Tuesday, September 26, 2017

Home Financial News លុយយ៉េនឡើងថ្លៃ ខណៈការប្រឈមមុខដាក់គ្នានៅឧបទ្វីបកូរ៉េកើនកម្តៅឡើងវិញ

លុយយ៉េនឡើងថ្លៃ ខណៈការប្រឈមមុខដាក់គ្នានៅឧបទ្វីបកូរ៉េកើនកម្តៅឡើងវិញ

ការជួញដូរលុយយ៉េនរបស់ជប៉ុនត្រូវបានគេមើលឃើញថា បានឡើងថ្លៃនៅព្រឹកថ្ងៃ អង្គារនេះ ខណៈដែលស្ថានការណ៍នយោបាយនៅឧបទ្វីបកូរ៉េបានកើនកម្តៅឡើងវិញនៃការប្រឈមមុខដាក់គ្នារវាងអាមេរិកនិងកូរ៉េខាងជើង។

ព្រឹកនេះការជួញដូរប្រាក់ដុល្លារបានធ្លាក់មកត្រឹមតម្លៃ ១១១,៧៦០ យ៉េនវិញ ក្នុងមួយដុល្លារបន្ទាប់ពីត្រូវបានជួញដូរក្នុងតម្លៃ ១១២,៥៣០ យ៉េនក្នុងមួយដុល្លារកាលពីថ្ងៃ ច័ន្ទម្សិលមិញ។ ចំណែកប្រាក់អឺរ៉ូវិញ មានការប្រែប្រួលតិចតួចដោយត្រូវបានជួញដូរក្នុងតម្លៃ ១៣២,៤៦០ យ៉េនក្នុងមួយអឺរ៉ូ បន្ទាប់ពីបានធ្លាក់ថ្លៃ អស់ជាង ១% កាលពីយប់មិញ។

ការឡើងថ្លៃនៃលុយយ៉េនរបស់ជប៉ុននេះបានកើតមានឡើងបន្ទាប់ពីរដ្ឋមន្ត្រីការបរទេសកូរ៉េខាងជើងគឺលោក Ri Yong Ho បានថ្លែងនៅក្នុងមហាសន្និបាតប្រចាំឆ្នាំរបស់អង្គការសហប្រជាជាតិកាលពីថ្ងៃច័ន្ទម្សិលមិញដោយចោទប្រកាន់ថា លោក Donald Trump ប្រធានាធិបតីអាមេរិកជាអ្នកប្រកាសសង្គ្រាមប្រឆាំងនឹងខ្លួន។ លោកបានបន្ថែមថា កូរ៉េខាងជើងនឹងប្រសិទ្ធិការពារអធិបតេយ្យភាពរបស់ខ្លួន ហើយនឹងបាញ់ទម្លាក់យន្តហោះចម្បាំងអាមេរិកណាដែលហ៊ានហោះចូលដែនឱកាសកូរ៉េខាងជើង។

លុយហ្វ្រង់ស្វីសដែលជារឿយៗបានឡើងថ្លៃដូចលុយយ៉េនដែរនៅពេលដែលមានភាពតានតឹងភូមិសាស្រ្តនយោបាយនោះ បានត្រូវជួញដូរក្នុងតម្លៃ ០,៩៦៦៣ ហ្រ្វង់ក្នុងមួយដុល្លារ បន្ទាប់ពីបានហក់ឡើងថ្លៃបាន ០,៣% កាលពីយប់មិញ។

ចំពោះសម្ពាធប្រាក់អឺរ៉ូគឺបានកើតមានឡើងបន្ទាប់ពីប្រមុខធនាគារកណ្តាលរបស់ខ្លួនគឺលោក Mario Draghi បានលើកឡើងពីភាពប្រែប្រួលរូបិយប័ណ្ណក្នុងតំបន់ដែលជាប្រភពមួយបង្ហាញពីភាពមិនច្បាស់លាស់របស់ស្ថាប័ននេះ ក្នុងការទាមទារឱ្យមានការឃ្លាំមើល។ លោកបានអះអាងទៀតថា ការកែលំអបន្ថែមរបស់ ECB នៅតែត្រូវការជាចាំបាច់ ពីព្រោះការផ្លាស់ប្តូរឆាប់រហ័សអាចជួយដោះស្រាយការងាររបស់ខ្លួន។

ងាកទៅមើលការជួញដូរប្រាក់ដុល្លារនូវែលហ្សេឡង់វិញ បានបន្តធ្លាក់ថ្លៃទៀតពីថ្ងៃម្សិលមិញ និងបានធ្លាក់ថ្លៃអស់ ០,១៥% នៅថ្ងៃនេះ ហើយត្រូវបានជួញដូរក្នុងតម្លៃ ០,៧២៥៦ ដុល្លារ។ កាលពីយប់មិញវាបានធ្លាក់ថ្លៃអស់ ១% បន្ទាប់ពីនាយករដ្ឋមន្ត្រី របស់ខ្លួនឈ្នះឆ្នោតជាថ្មីកាលពីថ្ងៃសៅកន្លងទៅ ប៉ុន្តែមិនទទួលបានកៅអីគ្រប់គ្រាន់ដើម្បីបង្កើតរដ្ឋាភិបាលនោះឡើយ ដែលជាមូលហេតុមួយធ្វើឲ្យអ្នកវិនិយោគអាចប្រឈមមុខទៅនឹងភាពតានតឹងនយោបាយក្នុងប្រទេសនេះនៅពេលខាងមុខ៕

ប្រភព៖ cnbc