ផ្សារភាគហ៊ុនអាស៊ីឡើងថ្លៃ តាមពីក្រោយផ្សារភាគហ៊ុនអាមេរិក

ការជួញដូរនៅលើផ្សារភាគហ៊ុនអាស៊ីត្រូវបានជួញដូរឡើងថ្លៃ នៅព្រឹកនេះ បន្ទាប់ពីផ្សារភាគហ៊ុនអាមេរិកបានបិទបញ្ចប់ការជួញដូរក្នុងសញ្ញាណវិជ្ជមានក្នុងកំណត់ត្រាមិនធ្លាប់មានផងដែរកាលពីយប់មិញ នៅពេលមានការលើកឡើងនៃការកំណែទម្រង់ពន្ធដារថ្មី និង ការធ្លាក់ចុះនូវភាពភ័យខ្លាចរបស់អ្នកជួញដូរនានា។

សន្ទស្សន៍ជួញដូរនៅលើផ្សារភាគហ៊ុនជប៉ុន Nikkei 225 បានឡើងថ្លៃ ០,៣៩% ស្របពេលដែលលុយយ៉េនរបស់ខ្លួនបានធ្លាក់ថ្លៃបន្តិចវិញ។ ការឡើងថ្លៃ នេះគឺដោយសារតែមានការគាំទ្រចេញពីភាគហ៊ុនរបស់ក្រុមហ៊ុននាំចេញធំៗរបស់ខ្លួនដែលត្រូវបានជួញដូរឡើងថ្លៃកាលពីម្សិលមិញ ខណៈដែលសន្ទស្សន៍ជួញដូរនៅលើផ្សារភាគហ៊ុនកូរ៉េខាងត្បូង បានប៉ះប៉ូវការជួញដូរធ្លាក់ថ្លៃនៅពេលចាប់ផ្តើមជួញដូរ ហើយបានឡើងថ្លៃវិញក្នុងចំនួន ០,០៨% ព្រឹកនេះ។

ងាកទៅមើលសន្ទស្សន៍ជួញដូរផ្សារភាគហ៊ុនអូស្ត្រាលី S&P/ASX 200 បានឡើងថ្លៃដែរក្នុងចំនួន ០,៤៥% ដោយក្នុងនោះវាបានរួមចំណែកយ៉ាងសំខាន់ពីភាគហ៊ុនរបស់ក្រុមហ៊ុនធំៗនានា។ ក្រុមហ៊ុនធនាគារត្រូវបានគេមើលឃើញថា បានហក់ឡើងថ្លៃខ្ពស់ជាងគេចាប់ពី ១% ឡើងទៅ។

យ៉ាងណាមិញនៅលើទឹកដីចិនវិញ ស្ថានភាពជួញដូរផ្សារភាគហ៊ុនរបស់ខ្លួនហាក់មិនសូវកាក់កបនោះទេនៅថ្ងៃនេះ។ សន្ទស្សន៍ជួញដូរផ្សារភាគហ៊ុនហុងកុង Hang Seng បានធ្លាក់ថ្លៃអស់០,៦% ក្នុងថ្ងៃទី៣ ខណៈដែលសន្ទស្សន៍ជួញដូរផ្សារភាគហ៊ុនសៀងហៃបានធ្លាក់ថ្លៃអស់ ០,១៤%។ រីឯសន្ទស្សន៍ជួញដូរផ្សារភាគហ៊ុន Shenzhen វិញ ធ្លាក់ថ្លៃតិចតួចប៉ុណ្ណោះត្រឹមចំនួន ០,០៣៥%។

លោក Steven Mnuchin រដ្ឋលេខាធិការរតនាគារអាមេរិកបានលើកឡើងកាលពីថ្ងៃអង្គារម្សិលមិញថា កំណែទម្រង់ពន្ធគួរតែត្រូវបានអនុវត្តចាប់តាំងពីថ្ងៃទី ១ ខែ មករាឆ្នាំ ២០១៧កន្លងទៅម្ល៉េះព្រោះវាមានប្រយោជន៍ធំធេងសម្រាប់ជំរុញកំណើនសេដ្ឋកិច្ជជាតិ។ លោកបានថ្លែងទៅកាន់ស្ថានីយទូរទស្សន៍ CNBC បន្តទៀតថា រដ្ឋបាលរបស់លោក Trump គឺផ្តោតជាសំខាន់លើការធានាឲ្យមានកម្មវិធីកំណែទម្រង់ពន្ធដារដែលនឹងត្រូវបញ្ចប់នៅក្នុងឆ្នាំនេះ។

សេចក្តីថ្លែងការណ៍របស់លោក Mnuchin នេះហើយដែលបាន គាំទ្រឲ្យមានកំណើនអត្រាការប្រាក់លើមូលបត្របំណុលរបស់អាមេរិកដូចការចេញផ្សាយជាសាធារណៈលើទិន្នន័យនេះ។ នេះក៏បានជំរុញផងដែរឲ្យទីផ្សារប្រាក់ដុល្លារចាប់ផ្តើមស្ទុះឡើងថ្លៃវិញធៀបទៅនឹងរូបិយប័ណ្ណសំខាន់ៗនានាដែលត្រូវបានជួញដូរនៅលើ ទីផ្សារអន្តរជាតិកាលពីយប់មិញ និង នៅថ្ងៃនេះ។

ក្រៅពីនេះ ការជួញដូរនៅលើផ្សារភាគហ៊ុនអាមេរិកក៏បានស្ទុះឡើងថ្លៃក្នុងកំណត់ត្រាផងដែរ ដោយក្នុងនោះ ផ្សារភាគហ៊ុន Dow Jones បានឡើងថ្លៃ ០,២៨ ចំណុច បិទការជួញដូរក្នុងតម្លៃខ្ពស់បំផុតមិនធ្លាប់មានពោលគឺ ២២ ១១៨,៨៦។

កាលពីថ្ងៃច័ន្ទកន្លងទៅនេះ ក្រុមប្រឹក្សាសន្តិសុខអង្គការសហប្រជាជាតិបានអនុម័តដាក់ទណ្ឌកម្មសេដ្ឋកិច្ចជាថ្មីម្តងទៀត ទៅលើកូរ៉េខាងជើងជុំវិញកម្មវិធីនុយក្លេអ៊ែររបស់ខ្លួន។ ក៏ប៉ុន្តែយោងតាមសារព័ត៌មានចេញផ្សាយរបស់ខ្លួនកាលពីថ្ងៃម្សិលមិញបានឲ្យដឹងថា រដ្ឋាភិបាលទីក្រុងព្យុងយ៉ាងបានទាត់ចោលការដាក់ទណ្ឌកម្មនេះ ហើយថា អាមេរិកនឹងទទួលលទ្ធផលដ៏ឈឺចាប់បំផុតនៅពេលខាងមុខ។

ភាពល្អប្រសើរឡើងវិញនៅលើទីផ្សារភាគហ៊ុន និងទីផ្សារប្រាក់ដុល្លារនេះគឺមានការគាំទ្រផងដែរពីការធ្លាក់ចុះនៃការព្រួយបារម្ភទៅនឹងវិបត្តិនយោបាយក្នុងតំបន់ឧបទ្វីបកូរ៉េ និងគ្រោះមហន្តរាយខ្យល់ព្យុះ Irma ដែលបានបោកបក់ចូលទឹកដីអាមេរិកកាលពីចុងសប្តាហ៍កន្លងទៅ៕

ប្រភព៖ cnbc