ទីផ្សារប្រេងឆៅប្រែប្រួលដល់ណាហើយ?

ការជួញដូរប្រេងឆៅនៅលើទីផ្សារអាស៊ីព្រឹកនេះបានធ្លាក់ថ្លៃ បន្តិចវិញ ខណៈដែលអ្នកជួញដូរកំពុងតាមដានលើផលប៉ះពាល់នៃគ្រោះមហន្តរាយព្យុះ Irma និង ព្យុះ Harveyដែលបានបោកបក់មកលើរោងចក្រចម្រាញ់ប្រេងមួយចំនួននៅក្នុងរដ្ឋ Florida និង រដ្ឋ Texas របស់អាមេរិកកាលពីពេលថ្មីៗកន្លងទៅ។

ទីផ្សារប្រេងឆៅនៅលើទីផ្សារអន្តរជាតិ (Brent Crude) បានធ្លាក់ចុះអស់ ៨ សេន ឬ ស្មើនឹង ០,២% ត្រូវបានជួញដូរក្នុងតម្លៃ ៥៣,៧៦ ដុល្លារក្នុងមួយបារ៉ែល។ ចំណែកទីផ្សារប្រេងឆៅរបស់អាមេរិក (WTI) បានធ្លាក់ថ្លៃអស់ ៣សេន ឬស្មើនឹង០,១% ត្រូវបានជួញដូរក្នុងតម្លៃ ៤៨,០៤ ដុល្លារក្នុងមួយបារ៉ែល។

នៅក្នុងទីផ្សារជួញដូរប្រេងឆៅរបស់អាមេរិក ក្រុមហ៊ុនចម្រាញ់ប្រេងដ៏ធំរបស់ខ្លួន Motiva Enterprises ទើបតែដំណើរការបើកឲ្យជួញដូរភាគហ៊ុនឡើងវិញនៅសប្តាហ៍នេះ បន្ទាប់ពីបានបិទសកម្មភាពផលិតប្រេងរបស់ខ្លួនអស់រយៈពេល២សប្តាហ៍មកហើយដោយសារតែមានការវាយប្រហារពីខ្យល់ព្យុះ Harvey។

ចំណែកព្យុះ Irma ដែលទើបតែបានបោកបក់ចូលទឹកដីរដ្ឋ Florida កាលពីថ្ងៃអាទិត្យកន្លងទៅបានដាក់សម្ពាធបន្ថែមទៀតដល់សេដ្ឋកិច្ចអាមេរិកបន្ទាប់ពីវាបានបំផ្លិចបំផ្លាញប្រព័ន្ធហេដ្ឋារចនាសម្ព័ន្ធនានា និងបានបណ្តាលឲ្យលំនៅឋាន ៧,៤ លាន និងក្រុមហ៊ុននានាគ្មានអគ្គីសនាប្រើប្រាស់។

ការស្ទង់មតិដំបូងរបស់សារព័ត៌មាន Reutersបានបង្ហាញថា ការបូមប្រេងរបស់អាមេរិកទំនងជាបានកើនឡើងកាលពីសប្តាហ៍មុន ខណៈការចម្រាញ់ប្រេងឆៅត្រូវបានគេព្យាករណ៍ថា បានធ្លាក់ចុះ។ បើយោងតាមទីភ្នាក់ងារព័ត៌មានថាមពលអាមេរិក (EIA) ការស្តុកប្រេងឆៅទំនងកើនឡើង ២,៣ លានបារ៉ែលកាលពីសប្តាហ៍ថ្ងៃទី ៨ កញ្ញាកន្លងទៅ។

ងាកទៅមើលអង្គការបណ្តាប្រទេសនាំប្រេងចេញ (OPEC) វិញ កំពុងបន្តអនុវត្តិកិច្ចព្រមព្រៀងរបស់ខ្លួនបន្ថែមទៀតដើម្បីខិតខំរក្សាស្ថិរភាពតម្លៃប្រេងដូចការចង់បានចំនួន ១,៨ លានបារ៉ែលក្នុងមួយថ្ងៃ។ អគ្គលេខាធិការអង្គការ OPEC លោក Mohammad Barkindo បានមានប្រសាសន៍កាលពីថ្ងៃច័ន្ទម្សិលមិញថា ការកាត់បន្ថយការផ្គត់ផ្គង់ប្រេងនឹងរំពឹងថា នឹងធ្វើឲ្យទីផ្សារប្រេងឆៅមានតុល្យភាព ហើយតម្រូវការកើនឡើងនៅពេលបច្ចុប្បន្ននេះ នឹងអាចជួយកាត់បន្ថយកំណើនស្តុកប្រេងឆៅបាន៕

ប្រភព៖ cnbc