Thursday, September 7, 2017

Home Financial News ក្រោយធ្លាក់ថ្លៃខ្លាំងកាលពីយប់មិញ តម្លៃមាសស្ងប់ស្ងាត់នៅព្រឹកនេះ

ក្រោយធ្លាក់ថ្លៃខ្លាំងកាលពីយប់មិញ តម្លៃមាសស្ងប់ស្ងាត់នៅព្រឹកនេះ

ការជួញដូរមាសនៅលើទីផ្សារអន្តរជាតិនៅព្រឹកនេះមិនមានការប្រែប្រួលខ្លាំងនោះឡើយបន្ទាប់ពីបានធ្លាក់ថ្លៃខ្លាំងនៅចំពេលដែលប្រាក់ដុល្លារលើងថ្លៃកាលពីយប់មិញជុំវិញចរន្តនយោបាយអាមេរិក។

តម្លៃជួញដូរមាសតាមស្បត (Spot Gold) មិនមានការប្រែប្រួលនោះទេដោយត្រូវបានជួញដូរក្នុងតម្លៃ ១ ៣៣៣,៧០ ដុល្លារក្នុងមួយអោននៅម៉ោង ៨:០០ ព្រឹកកន្លងទៅ បន្ទាប់ពីបានធ្លាក់ថ្លៃអស់ ០,៣% កាលពីយប់មិញ។ ចំណែកទីផ្សារមាសរបស់អាមេរិក (U.S. Gold Futures for December Delivery ) វិញក៏មានការប្រែប្រួលតិចតួចដែរ ហើយត្រូវបានជួញដូរក្នុងតម្លៃ ១ ៣៣៨,៧០ ដុល្លារក្នុងមួយអោន។

ការមិនប្រែប្រួលហាងឆេងមាសនៅថ្ងៃនេះ គឺដោយសារតែប្រាក់ដុល្លារហាក់មានសម្ពាធវិញថ្ងៃនេះ ពោលគឺសន្ទស្សន៍ជួញដូរប្រាក់ដុល្លារធៀបទៅនឹងរូបិយប័ណ្ណនានាបានធ្លាក់ថ្លៃអស់ ០,១២% កំពុងស្ថិតនៅទីតាំងតម្លៃ ៩២,១៨២។ ចំណែកប្រាក់អឺរ៉ូវិញ កំពុងជួញដូរក្នុងទិសដៅវិជ្ជមាននៅមុនពេលធនាគារកណ្តាលរបស់ខ្លួនបើកកិច្ចប្រជុំពិភាក្សាលើគោលនយោបាយរូបិយវត្ថុរបស់ខ្លួននៅថ្ងៃនេះ។

កាលពីថ្ងៃពុធម្សិលមិញ ប្រធានាធិបតីអាមេរិកលោក Donald Trump បានបង្កើតកិច្ចព្រមព្រៀងគួរឱ្យភ្ញាក់ផ្អើលមួយជាមួយសមាជិកសភាមកពីគណបក្សប្រជាធិបតេយ្យដើម្បីបង្កើនប្រាក់កម្ចីនិងផ្តល់មូលនិធិដល់រដ្ឋាភិបាលរហូតដល់ថ្ងៃទី ១៥ ខែធ្នូ។ ប្រសិនបើដំណើររបស់លោក Trump ត្រូវបានអនុម័តមែននោះ វាគឺជាក្តីសង្ឃឹមមួយសម្រាប់ផែនការអភិវឌ្ឍសេដ្ឋកិច្ចរបស់លោកដែលធ្លាប់បានបរាជ័យជាច្រើនលើករួចមកហើយ។

ទាក់ទងទៅនឹងស្ថានការណ៍នយោបាយនៅឧបទ្វីបកូរ៉េវិញ លោក Trump បានព្រមានកាលពីថ្ងៃពុធម្សិលមិញថា សហរដ្ឋអាមេរិកនឹងមិនអត់ធ្មត់ចំពោះសកម្មភាពរបស់កូរ៉េខាងជើងបាននោះឡើយ។ ប៉ុន្តែលោកបានបញ្ជាក់ថា ការប្រើប្រាស់កម្លាំងយោធាប្រឆាំង ទៅនឹងរដ្ឋាភិបាលទីក្រុងព្យុងយ៉ាង នឹងមិនមែនជាជម្រើសដំបូងរបស់លោកទេ។

ចំណែកអនុប្រធានធនាគារកណ្តាលដ៏វ័យចំណាស់ម្នាក់របស់អាមេរិកលោក Stanley Fischer វិញបានមានប្រសាសន៍កាលពីថ្ងៃពុធម្សិលមិញដែរថា លោកនឹងលាលែងចេញពីតំណែងរបស់លោកនៅពាក់កណ្តាលខែតុលាខាងមុខនេះ។ លោកថា ការលាលែងរបស់លោក នឹងបើកផ្លូវឲ្យលោក Trump ធ្វើការជ្រើសរើសអ្នកថ្មីមកជំនួសតំណែងនេះសម្រាប់ផ្លាស់ប្ដូរគោលនយោបាយធនាគារកណ្តាលស្របតាមការចង់បានរបស់ប្រធានាធិបតីរូបនេះ៕

ប្រភព៖ cnbc