Friday, September 15, 2017

Home Financial News មាសឡើងថ្លៃវិញ ខណៈដែលប្រាក់ដុល្លារកំពុងរងសម្ពាធពីការបាញ់មីស៊ីលជាថ្មីរបស់កូរ៉េខាងជើង

មាសឡើងថ្លៃវិញ ខណៈដែលប្រាក់ដុល្លារកំពុងរងសម្ពាធពីការបាញ់មីស៊ីលជាថ្មីរបស់កូរ៉េខាងជើង

ទីផ្សារជួញដូរមាសនៅព្រឹកថ្ងៃសុក្រនេះបានឡើងថ្លៃវិញ ងាកចេញពីតម្លៃជួញដូរទាបបំផុតមិនធ្លាប់មាននៅ ក្នុងរយៈពេល២សប្តាហ៍កន្លងទៅនេះ បន្ទាប់ពីកូរ៉េខាងជើងបានសាកល្បងបាញ់មីស៊ីលជាថ្មីទៀត ហោះរំលងទឹកដីជប៉ុនទៅធ្លាក់ចូលក្នុងដែនសមុទ្រប៉ាស៊ីហ្វិក។

ទីផ្សារជួញដូរមាសតាមស្បត (Spot Gold) បានឡើងថ្លៃ ០,៣% ត្រូវបានជួញដូរក្នុងតម្លៃ ១ ៣៣៣,០៦ ដុល្លារក្នុងមួយអោន នៅម៉ោង ៨:០០ ព្រឹកកន្លងទៅ។ តម្លៃនេះខ្ពស់ជាងតម្លៃជួញដូរធ្លាក់ថ្លៃដល់តម្លៃ ១ ៣១៥,៧១ ដុល្លារក្នុងមួយអោនកាលពីថ្ងៃម្សិលមិញដែលជាការធ្លាក់ថ្លៃមកដល់តម្លៃទាបបំផុតមិនធ្លាប់មានគិតចាប់តាំងពីថ្ងៃទី ៣១ ខែសីហាមក។

ចំណែក ទីផ្សារមាសរបស់អាមេរិកវិញ បានឡើងថ្លៃ ០,៦% ត្រូវបានជួញដូរក្នុងតម្លៃ ១ ៣៣៧,៤០ ដុល្លារក្នុងមួយអោន។ ការឡើងថ្លៃនៃតម្លៃមាសបានកើតមានឡើងស្របពេលដែលទីផ្សារប្រាក់ដុល្លារកំពុងធ្លាក់ចុះ និង ការឡើងថ្លៃរបស់លុយយ៉េនរបស់ជប៉ុន និង លុយហ្រ្វង់ស្វីសរបស់ស្វីស ជុំវិញការសាកល្បងជាថ្មីនៃការបាញ់មីស៊ីលរបស់ទីក្រុងព្យុងយ៉ាង។

បើយោងតាមមន្រ្តីជាន់ខ្ពស់របស់ជប៉ុន និងកូរ៉េខាងត្បូងបានឲ្យដឹងថា នៅព្រឹកថ្ងៃសុក្រនេះ មីស៊ីលមួយគ្រាប់របស់កូរ៉េខាងជើងបានហោះរំលងទឹកដីជប៉ុននៅភាគខាងជើងដែនកោះ Hokkaido ហើយបានបន្តទៅធ្លាក់នៅដែនសមុទ្រប៉ាស៊ីហ្វិក។ ការបាញ់មីស៊ីលជាថ្មីនេះបានធ្វើឡើងត្រឹមតែប៉ុន្មានសប្តាហ៍ប៉ុណ្ណោះ បន្ទាប់ពីរដ្ឋាភិបាលដ៏ឯកោមួយនេះបានធ្វើតេស្តសាកល្បងអាវុធនុយក្លេអ៊ែរម្តងរួចមកហើយកាលពីពេលថ្មីៗកន្លងទៅ។

ងាកទៅមើលថ្លៃទំនិញប្រើប្រាស់របស់អាមេរិកវិញបានបង្ហាញថា វាមានកំណើននៅក្នុងខែសីហានេះ ដោយមានការជ្រោមជ្រែងយ៉ាងសំខាន់ពីការឡើងថ្លៃនៃទីផ្សារប្រេងឆៅ និង លំនៅឋាន។ លទ្ធផលនេះជាសញ្ញាណមួយនៃការកើនឡើងនៃកំណើនអតិផរណា ដែលនាំឲ្យមានការព្យាករណ៍ទុកជាមុនថា ធនាគារកណ្តាលអាចកែប្រែចិត្តដំឡើងអត្រាការប្រាក់ជាថ្មីម្តងទៀតនៅចុងឆ្នាំនេះ។

ជុំវិញស្ថានភាពដ៏តឹងតែងនៅក្នុងឧបទ្វីបកូរ៉េនៅពេលកន្លងមក លោកប្រធានាធិបតីអាមេរិក Donald Trump នឹងពាំនាំសារដ៏សំខាន់របស់លោកក្នុងនាមជាមហាអំណាចពិភពលោកទៅកាន់អង្គការសហប្រជាជាតិនៅសប្តាហ៍ក្រោយនេះ និងស្វែងរកការគាំទ្រចំពោះវិធានការដ៏តានតឹងប្រឆាំងទៅនឹងកូរ៉េខាងជើងបើទោះបីជាលោកមានការសង្ស័យទៅលើបណ្តាប្រទេសមួយចំនួននៅក្នុងចំណោមរដ្ឋជាសមាជិកទាំង ១៩៣ របស់ UN ក៏ដោយ។

ត្រឡប់ទៅមើលប្រទេសអង់គ្លេសវិញ ធនាគារកណ្តាលរបស់ខ្លួនបាននិយាយថា ការដំឡើងអត្រាការប្រាក់ទំនងជាត្រូវបានធ្វើឡើងនៅក្នុងរយៈពេលប៉ុន្មានខែខាងមុខ ប្រសិនបើសុខភាពសេដ្ឋកិច្ច និង តម្លៃទំនិញប្រើប្រាស់នៅលើទីផ្សារបន្តមានកំណើនទៅមុខទៀត។ ប្រសិនបើស្ថាប័ននេះអាចដំឡើងអត្រាការប្រាក់មែននោះ នេះចាត់ទុកថា ជាលើកដំបូងហើយដែលខ្លួនសម្រេចដំឡើងអត្រាការប្រាក់បន្ទាប់ពីខ្លួនបានខកខានអស់រយៈពេលមួយទសវត្សកន្លងទៅនេះ។

ធនាគារកណ្តាលអឺរ៉ុបវិញក៏បានបញ្ជាក់ផងដែរកាលពីថ្ងៃព្រហស្បតិ៍ម្សិលមិញថា សកម្មភាពកាត់បន្ថយទិញចូលមូលបត្របំណុលរបស់ខ្លួននឹងអាចចាប់ផ្តើមក្នុងពេលឆាប់ៗខាងមុខ។ ការលើកឡើងនេះបានកើតមានឡើងស្របពេលដែលស្ថានភាពសេដ្ឋកិច្ចនៅក្នុងតំបន់ចាយបា្រក់អឺរ៉ូមានលក្ខណៈល្អប្រសើរឡើងវិញ គួបផ្សំទៅនឹងកំណើនអតិផរណាស្ទុះឡើងនៅក្នុងរយៈពេល១ឆ្នាំចុងក្រោយនេះ។

រីឯស្ថានភាពសេដ្ឋកិច្ចរបស់មហាយក្សចិនឯណេះវិញ ទិន្នន័យសេដ្ឋកិច្ចរបស់ខ្លួនបានបង្ហាញនូវការខកចិត្តមួយដល់អ្នកវិនិយោគ។ ការខកចិត្តដោយសារតែវិស័យវិនិយោគទុនរបស់ខ្លួនបានកើនឡើងក្នុងអត្រាមួយដ៏យឺតបំផុតមិនធ្លាប់មាននៅក្នុងរយៈពេលជិត ១៨ឆ្នាំកន្លងមកនេះ ដែលនាំឲ្យមានការព្យាករណ៍ទុកជាមុនថា សុខភាពសេដ្ឋកិច្ចរបស់មហាអំណាចទី២ក្នុងលោកមួយនេះនឹងបាត់បង់កំណើន ខណៈដែលកំណើនប្រាក់កម្ចីមានការកើនឡើងកាន់តែខ្ពស់៕

ប្រភព៖ cnbc