Monday, September 4, 2017

Home Financial News មាសស្ទុះឡើងថ្លៃកាន់តែខ្ពស់ថ្ងៃនេះ ក្រោយកូរ៉េខាងជើងធ្វើតេស្ដអាវុធនុយក្លេអ៊ែរជាថ្មីទៀត

មាសស្ទុះឡើងថ្លៃកាន់តែខ្ពស់ថ្ងៃនេះ ក្រោយកូរ៉េខាងជើងធ្វើតេស្ដអាវុធនុយក្លេអ៊ែរជាថ្មីទៀត

នៅថ្ងៃនេះការជួញដូរមាសបានហក់ឡើងដល់តម្លៃជួញដូរមួយខ្ពស់បំផុតមិនធ្លាប់មាននៅក្នុងរយៈពេលជិត១០ខែកន្លងទៅ បន្ទាប់ពីអាវុធនុយក្លេអ៊ែរដ៏ថ្មីបំផុត និង មានកម្លាំងខ្លាំងក្លាបំផុតមួយត្រូវបានធ្វើតេស្តម្តងទៀតបង្កឲ្យអ្នកជួញដូរនៅលើទីផ្សារអន្តរជាតិកំពុងមានការព្រួយបារម្ភ។

តម្លៃជួញដូរមាសតាមស្បតបានឡើងថ្លៃបន្តទៀតក្នុងចំនួន ០,៨% ត្រូវបានជួញដូរក្នុងតម្លៃ ១ ៣៣៥,៣១ ដុល្លារក្នុងមួយអោន បន្ទាប់ពីបានហក់ឡើងថ្លៃម្តងរួចហើយនូវតម្លៃជួញដូរ ១ ៣៣៦,៧៨ ដុល្លារដែលជាតម្លៃខ្ពស់បំផុតមិនធ្លាប់មានគិតចាប់តាំងពីថ្ងៃទី ៩ វិច្ឆិកាឆ្នាំ ២០១៦មក ។ ចំណែកទីផ្សារមាសរបស់អាមេរិកឡើងថ្លៃបាន០,៨% ដែរ ត្រូវបានជួញដូរក្នុងតម្លៃ ១ ៣៤០,៩០ ដុល្លារក្នុងមួយអោននៅម៉ោង ៨:៣០ នាទីព្រឹកនេះ។

លុយយ៉េនជប៉ុន និងមូលប័ត្របំណុលរបស់ខ្លួនក៏បានកើនឡើងផងដែរនៅថ្ងៃ នេះដោយសារព័ត៌មានដ៏រជើបរជួលនៃការធ្វើតេស្តអាវុធនុយក្លេអ៊ែរជាថ្មីទៀតរបស់កូរ៉េខាងជើង។ ព័ត៌មាននេះជាដំណឹងមួយដ៏គួរឲ្យព្រួយបារម្ភសម្រាប់ទីផ្សាររូបិយប័ណ្ណ ហើយក៏បានធ្វើឲ្យប៉ះពាល់ផងដែរដល់ អនាគតទីផ្សារភាគហ៊ុនសាកលលោក។

កាលពីថ្ងៃអាទិត្យម្សិលមិញ កូរ៉េខាងជើងបានសាកល្បងធ្វើតេស្តអាវុធនុយក្លេអ៊ែរជាថ្មីម្តងទៀតជាលើកទី ៦ នូវអ្វីដែលខ្លួនពណ៌នាថា ជាគ្រាប់បែកអ៊ីដ្រូសែនដ៏មានកម្លាំងខ្លាំងក្លាសម្រាប់បំពាក់លើក្បាលគ្រាប់មីស៊ីលរយៈចម្ងាយឆ្ងាយ។ ការធ្វើតេស្តនេះបានបង្កឱ្យមានការគំរាមកំហែង និងមានភាពតានតឹងឡើងវិញនៅក្នុងតំបន់ឧបទ្វីបកូរ៉េ ជាមួយសារឆ្លើយតបដ៏ម៉ឺងម៉ាត់របស់អាមេរិកថា នឹងវាយប្រហារកម្ទេចប្រទេសនេះប្រសិនបើខ្លួនហ៊ានវាយប្រហារសម្ព័ន្ធមិត្តរបស់ទីក្រុងវ៉ាស៊ីនតោនមែននោះ។

ងាកមកមើលស្ថានការណ៍នៅកូរ៉េខាងត្បូងវិញ កងយោធារបស់ខ្លួនបាននិយាយថា កងទ័ពជើងអាកាសនិងកងទ័ពជើងគោករបស់ខ្លួនបានចាប់ផ្តើមធ្វើសមយុទ្ធយោធានៅថ្ងៃនេះដើម្បីឆ្លើយតបទៅនឹងការសាកល្បងធ្វើតេស្តអាវុធនុយក្លេអ៊ែររបស់កូរ៉េខាងជើង ពោលគឺបានបង្កើនសមយុទ្ធបន្ថែមទៀតនៅកៀកទៅនឹងតំបន់ដែលការធ្វើតេស្តអាវុធនុយក្លេអ៊ែរត្រូវបានធ្វើឡើងតែម្តង។

ចំណែកស្ថានភាពចរចាពាណិជ្ជកម្មរវាងកាណាដា សហរដ្ឋអាមេរិក និង ម៉ិកស៊ិកបានបង្ហាញសំណើបន្ថែមទៀតសម្រាប់កិច្ចព្រមព្រៀងពាណិជ្ជកម្មសេរីអាមេរិកខាងជើង (NAFTA) កាលពីថ្ងៃសុក្រកន្លងទៅ ហើយភាគីទាំងអស់បានព្យាយាមស្វែងរកដំណោះស្រាយដើម្បីទប់ស្កាត់កុំឲ្យមានការរំលាយចោលពីលោក Trump។

ធនាគារកណ្តាលអ៊ឺរ៉ុបឯណោះវិញ ទំនងជានឹងប្រកាសពីការកាត់បន្ថយការទិញមូលបត្របំណុលប្រចាំខែរបស់ខ្លួននៅក្នុងខែតុលា ខាងមុខ នេះបើយោងតាមការស្ទាបស្ទង់មតិរបស់អ្នកវិភាគសេដ្ឋកិច្ចប្រចាំនៅសារព័ត៌មាន Reuters។

អ្នកជួញដូររំពឹងថា ធនាគារកណ្តាលអាមេរិកទំនងជាត្រូវរង់ចាំរហូតដល់ពាក់កណ្តាលឆ្នាំ ២០១៨ ទើបអាចដំឡើងអត្រាការប្រាក់របស់ខ្លួនជាថ្មីបានបន្ទាប់ ពីរបាយការណ៍របស់រដ្ឋាភិបាលកាលពីថ្ងៃសុក្រសប្តាហ៍មុនបានបង្ហាញថា និយោជិកបានបន្ថែមការងារតិចជាងការរំពឹងទុកកាលពីខែសីហាកន្លងទៅ៕

ប្រភព៖ cnbc