Thursday, September 7, 2017

Home Financial News ប្រាក់អឺរ៉ូ និង ដុល្លារកាណាដាឡើងថ្លៃក្រោយធនាគារកណ្តាលរបស់ខ្លួនដំឡើងអត្រាការប្រាក់ជាថ្មី

ប្រាក់អឺរ៉ូ និង ដុល្លារកាណាដាឡើងថ្លៃក្រោយធនាគារកណ្តាលរបស់ខ្លួនដំឡើងអត្រាការប្រាក់ជាថ្មី

ប្រាក់អឺរ៉ូកំពុងមានសញ្ញាណវិជ្ជមាននៅមុនកិច្ចប្រជុំរបស់ធនាគារកណ្តាលរបស់ខ្លួន (ECB) បើកកិច្ចប្រជុំនៅថ្ងៃនេះ ខណៈដែលប្រាក់ដុល្លារក៏ឡើងថ្លៃដែរក្នុងតម្លៃខ្ពស់បំផុតមួយមិនធ្លាប់មាននៅក្នុងរយៈពេល២ ឆ្នាំកន្លងទៅនេះ បន្ទាប់បីធនាគារកណ្តាលកាណាដា (BoC) បានប្រកាសដំឡើងអត្រាការប្រាក់គួរឲ្យភ្ញាក់ផ្អើលមួយកាលពីយប់មិញ។

ការជួញដូរប្រាក់អឺរ៉ូបានឡើងថ្លៃ ០,១% ត្រូវបានជួញដូរក្នុងតម្លៃ ១,១៩២៨ ដុល្លារក្នុងមួយអឺរ៉ូ។ ក៏ប៉ុន្តែតម្លៃនេះនៅទាបនៅឡើយបើប្រៀបធៀបទៅនឹងតម្លៃឡើងថ្លៃ ដល់ទៅ ១,២០៧០ ដុល្លារក្នុងមួយអឺរ៉ូកាលពីសប្តាហ៍មុនដែលជាតម្លៃជួញដូរខ្ពស់បំផុតមិនធ្លាប់មានគិតចាប់តាំងពីឆ្នាំ ២០១៥មក។

គេសង្កេតឃើញថា ប្រាក់អឺរ៉ូបានបាត់បង់សន្ទុះឡើងថ្លៃចាប់តាំងពីបានហក់ឡើងដល់កម្រិតតម្លៃខ្ពស់បំផុតមួយនៅក្នុងរយៈពេលជាង ២ឆ្នាំកន្លងទៅនេះកាលពីសប្តាហ៍មុន។ ការឡើងថ្លៃនៃប្រាក់អឺរ៉ូត្រូវបានគេរំពឹងទុកថា វានឹងធ្វើឲ្យយឺតយ៉ាវដល់ផែនការកាត់បន្ថយទិញចូលមូលបត្របំណុលរបស់ធនាគារកណ្តាលអឺរ៉ុប។

សេដ្ឋកិច្ចវិទូចំនួន ១៥ រូប ក្នុងចំណោមសេដ្ឋកិច្ចវិទូ ៦៦ រូបដែលបានស្ទង់មតិដោយសារព័ត៌មាន Reuters បាននិយាយថា ពួកគេរំពឹងថា ធនាគារកណ្តាលអឺរ៉ុប នឹងប្រកាសពីផែនការកាត់បន្ថយទិញចូលមូលបត្របំណុលប្រចាំខែរបស់ខ្លួននៅក្នុងកិច្ចប្រជុំគោលនយោបាយនៅថ្ងៃព្រហស្បតិ៍នេះ។

លោក Tareck Horchani អ្នកវិភាគជាន់ខ្ពស់របស់ទីផ្សាររូបិយប័ណ្ណនៅក្រុមហ៊ុន Saxo Markets ក្នុងប្រទេសសិង្ហបុរីបានលើកឡើងថា ប្រសិនបើប្រមុខធនាគារកណ្តាលអឺរ៉ុបគឺលោក Draghi មិនបានមានប្រសាសន៍អ្វីសោះពីប្រាក់អឺរ៉ូនៅក្នុងកិច្ចប្រជុំនេះ នោះវានឹងធ្វើឲ្យប្រាក់អឺរ៉ូកាន់តែឡើងថ្លៃ។ ក៏ប៉ុន្តែវាអាចស្ថិតនៅទីតាំង Support ១,១៧ ទៅ ១,១៨ ដុល្លារប្រសិនបើលោក Draghi បង្ហើបខ្លះៗពីស្ថានភាពប្រាក់អឺរ៉ូ។

ងាកទៅមើលការជួញដូរលុយដុល្លារកាណាដាវិញ កំពុងត្រូវបានជួញដូរក្នុងតម្លៃ ១,២២៣៨ ដុល្លារកាណាដាក្នុងមួយដុល្លារ បោលគឺបានឡើងថ្លៃកាន់តែខ្ពស់ពីតម្លៃជួញដូរ ១,២១៤០ ដុល្លារកាលពីថ្ងៃម្សិលមិញដែលជាតម្លៃដ៏ខ្ពស់បំផុតមិនធ្លាប់មាននោះឡើយគិតចាប់តាំងពីខែមិថុនាឆ្នាំ ២០១៥មក។ ការឡើងថ្លៃនេះបានកើតមានឡើងបន្ទាប់ពីធនាគារកណ្តាលរបស់ខ្លួនសម្រេចដំឡើងអត្រាការប្រាក់ដ៏គួរឲ្យភ្ញាក់ផ្អើលមួយកាលពីថ្ងៃម្សិលមិញ។

ចំណែកការជួញដូរប្រាក់ដុល្លារវិញ ហាក់បានធ្លាក់ថ្លៃបន្តិច ពោលគឺត្រូវបានជួញដូរក្នុងតម្លៃ ១០៩,០៧ យ៉េនក្នុងមួយដុល្លារ។ យ៉ាងណាមិញ តម្លៃនេះនៅតែជាតម្លៃមួយខ្ពស់ប្រៀបធៀបទៅនឹងថ្ងៃម្សិលមិញដែលវាត្រូវបានជួញដូរធ្លាក់ថ្លៃដល់ទៅ ១០៨,៤៥ យ៉េនក្នុងមួយដុល្លារ។ ការឡើងថ្លៃមកវិញនៃប្រាក់ដុល្លារកាលពីថ្ងៃម្សិលមិញគឺបានកើតមានឡើងបន្ទាប់ពីមានសង្ឃឹមខ្លះពីប្រធានាធិបតី Donald Trump លើការស្នើសុំអនុម័តបង្កើនប្រាក់កម្ចីសម្រាប់កសាងសេដ្ឋកិច្ចជាតិទៅសភាជាតិ៕

ប្រភព៖ cnbc