Friday, September 1, 2017

Home Financial News ដុល្លារធ្លាក់ថ្លៃវិញ ខណៈអ្នកជួញដូរកំពុងរង់ចាំលទ្ធផលរបាយការណ៍ការងារអាមេរិកនៅថ្ងៃនេះ

ដុល្លារធ្លាក់ថ្លៃវិញ ខណៈអ្នកជួញដូរកំពុងរង់ចាំលទ្ធផលរបាយការណ៍ការងារអាមេរិកនៅថ្ងៃនេះ

ការជួញដូរប្រាក់ដុល្លារក្នុងថ្ងៃសុក្រចុងសប្តាហ៍នេះបានធ្លាក់ថ្លៃមកវិញដល់តម្លៃទាបបំផុតមួយមិនធ្លាប់មាននៅក្នុងរយៈពេលជិត១ឆ្នាំកន្លងទៅនេះ បន្ទាប់ពីទិន្នន័យប្រើប្រាស់របស់អតិថិជនអាមេរិកត្រូវបានរាយការណ៍ថា មានកំណើនទាបជាងការរំពឹងទុក ខណៈដែលអ្នកជួញដូរនៅលើទីផ្សារអន្តរជាតិកំពុងរង់ចាំលទ្ធផលរបាយការណ៍ការងាររបស់ខ្លួននៅយប់នេះ។

សន្ទស្សន៍ជួញដូរប្រាក់ដុល្លារ ធៀបទៅនឹងរូបិយប័ណ្ណគោលសំខាន់ៗចំនួន៦ បានធ្លាក់ថ្លៃអស់ ០,១% ស្ថិតនៅទីតាំងតម្លៃ ៩២,៦១៩ ហើយសរុបនៅសប្តាហ៍នេះវាបានធ្លាក់ថ្លៃអស់ ០,១%។ យ៉ាងណាមិញ វានៅតែស្ថិតនៅក្នុងទីតាំងតម្លៃមួយខ្ពស់ជាងទីតាំងតម្លៃ ៩១,៦២១ កាលពីដើមសប្តាហ៍នេះនៅពេលដែលភាពតានតឹងនៃស្ថានភាព ភូមិសាស្ត្រនយោបាយឧបទ្វីបកូរ៉េកើនកម្តៅឡើងវិញ។

ក៏ប៉ុន្តែធៀបទៅនឹងលុយយ៉េនប្រាក់ដុល្លារនៅតែមានសញ្ញាណវិជ្ជមានដោយបានឡើងថ្លៃ ០,១% ត្រូវបានជួញដូរក្នុងតម្លៃ ១១០,០៧ យ៉េន។ នេះបានធ្វើឲ្យប្រាក់ដុល្លារឡើងថ្លៃបាន ០,៦% នៅក្នុងសប្តាហ៍នេះធៀបទៅនឹងលុយយ៉េន និង ស្ថិតនៅតម្លៃជួញដូរខ្ពស់ជាងតម្លៃធ្លាក់ថ្លៃដ៏អាក្រក់បំផុតដល់ទៅ ១០៨,២៦៥ យ៉េនកាលពីដើមសប្តាហ៍នេះ។

ចំណែកការជួញដូរប្រាក់អឺរ៉ូវិញ នៅបន្តស្ថិតនៅក្នុងស្ថានភាពល្អនៅឡើយដោយត្រូវបានជួញដូរក្នុងតម្លៃ ១,១៩០៧ ដុល្លារ តែបានធ្លាក់ថ្លៃអស់ ០,១% សម្រាប់សប្តាហ៍នេះ។ ក៏ប៉ុន្តែបើគេគិតចាប់តាំងពីដើមឆ្នាំ ២០១៧មក វាបានឡើងថ្លៃដល់ទៅ ១៣% ឯណោះ ធៀប ទៅនឹងលុយដុល្លារ។

ការថ្លឹងថ្លែងលើប្រាក់ដុល្លារក៏មានការកត់សម្គាល់ផងដែរពីលេខាធិការរតនាគារអាមេរិកលោក Steven Mnuchin ដែលបានលើកឡើងនៅក្នុងស្ថានីយទូរទស្សន៍ CNBC ថា លុយដុល្លារធ្លាក់ថ្លៃអាចមានគុណសម្បត្តិសម្រាប់ពាណិជ្ជកម្មអាមេរិក។ លោក Mnuchin បានបន្តទៀតថា ព្យុះត្រូពិច Harvey ដែលបានបំផ្លិចបំផ្លាញប្រព័ន្ធហេដ្ឋារចនាសម្ព័ន្ធនានានៅក្នុងរដ្ឋ Texas កន្លងទៅនេះ នឹងអាចជំរុញឲ្យសភាអាមេរិក បង្កើនកញ្ចប់ថវិកាប្រាក់កម្ចីដែលបានបដិសេធន៍កន្លងមក។

ទិន្នន័យសេដ្ឋកិច្ចនៅថ្ងៃព្រហស្បតិ៍ម្សិលមិញបានបង្ហាញថា ការចំណាយរបស់អតិថិជនអាមេរិកមានកំណើនតិចជាងការរំពឹងទុកកាលពីខែកក្កដាកន្លងទៅ ហើយអតិផរណាប្រចាំឆ្នាំក៏មានកំណើនមួយក្នុងល្បឿនយឺតបំផុតមិនធ្លាប់មានចាប់តាំងពីចុងឆ្នាំ ២០១៥មក។ ជាមួយគ្នានេះ ការដាក់ពាក្យស្នើសុំសម្រាប់សុំផលប្រយោជន៍នៅអំឡុងពេលគ្មានការងារធ្វើរបស់ខ្លួនកាលពីសប្តាហ៍មុនក៏មានការកើនឡើងផងដែរ។

លទ្ធផលមិនសូវល្អនៃស្ថានភាពចំណាយរបស់អតិថិជនខាងលើនេះ បានជំរុញឲ្យអ្នកជួញដូរមានការអស់សង្ឃឹមទៅនឹងការដំឡើងអត្រាការប្រាក់ជាថ្មីម្តងទៀតរបស់ធនាគារកណ្តាលអាមេរិកនៅចុងឆ្នាំនេះ។ ទន្ទឹមនឹងគ្នានេះ អ្នកជួញដូរសង្ឃឹមថា ធនាគារកណ្តាលមួយនេះនឹងចាប់ផ្តើមអនុវត្តផែនការកាត់បន្ថយមូលបត្របំណុលដ៏ច្រើនសន្ធឹកសន្ធាប់របស់ខ្លួនជាបណ្តើរៗនៅក្នុងកិច្ចប្រជុំរបស់ខ្លួនក្នុងខែក្រោយនេះ៕

ប្រភព៖ cnbc