ថ្ងៃនេះ មាសនៅតែងើបមុខមិនរួច បន្តធ្លាក់ថ្លៃជាថ្មីទៀត

ខណៈដែលការជួញដូរប្រាក់ដុល្លារកំពុងឡើងថ្លៃវិញ ការជួញដូរមាសឯណេះវិញ កំពុងបន្តធ្លាក់ថ្លៃទៀតមកកាន់តម្លៃទាបបំផុតមួយមិនធ្លាប់មាននៅ ក្នុងរយៈពេល២សប្តាហ៍កន្លងទៅនេះ ស្របពេលដែលអ្នកជួញដូរកំពុងផ្តោតទៅលើរបាយការណ៍ចេញផ្សាយនៃអត្រាអតិផរណារបស់អាមេរិកដែលនឹងចេញផ្សាយនៅយប់នេះ។

ការជួញដូរមាសតាមស្បត (Spot Gold) បានធ្លាក់ចុះអស់ ០,២% ទៀតត្រូវបានជួញដូរក្នុងតម្លៃ ១ ៣២០,២១ ដុល្លារក្នុងមួយអោននៅម៉ោង ៩ ព្រឹកនេះ បន្ទាប់ពីបានធ្លាក់ថ្លៃដល់តម្លៃ ១ ៣១៨,៩៦ ដុល្លារម្តងរួចមកហើយកាលម្សិលមិញ ដែលមិនធ្លាប់មាននោះឡើយគិតចាប់តាំងពីថ្ងៃទី ១ កញ្ញាមក។ ចំណែកទីផ្សារមាសរបស់អាមេរិកវិញ បានធ្លាក់ថ្លៃអស់ ០,៣% ត្រូវបានជួញដូរក្នុងតម្លៃ ១ ៣២៤,៥០ ដុល្លារក្នុងមួយអោន។

ការធ្លាក់ថ្លៃតម្លៃមាសនៅសប្តាហ៍នេះ គឺដោយសារតែទីផ្សារប្រាក់ដុល្លារចាប់ផ្តើមស្ទុះងើបឡើងវិញដោយសារមានការជួយជ្រោមជ្រែងពីស្ថានភាពល្អប្រសើរឡើងវិញនៃស្ថានភាពនយោបាយអន្តរជាតិ និង សេដ្ឋកិច្ចអាមេរិក។ កាលពីសប្តាហ៍មុន មាសបានឡើងថ្លៃខ្លាំងបណ្តាលមកពីអ្នកជួញដូរមានការបារម្ភទៅនឹងគ្រោះមហន្តរាយពីព្យុះ Irma និង វិបត្តិនយោបាយនៅក្នុងតំបន់ឧបទ្វីបកូរ៉េដែលធ្វើឲ្យប្រាក់ដុល្លារទទួលរងសម្ពាធខ្លាំង។

នៅថ្ងៃនេះអ្នកជួញដូរទីផ្សារអន្តរជាតិកំពុងទន្ទឹងរង់ចាំរបាយការណ៍ទិន្នន័យអតិផរណារបស់អាមេរិកដែលនឹងចេញផ្សាយជាសាធារណៈនៅយប់នេះ។ ទិន្នន័យខាងលើនេះ មានសារសំខាន់សម្រាប់ជាមូលដ្ឋានឲ្យអ្នកជួញដូរមើលឃើញពីលទ្ធភាពមួយសម្រាប់ធនាគារកណ្តាលរបស់ខ្លួនអាចដំឡើងអត្រាការប្រាក់ជាថ្មីនៅក្នុងឆ្នាំខាងមុខ។

នៅយប់នេះផងដែរ អ្នកជួញដូរក៏ផ្ដោតយកចិត្តទុកដាក់ផងដែរលើកិច្ចប្រជុំរបស់ធនាគារកណ្តាលអង់គ្លេស និង ធនាគារកណ្តាលរបស់ស្វីសស្តីពីគោលនយោបាយរូបិយវត្ថុរបស់ខ្លួន។

កាលពីថ្ងៃពុធម្សិលមិញ កូរ៉េខាងជើងបានបង្ហាញការជំទាស់ទៅនឹងការដាក់ទណ្ឌកម្មសេដ្ឋកិច្ចពីអង្គការសហប្រជាជាតិបន្ថែមទៀត បន្ទាប់ពីមានការធ្វើតេស្តសាកល្បងអាវុធនុយក្លេអ៊ែរជាលើកទី៦របស់ខ្លួនកាលពីប៉ុន្មានសប្តាហ៍មុន។ ចំណាត់ការរបស់អង្គការសហប្រជាជាតិនេះ នឹងដាក់សម្ពាធឲ្យរដ្ឋាភិបាលទីក្រុងព្យុងយ៉ាង ត្រូវប្ដេជ្ញាចិត្តបន្តខិតខំប្រឹងប្រែងទ្វេដងសម្រាប់សេដ្ឋកិច្ចរបស់ខ្លួនដើម្បីប្រឆាំងទៅនឹងអ្វីដែលខ្លួនពណ៌នាថា ជាការគំរាមកំហែងនៃការឈ្លានពានរបស់អាមេរិក។

កាលពីថ្ងៃពុធម្សិលមិញនេះផងដែរ លោកប្រធានាធិបតីអាមេរិក Donald Trump បានរារាំងក្រុមហ៊ុនវិនិយោគឯកជនចិនមួយក្នុងការទិញយកបន្ទះឈីបរបស់ក្រុមហ៊ុនមួយមានមូលដ្ឋាននៅសហរដ្ឋអាមេរិក។ ការសម្រេចចិត្តរបស់លោក Trump នេះគឺជាសញ្ញាមួយយ៉ាងច្បាស់ទៅកាន់រដ្ឋាភិបាលទីក្រុងប៉េកាំងថា ក្រុងវ៉ាស៊ីនតោននឹងប្រឆាំងរាល់កិច្ចព្រមព្រៀងទិញលក់ទាំងឡាយណាដែលមានការពាក់ព័ន្ធនឹងបច្ចេកវិទ្យាយោធា៕

ប្រភព៖ cnbc