ទីផ្សារភាគហ៊ុនអាស៊ីឡើងថ្លៃព្រោងព្រាតថ្ងៃនេះ

ការជួញដូរនៅលើទីផ្សារភាគហ៊ុន អាស៊ីនៅព្រឹកថ្ងៃសុក្រចុងសប្តាហ៍នេះ កំពុងស្ថិតនៅក្នុងសញ្ញាណឡើងថ្លៃល្អ ខណៈដែលអ្នកជួញដូរកំពុងសង្ឃឹមលើទិន្នន័យនៃកំណើនផលិតកម្មរបស់ចិន និង ការធ្លាក់ថ្លៃវិញនៃប្រាក់ដុល្លារកាលពីយប់មិញ។

សន្ទស្សន៍ជួញដូរនៅលើផ្សារភាគហ៊ុនជប៉ុន Nikkei 225 បានឡើងថ្លៃ ០,២២% ខណៈដែលសន្ទស្សន៍ផ្សារភាគហ៊ុនកូរ៉េបានស្ថិតនៅក្នុងតម្លៃជួញដូរធ្លាក់ថ្លៃបន្តិចបន្តួចត្រឹម ០,០៩% ប៉ុណ្ណោះ។ ចំណែកសន្ទស្សន៍ជួញដូរផ្សារភាគហ៊ុនអូស្ត្រាលី S&P/ASX 200 កំពុងបោះជំហានក្នុងទិសដៅវិជ្ជមាន ជាមួយនឹងការឡើងថ្លៃរបស់ក្រុមហ៊ុនថាមពល និង ក្រុមហ៊ុនសុខភាពដែលផ្ទុយពីភាគហ៊ុនក្រុមហ៊ុនធនាគារបានធ្លាក់ថ្លៃបន្តិចបន្តួចដែរ។

ងាកទៅមើលការជួញដូរនៅលើទីផ្សារភាគហ៊ុនចិនវិញមានសញ្ញាណវិជ្ជមានច្រើនបន្ទាប់ពីទិន្នន័យស្រាវជ្រាវរបស់ឯកជនមួយបានបង្ហាញថា វិស័យផលិតកម្មរបស់ខ្លួនមានកំណើនខ្ពស់ជាងមុន។ សន្ទស្សន៍ជួញដូរផ្សារភាគហ៊ុនហុងកុងបានឡើងថ្លៃ ០,៣៩% ខណៈដែលសន្ទស្សន៍ផ្សារភាគហ៊ុនសៀងហៃបានឡើងថ្លៃ ០,៣៤% និង សន្ទស្សន៍ផ្សារភាគហ៊ុន Shenzhen បានឡើងថ្លៃបន្តិចបន្តួចដែរដល់ ០,០៦៦%។

បើយោងតាមការស្ទាបស្ទង់របស់សារព័ត៌មាន Reuters បានបង្ហាញថា វិស័យផលិតកម្មចិននៅពាក់កណ្តាលឆ្នាំ ២០១៧នេះ បានកើនឡើងខ្ពស់ជាងការរំពឹងទុករបស់ខ្លួន។ បើតាមការព្យាករណ៍របស់ខ្លួនវាមានត្រឹមតែចំនួន ៥០,៩ ខណៈដែលទិន្នន័យជាក់ស្តែងវាបានកើនឡើងដល់ ៥១,១ សម្រាប់ខែកក្កដាកន្លងទៅនេះ។

កាលពីម្សិលមិញ មានព័ត៌មានសំខាន់ជាច្រើនចេញពីអាមេរិកដែលក្នុងនោះរួមមានលេខាធិការរតនាគាររបស់ខ្លួនលោក Steven Mnuchinsaying បានថ្លែងថា ផែនការពន្ធលម្អិត ត្រូវបានរៀបចំឡើងរួចរាល់ហើយដោយរដ្ឋការរបស់លោក Donald Trump ។ លោកបានបន្តនៅក្នុងបទសម្ភាសន៍មួយជាមួយស្ថានីយទូរទស្សន៍ CNBCថា ផែនការនេះត្រូវបានដាក់បង្ហាញឲ្យសភាពិភាក្សាដេញដោលរួចហើយ ហើយវានឹងត្រូវបង្ហាញជាសាធារណនៅចុងខែកញ្ញាខាងមុខ។

យ៉ាងណាមិញ អ្នកជួញដូរនៅលើទីផ្សារអន្តរជាតិកំពុងខកចិត្តទៅនឹងទិន្នន័យនៃការចំណាយរបស់អតិថិជនរបស់អាមេរិក និង កំណើនអតិផរណាទាបជាងការរំពឹងទុកដែលបានបញ្ចេញឲ្យដឹងកាលពីម្សិលមិញ។ បើយោងតាមសារព័ត៌មាន Reuters ការចំណាយនេះបានកើនឡើង ០,៣% សម្រាប់ខែកក្កដាកន្លងទៅ ទាបជាងការព្យាករណ៍ដែលថា វាអាចកើនឡើង ០,៤%។

របាយការណ៍នេះ ធ្វើឲ្យអ្នកជួញដូរព្យាករណ៍ទុកជាមុនថា ការដំឡើងអត្រាការប្រាក់របស់ធនាគារកណ្តាលអាមេរិកនៅខែធ្នូខាងមុខពិបាកនឹងធ្វើទៅបាន។ អ្វីដែលជាក្តីសង្ឃឹមសម្រាប់អ្នកជួញដូរនៅក្នុងសប្តាហ៍នេះ គឺការទន្ទឹងរង់ចាំទិន្នន័យទូទៅលើរបាយការណ៍ការងាររបស់អាមេរិកប្រចាំខែសីហា ដែលនឹងបញ្ចេញឲ្យដឹងនៅយប់នេះ៕

ប្រភព៖ cnbc