ទីផ្សារប្រេងឆៅប្រែប្រួលដល់ណាហើយ?

នៅថ្ងៃ នេះទីផ្សារប្រេងឆៅបានធ្លាក់ថ្លៃ ក្រោយទីផ្សារប្រេងឆៅរបស់អាមេរិកត្រូវបានជួញដូរឡើងថ្លៃកាលពីម្សិលមិញពេលមានដំណឹងថា ការចម្រាញ់ប្រេងឆៅបានធ្លាក់ចុះ ខណៈដែលទីផ្សារប្រេងឆៅនៅលើទីផ្សារអន្តរជាតិបានធ្លាក់ថ្លៃមកវិញពីតម្លៃឡើងថ្លៃខ្ពស់បំផុតមិនធ្លាប់មាននៅ ក្នុងរយៈពេល២៦ខែកន្លងទៅនេះ។

ការជួញដូរប្រេងឆៅរបស់អាមេរិក (WTI) បានធ្លាក់ថ្លៃអស់ ២សេន ត្រូវបានជួញដូរក្នុងតម្លៃ ៥២,១២ ដុល្លារក្នុងមួយបារ៉ែល។ កាលពីម្សិលមិញ វាបានឡើងថ្លៃ ២៦ សេន ឬ ស្មើនឹង ០,៥% ត្រូវបានជួញដូរក្នុងតម្លៃ ៥២,១៤ ដុល្លារក្នុងមួយបារ៉ែល ប៉ុន្តែនៅតែទាបជាងតម្លៃឡើងថ្លៃខ្ពស់បំផុតមួយមិនធ្លាប់មាននៅក្នុងរយៈពេល៦ខែកន្លងមកនេះ កាលពីពេលថ្មីៗកន្លងទៅ។

ងាកមកមើលទីផ្សារជួញដូរប្រេងឆៅនៅលើទីផ្សារអន្តរជាតិវិញ បានធ្លាក់ថ្លៃអស់ ១៧ សេន ឬស្មើនឹង ០,៣% ត្រូវបានជួញដូរក្នុងតម្លៃ ៥៧,៧៣ ដុល្លារក្នុងមួយបារ៉ែល ពោលគឺបានធ្លាក់ថ្លៃពីតម្លៃជួញដូរឡើងថ្លៃខ្ពស់បំផុតមួយ គឺ ៥៩,៤៩ ដុល្លារក្នុងមួយបារ៉ែលកាលពីថ្ងៃអង្គារកន្លងទៅ។ យ៉ាងណាមិញ កាលពីម្សិលមិញ វាបានធ្លាក់ថ្លៃអស់ជិត ១% វិញ។

ការចម្រាញ់ប្រេងឆៅរបស់អាមេរិកបានធ្លាក់ចុះអស់ ១,៨លានបារ៉ែលកាលពីសប្តាហ៍មុន នេះបើយោងតាមការឲ្យដឹងចេញពីមន្ទីរថាមពលអាមេរិកកាលពីថ្ងៃពុធម្សិលមិញ។ ចំនួននេះនៅទាបជាងការរំពឹងទុករបស់អ្នកវិភាគដែលថា វាអាចធ្លាក់ចុះអស់ ៣,៤ លានបារ៉ែល។

ទីផ្សារប្រេងឆៅបានហក់ឡើងនៅពេលដែលគ្រោះមហន្តរាយខ្យល់ព្យុះកាលពីពេលថ្មីៗកន្លងទៅបានធ្វើឲ្យប៉ះពាល់ដល់សកម្មភាពផលិតប្រេងរបស់ក្រុមហ៊ុនប្រេងអាមេរិកមួយចំនួន។ ប៉ុន្តែនៅសប្តាហ៍មុន ក្រុមហ៊ុនទាំងនោះបានត្រឡប់មកដំណើរការសកម្មភាពរបស់ខ្លួនជាប្រក្រតីឡើងវិញហើយការផលិតប្រេងបានហក់ឡើងដល់ ៩,៥៥ លានបារ៉ែលក្នុងមួយថ្ងៃ ពោលគឺច្រើនជាងចំនួនប្រេងឆៅដែលផលិតនៅមុនពេលព្យុះមកដល់ទៅទៀត៕

ប្រភព៖ cnbc