប្រាក់អឺរ៉ូដោយសារតែការបារម្ភរបស់អ្នកជួញដូរទៅនឹងវិបត្តិតំបន់ឧបទ្វីបកូរ៉េ និង ព្យុះ Irma បានធូរស្រាលជាងមុន។

ប្រាក់ដុល្លារកំពុងជួញដូរក្នុងសញ្ញាណវិជ្ជមាន ក្នុងតម្លៃ ១០៩,៣៤៥ យ៉េនក្នុងមួយដុល្លារបន្ទាប់បីបានហក់ឡើងថ្លៃដល់ទៅ ១,៤% កាលពីយប់មិញ ដែលជាការឡើងថ្លៃប្រចាំថ្ងៃខ្ពស់បំផុតមិនធ្លាប់មានគិតចាប់តាំងពីខែពាក់កណ្តាលខែមករាឆ្នាំ ២០១៧មក។ ការឡើងថ្លៃ នេះបានកើតមានឡើងបន្ទាប់ពីវាបានធ្លាក់ថ្លៃដល់តម្លៃជួញដូរទាបបំផុតមិនធ្លាប់មានក្នុងរយៈពេល១០ខែកន្លងទៅនេះកាលពីថ្ងៃសុក្រសប្តាហ៍មុនក្នុងតម្លៃ ១០៧,៣២០ យ៉េនក្នុងមួយដុល្លារ។

ការធ្លាក់ចុះនៃការភ័យខ្លាចទៅលើព្យុះ Irmaដែលបានបោកបក់ចូលទឹកដីអាមេរិកនៅចុងសប្តាហ៍កន្លងទៅ និងបញ្ហាកូរ៉េខាងជើង គឺជាកត្តាដ៏សំខាន់មួយនៅពីក្រោយនៃការឡើងថ្លៃរបស់ប្រាក់ដុល្លារ។ ការផ្ដោតទៅលើទីផ្សារទំនងជាវិលត្រឡប់ទៅរកស្ថានភាពប្រក្រតីវិញ បើទោះបីជាមិនមានព្រឹត្តិការណ៍ធំៗ កើតមានឡើងនៅសប្តាហ៍នេះក៏ដោយ។ នេះបើយោងតាមការលើកឡើងរបស់យុទ្ធសាស្ត្រជួញដូរជាន់ខ្ពស់នៅក្នុងក្រុមហ៊ុន Barclays មកពីទីក្រុងតូក្យូ។

ងាកទៅមើលការជួញដូរប្រាក់អឺរ៉ូវិញ មានការប្រែប្រួលតិចតួចប៉ុណ្ណោះ ដោយត្រូវបានជួញដូរក្នុងតម្លៃ ១,១៩៦២ ដុល្លារ បន្ទាប់ពីបានធ្លាក់ថ្លៃអស់ ០,៧% កាលពីយប់មិញ។ រូបិយប័ណ្ណមួយនេះបានហក់ឡើងថ្លៃដល់តម្លៃ ១,២០៩២ ដុល្លារកាលពីថ្ងៃសុក្រចុងសប្តាហ៍មុននៅពេលដែលប្រាក់ដុល្លារធ្លាក់ថ្លៃខ្លាំង ដែលនេះគឺជាការឡើងថ្លៃ ដ៏ខ្ពស់បំផុតមិនធ្លាប់មានគិតចាប់តាំងពីខែមករាឆ្នាំ ២០១៥ មក។

ចំណែកលុយហ្រ្វង់ស្វីសរបស់ស្វីសវិញ ដែលជាទូទៅឆ្មក់ឱកាសឡើងថ្លៃនៅ ពេលដែលស្ថានការណ៍នយោបាយអន្តរជាតិឡើងថ្លៃនោះ រាងធ្លាក់ថ្លៃ បន្តិចដែរដោយត្រូវបានជួញដូរក្នុងតម្លៃ ០,៩៥៥៨ ដុល្លារ។ កាលពីថ្ងៃសុក្រកន្លងទៅវាបានហក់ឡើងថ្លៃដល់តម្លៃខ្ពស់បំផុតដែរ ពោលកឺ ០,៩៤២១ ដុល្លារ ដែលមិនធ្លាប់មាននោះឡើយនៅក្នុងរយៈពេល២ឆ្នាំមកនេះ។

សម្រាប់លុយផោនរបស់អង់គ្លេសវិញ ក៏មិនមានការប្រែប្រួលខ្លាំងដែរ បន្ទាប់ពីបានធ្លាក់ថ្លៃអស់ ០,២៥ កាលពីយប់មិញ។ ក៏ប៉ុន្តែធៀបទៅនឹងលុយអឺរ៉ូ វាបានឡើងថ្លៃបន្តិចដោយសារតែមានការរំពឹងទុកថា ធនាគារកណ្តាលរបស់ខ្លួន (Bank of England) អាចនឹងមានការប្រឈមមុខភាពតានតឹងមួយចំនួនលើគោលនយោបាយដំឡើងអត្រាការប្រាក់នៅក្នុងកិច្ចប្រជុំថ្ងៃព្រហស្បតិ៍សប្តាហ៍នេះ ហើយនឹងអាចរកយន្តការថ្មីសម្រាប់ស្រោចស្រង់រូបិយប័ណ្ណរបស់ខ្លួន។

ប្រាក់ដុល្លារអូស្ត្រាលីវិញ ក៏ត្រូវបានជួញដូរក្នុងទិសដៅអវិជ្ជមានដែរ ពោលគឺបានធ្លាក់ថ្លៃអស់ ០,០៥% ត្រូវបានជួញដូរក្នុងតម្លៃ ០,៨០២២ ដុល្លារ ដោយបានបន្តធ្លាក់ថ្លៃពីតម្លៃឡើងថ្លៃខ្ពស់បំផុតមួយ គឺ ០,៨១២៥ ដុល្លារកាលពី ថ្ងៃសុក្រសប្តាហ៍មុន៕

ប្រភព៖ cnbc