Monday, September 4, 2017

Home Financial News លុយយ៉េនកំពុងឆក់ឱកាសឡើងថ្លៃ ខណៈដែលប្រាក់ដុល្លារកំពុងត្រដាបត្រដួសខ្លាំង

លុយយ៉េនកំពុងឆក់ឱកាសឡើងថ្លៃ ខណៈដែលប្រាក់ដុល្លារកំពុងត្រដាបត្រដួសខ្លាំង

ការជួញដូរលុយយ៉េនកំពុងមានសញ្ញាណល្អ ខណៈដែលប្រាក់ដុល្លារកំពុងត្រដាបត្រដួសខ្លាំងនៅពេលចាប់ផ្តើមជួញដូរនៅលើ ទីផ្សារអាស៊ីព្រឹកនេះ ខណៈដែលអ្នកជួញដូរកំពុងជួញដូរយ៉ាងប្រុងប្រយ័ត្ននៅលើទីផ្សារអន្តរជាតិ បន្ទាប់ពីមានការធ្វើតេស្តអាវុធនុយក្លេអ៊ែរជាថ្មីទៀតរបស់កូរ៉េខាងជើងកាលពីថ្ងៃអាទិត្យម្សិលមិញ។

ធៀបទៅនឹងលុយយ៉េនប្រាក់ដុល្លារបន្តធ្លាក់ថ្លៃអស់ ០,៥% ដោយត្រូវបានជួញដូរក្នុងតម្លៃ ១០៩,២២ យ៉េនក្នុងមួយដុល្លារនៅពេលចាប់ផ្តើមជួញដូរព្រឹកនេះ ពោលគឺបានធ្លាក់ថ្លៃអស់ ០,៣% បើធៀបទៅនឹងតម្លៃជួញដូរចុងក្រោយកាលពីថ្ងៃសុក្រសប្តាហ៍មុន។ ធៀបទៅនឹងលុយអឺរ៉ូវិញ លុយយ៉េនបានឡើងថ្លៃ ០,២% ត្រូវបានជួញដូរក្នុងតម្លៃ ១៣០,៥៩ យ៉េនក្នុងមួយអឺរ៉ូ។

ងាកទៅមើលលុយហ្រ្វង់ស្វីសវិញ ក៏ស្ថិតនៅក្នុងដំណាក់កាលជួញដូរមួយល្អដែរនៅពេលដែលស្ថានការណ៍នយោបាយសាកលលោកមិនអំណោយផលដោយត្រូវបានជួញដូរក្នុងតម្លៃឡើងថ្លៃដល់ ០,៩៦០៧ ហ្វ្រង់ស្វីសក្នុងមួយដុល្លារ ប្រកៀកប្រកិតទៅតម្លៃ ជួញដូរកាលពីថ្ងៃសុក្រកន្លងទៅ។

រីឯលុយវ៉ុនរបស់កូរ៉េខាងត្បូងវិញបានធ្លាក់ថ្លៃដល់តម្លៃជួញដូរមួយទាបបំផុតអស់រយៈពេលជិត២សប្តាហ៍ហើយក្រោយភាពតានតឹងនៅក្នុងតំបន់បានកើនឡើងឡើងវិញ ពោលគឺវាត្រូវបានជួញដូរក្នុងតម្លៃ ១ ១៣១,៨៨ យ៉េនក្នុងមួយដុល្លារ។

ជាទូទៅការជួញដូរលុយយ៉េនត្រូវបានគេមើលឃើញថា បានហក់ឡើងថ្លៃនៅពេលដែលស្ថានភាពភូមិសាស្ត្រនយោបាយអន្តរជាតិមានកើនកម្តៅ។ បញ្ហាភាពតានតឹងនៅឧបទ្វីបកូរ៉េ ជារឿយៗបានផ្តល់ឱកាសល្អដល់ការជួញដូរលុយយ៉េននេះ ដែលផ្ទុយពីការជួញដូរប្រាក់ដុល្លារតែងទទួលរងសម្ពាធពីបញ្ហានេះ។

ក្រោយការធ្វើតេស្តអាវុធនុយក្លេអ៊ែរនូវអ្វីដែលកូរ៉េខាងជើងអះអាងថា មានអនុភាពខ្លាំងក្លាជាងពេលណាៗទាំងអស់ លោកប្រធានាធិបតី Donald Trump បានបដិសេធន៍ធ្វើការអន្តរាគមន៍ដោយយោធា និង បានគំរាមកាត់ផ្តាច់ពាណិជ្ជកម្មជាមួយប្រទេសណាក៏ដោយដែលបានធ្វើពាណិជ្ជកម្មជាមួយកូរ៉េខាងជើង។ ក៏ប៉ុន្តែលោកបានសង្កត់ធ្ងន់ថា អាមេរិកនឹងវាយប្រហារភ្លាមៗប្រសិនបើកូរ៉េខាងជើងហ៊ានវាយប្រហារសម្ព័ន្ធមិត្តរបស់ខ្លួន។

ការធ្វើតេស្តអាវុធនុយក្លេអ៊ែរខាងលើពីសំណាក់រដ្ឋាភិបាលទីក្រុងព្យុងយ៉ាងបានធ្វើឡើងបន្ទាប់ពីស្ថានភាពភូមិសាស្ត្រនយោបាយក្នុងតំបន់ទើបតែស្ងប់ស្ងាត់បន្តិចក្រោយប្រទេសនេះបានសាកល្បងបាញ់មីស៊ីលរយៈចម្ងាយមធ្យមមួយហោះរំលងដែនដីជប៉ុនឆ្ពោះទៅកាន់ដែនមហាសមុទ្រប៉ាស៊ីហ្វិកកាលពីសប្តាហ៍មុន។

យ៉ាងណាក៏ដោយ អ្នកជួញដូរកំពុងតែបន្តការជួញដូរយ៉ាងខកចិត្តទៅនឹងទិន្នន័យកំណើនអត្រាការងារធ្វើរបស់អាមេរិកបានកើនឡើងទាបជាងការរំពឹងទុកសម្រាប់ខែសីហាកន្លងទៅ។ យោងតាមទិន្នន័យរបស់រដ្ឋាភិបាលបានបង្ហាញថា មានការងារត្រឹមតែ ១៥៦ ០០០ កន្លែងប៉ុណ្ណោះដែលទាបជាងការព្យាករណ៍ដែលថា វាអាចមានដល់ទៅ ១៨០ ០០០ កន្លែង៕

ប្រភព៖ cnbc