ថ្ងៃចុងក្រោយសប្តាហ៍នេះ ដុល្លារឡើងថ្លៃខ្ពស់ជាថ្មីម្តងទៀត

ទីផ្សារជួញដូរប្រាក់ដុល្លារនៅតែបន្តឡើងថ្លៃជាថ្មីទៀតនៅថ្ងៃ សុក្រចុងសប្តាហ៍នេះធៀបទៅនឹងរូបិយប័ណ្ណនានា ខណៈដែលអ្នកជួញដូរកំពុងផ្តោតទៅលើកម្មវិធីកំណែទម្រង់ពន្ធដាររបស់លោក Trump និង តាមដានគោលនយោបាយរបស់ធនាគារកណ្តាលអាមេរិក។

សន្ទស្សន៍ជួញដូរប្រាក់ដុល្លារធៀបទៅនឹងរូបិយប័ណ្ណចំនួន ៦ផ្សេងទៀត បានឡើងថ្លៃ ០,១% កំពុងស្ថិតនៅទីតាំងតម្លៃ ៩៣,១៥៥ ខ្ពស់ជាងតម្លៃជួញដូរកាលពីដើមសប្តាហ៍នេះ។ យ៉ាងណាមិញ កាលពីថ្ងៃម្សិលមិញ វាបានស្ថិតនៅក្នុងតម្លៃ ៩៣,៦៦៦ ដែលជាទីតាំងតម្លៃខ្ពស់បំផុតមិនធ្លាប់មានគិតចាប់តាំងពី ថ្ងៃទី ១៨ សីហាមក។ ជាសរុបនៅក្នុងសប្តាហ៍នេះ វាបានឡើងថ្លៃ ១,១% ដែលជាកំណើនឡើងថ្លៃខ្ពស់បំផុតប្រចាំសប្តាហ៍ មិនធ្លាប់មានគិតចាប់តាំងពីខែធ្នូ ឆ្នាំ ២០១៦មក។

ការឡើងថ្លៃប្រាក់ដុល្លារនៅសប្តាហ៍នេះ គឺត្រូវអរគុណទៅដល់ក្តីសង្ឃឹមលើកម្មវិធីកំណែទម្រង់ពន្ធដាររបស់អាមេរិកដែលបានដាក់ពិភាក្សានៅសភាជាតិ រួមទាំងការផ្តល់ពន្លឺភ្លើងខៀវខ្លះៗរបស់ធនាគារកណ្តាលអាមេរិកដែលមានចេតនាចង់ដំឡើងអត្រាការប្រាក់នៅចុងឆ្នាំ នេះ។ កាលពីថ្ងៃពុធកន្លងទៅនេះ លោក Donald Trump បានស្នើសុំទៅកាន់សភាជាតិដើម្បីអនុម័តគាំទ្រឱ្យមានការកាត់បន្ថយពន្ធដារលើប្រាក់ចំណូលពលរដ្ឋអាមេរិកភាគច្រើន ខណៈមានការរិះគន់ខ្លាំងដែរពីសាធារណជនមួយចំនួន។

ធៀបទៅនឹងលុយយ៉េនរបស់ជប៉ុន ប្រាក់ដុល្លារបានឡើងថ្លៃ ០,២% ត្រូវបានជួញដូរក្នុងតម្លៃ ១១២,៥៧ យ៉េនក្នុងមួយដុល្លារ។ កាលពីម្សិលមិញ ប្រាក់ដុល្លារបានហក់ឡើងថ្លៃដល់តម្លៃ ១១៣,២៦ យ៉េនក្នុងមួយដុល្លារដែលជាតម្លៃឡើងថ្លៃខ្ពស់បំផុតមិនធ្លាប់មាននៅក្នុងរយៈពេល ២ខែ កន្លងទៅ។

ងាកមកមើលការជួញដូរប្រាក់អឺរ៉ូវិញ ហាក់បានឡើងថ្លៃបន្តិចវិញ ពោលគឺត្រូវបានជួញដូរក្នុងតម្លៃ ១,១៧៨៦ ដុល្លារ ក្រោយត្រូវបានជួញដូរក្នុងតម្លៃ ១,១៧១៧ ដុល្លារកាលពីថ្ងៃពុធដែលជាតម្លៃទាបបំផុតមួយមិនធ្លាប់មានអស់រយៈពេលជាង១ខែកន្លងទៅ។ ទោះបីជាបែបនេះក្តី ចាប់តាំងពីដើមឆ្នាំមក វាបានឡើងថ្លៃដល់ទៅ ១២% ខណៈដែលស្ថានភាពនយោបាយនៅតំបន់អឺរ៉ុបបច្ចុប្បន្ន កំពុងមានឥទ្ធិពលខ្លាំងក្លាសម្រាប់ថ្លឹងថ្លែងដល់ទីផ្សាររូបិយប័ណ្ណមួយនេះនៅឡើយ។

យ៉ាងណាក៏ដោយ ការជួញដូរប្រាក់ដុល្លារក៏ត្រូវពឹងផ្អែកផងដែរទៅលើលើទិន្នន័យសេដ្ឋកិច្ចអាមេរិករួមមានទិន្នន័យស្តីពីសន្ទស្សន៍ថ្លៃទំនិញប្រើប្រាស់ (PCE) សម្រាប់ខែសីហាកន្លងទៅដែលនឹងចេញផ្សាយនៅយប់នេះ៕

ប្រភព៖ cnbc