មាសស្ងប់ស្ងាត់បន្តិច ក្រោយធ្លាក់ថ្លៃច្រើនថ្ងៃម្សិលមិញ

ការជួញដូរមាសនៅថ្ងៃពុធនេះ មិនមានការប្រែប្រួលខ្លាំងនោះទេក្រោយធ្លាក់ថ្លៃច្រើនកាលពីថ្ងៃម្សិលមិញខណៈដែលទីផ្សារប្រាក់ដុល្លារបានឡើងថ្លៃវិញ បន្ទាប់ពីមានសេចក្តីថ្លែងការណ៍ចុងក្រោយធ្វើឡើងដោយលោកប្រធានាធិបតី Donald Trump ជុំវិញវិបត្តិនៅឧបទ្វីបកូរ៉េ។

តម្លៃជួញដូរមាសតាមស្បត កំពុងត្រូវបានជួញដូរក្នុងតម្លៃថេរ ពោលគឺជុំវិញតម្លៃ ១ ៣៣០ ដុល្លារក្នុងមួយអោន។ ចំណែកទីផ្សារមាសរបស់អាមេរិកវិញ ក៏មិនមានការប្រែប្រួលដែរដោយត្រូវបានជួញដូរក្នុងតម្លៃ ១ ៣៣៥ ដុល្លារក្នុងមួយអោន។ ការធ្លាក់ថ្លៃមកវិញនៃតម្លៃមាស បានកើតមានឡើងស្របពេលដែលទីផ្សារប្រាក់ដុល្លារកំពុងស្តាមុខមាត់ឡើងថ្លៃវិញបន្ទាប់ពីវាបានធ្លាក់ថ្លៃខ្លាំងកាលពីសប្តាហ៍មុន។

កាលពីថ្ងៃអង្គារម្សិលមិញ លោកប្រធានាធិបតីអាមេរិក Donald Trump បានថ្លែងបញ្ជាក់ជាថ្មីថា ការដាក់ទណ្ឌកម្មរបស់អង្គការសហប្រជាជាតិទៅលើកូរ៉េខាងជើងដែលបានព្រមព្រៀងនៅសប្តាហ៍នេះ គឺជាជំហានដ៏តូចមួយប៉ុណ្ណោះ ។ លោកបានបន្ថែមថា ទណ្ឌកម្មនេះវាមិនធ្ងន់ធ្ងរនោះឡើយបើប្រៀបធៀបទៅនឹងអ្វីដែលរដ្ឋាភិបាលទីក្រុងព្យុងយ៉ាងបានធ្វើកន្លងមកទាក់ទងទៅនឹងការសាកល្បងអាវុធនុយក្លេអ៊ែររបស់ខ្លួន។

ជាមួយគ្នានេះ លោក Steven Mnuchin រដ្ឋលេខាធិការក្រសួងរតនាគារអាមេរិកបានថ្លែងផងដែរកាលពីថ្ងៃអង្គារម្សិលមិញថា ប្រសិនបើចិនមិនគោរពតាមការដាក់ទណ្ឌកម្មរបស់អង្គការសហប្រជាជាតិដែលបានអនុម័តលើប្រទេសកូរ៉េខាងជើងទេនោះ លោកនឹងស្វែងរកការគាំទ្រឲ្យមានការដាក់ទណ្ឌកម្មផ្នែកហិរញ្ញវត្ថុជាថ្មីមួយទៀតទៅលើរដ្ឋាភិបាលទីក្រុងប៉េកាំង ដើម្បីកាត់ផ្តាច់ចេញពីប្រព័ន្ធហិរញ្ញវត្ថុរបស់អាមេរិក។

ងាកទៅមើលស្ថានភាពសេដ្ឋកិច្ចអាមេរិកវិញ យោងតាមទិន្នន័យរបស់រដ្ឋាភិបាលសហព័ន្ធដែលបានចេញផ្សាយកាលពីថ្ងៃអង្គារម្សិលមិញបានបង្ហាញថា អត្រាភាពក្រីក្ររបស់ខ្លួនបានធ្លាក់ចុះជាប់ៗគ្នានៅក្នុងឆ្នាំ ២ឆ្នាំ គិតត្រឹមឆ្នាំ ២០១៥មក។ របាយការណ៍នេះបានបង្ហាញថា ប្រាក់ចំណូលមធ្យមរបស់ពលរដ្ឋខ្លួនបានកើនឡើងរហូតដល់ ៥៩ ០០០ ដុល្លារក្នុងមួយឆ្នាំ ខណៈដែលសេដ្ឋកិច្ចកំពុងបោះជំហានក្នុងទិសដៅវិជ្ជមានបន្ទាប់ពីបាក់ស្រុតខ្លាំងនៅអំឡុងពេលហែលឆ្លងកាត់វិបត្តិហិរញ្ញវត្ថុសាកលលោកឆ្នាំ ២០០៧-២០០៩។

ត្រឡប់ទៅមើលទិន្នន័យសេដ្ឋកិច្ចរបស់អង់គ្លេសកាលពីយប់មិញបានបង្ហាញថា កំណើនអតិផរណារបស់ខ្លួនបានកើនឡើងក្នុងអត្រា ២,៩% សម្រាប់ខែសីហាកន្លងទៅ។ កំណើនដ៏ល្អនេះមានចំនួនខ្ពស់ជាងការព្យាករណ៍ និងស្ថិតនៅអត្រាមួយខ្ពស់ជាងគោលដៅ ២% របស់ធនាគារកណ្តាលរបស់ខ្លួន ដែលនេះគឺជាសម្ពាធមួយទៅលើធនាគារកណ្តាលរបស់ខ្លួនក្នុងការពិបាកគេចវេសមិនដំឡើង អត្រាការប្រាក់នៅក្នុងកិច្ចប្រជុំស្អែកនេះ៕

ប្រភព៖ cnbc