ផ្សារភាគហ៊ុនអាស៊ីប្រែប្រួលអ្វីខ្លះថ្ងៃនេះ?

ការជួញដូរនៅលើផ្សារភាគហ៊ុនអាស៊ីបានឡើងចុះមិនស្របគ្នានោះទេនៅក្នុងថ្ងៃនេះ បន្ទាប់ពីការជួញដូរប្រាក់ដុល្លារបានស្ទុះឡើងថ្លៃខ្ពស់កាលពីយប់មិញខណៈដែលអ្នកជួញដូរកំពុងតាមដានយ៉ាងយកចិត្តទុកដាក់លើកម្មវិធីកំណែទម្រង់ពន្ធដាររបស់អាមេរិក និង ទិន្នន័យសេដ្ឋកិច្ចរបស់ជប៉ុន។

សន្ទស្សន៍ជួញដូរផ្សារភាគហ៊ុនជប៉ុន Nikkei 225 បានធ្លាក់ថ្លៃអស់ ០,២៩% បន្ទាប់ពីការជួញដូរប្រាក់ដុល្លារបានបង្ហាញសញ្ញាណវិជ្ជមានខ្លាំងកាលពីយប់មិញ។ រីឯសន្ទស្សន៍ជួញដូរ ផ្សារភាគហ៊ុនកូរ៉េខាងត្បូង Kospi វិញ បានឡើងថ្លៃ ០,៥៣% ខណៈដែលភាគហ៊ុនរបស់ក្រុមហ៊ុនឧស្សាហកម្ម ក្រុមហ៊ុនលក់រាយ និង ក្រុមហ៊ុនប្រេងសុទ្ធតែបានឡើងថ្លៃដូចគ្នា។

យ៉ាងណាមិញ សន្ទស្សន៍ជួញដូរផ្សារភាគហ៊ុនអូស្ត្រាលី S&P/ASX 200 បានជួញដូរក្នុងសញ្ញាណអវិជ្ជមាន ក្នុងអត្រាធ្លាក់ថ្លៃអស់ ០,០៥%។ ចំណែកសន្ទស្សន៍ជួញដូរផ្សារភាគហ៊ុនហុងកុង Hang Seng បានធ្លាក់ថ្លៃដែរអស់ ០,០៩% ផ្ទុយពីផ្សារភាគហ៊ុនសៀងហៃបានឡើងថ្លៃ ០,២៧% និង ០,៥៥៥% សម្រាប់សន្ទស្សន៍ជួញដូរផ្សារភាគហ៊ុន Shenzhen។

ធនាគារចិន OCBC បានឱ្យដឹងនៅក្នុងសេចក្តីថ្លែងការណ៍មួយថា ទីផ្សារភាគហ៊ុនរបស់អាស៊ីនឹងកើបប្រាក់ចំណេញច្រើននៅថ្ងៃសុក្រនេះ បន្ទាប់ពីទិន្នន័យសេដ្ឋកិច្ចនៅក្នុងត្រីមាសទី២បានបង្ហាញទិសដៅវិជ្ជមានច្រើន តួយ៉ាងដូច ជាសេដ្ឋកិច្ចជប៉ុនជាដើម។ នៅសប្តាហ៍ក្រោយ ទីផ្សារជួញដូរមួយចំនួនរួមទាំងកូរ៉េខាងត្បូង និង ចិន នឹងត្រូវផ្អាកការជួញដូរសម្រាប់ថ្ងៃឈប់សម្រាកប្រចាំឆ្នាំ ដែលនេះនឹងមានឥទ្ធិពលដល់ការជួញដូរក្នុងថ្ងៃ នេះ។

ងាកទៅមើលស្ថានភាពជួញដូរនៅលើផ្សារភាគហ៊ុនអាមេរិកវិញ បានបិទការជួញដូរក្នុងតម្លៃឡើងថ្លៃបន្ទាប់ពីមានការប្រកាសពីគម្រោងពន្ធដារថ្មីជាសាធារណៈកាលពីថ្ងៃពុធកន្លងទៅ។ សន្ទស្សន៍ជួញដូរនៅក្នុងផ្សារភាគហ៊ុន Dow Jones បាឡើង ថ្លៃ០,១៨% ឬ ស្មើនឹង ៤០,៤៩ ចំណុច បិទការជួញដូរក្នុងទីតាំងតម្លៃ ២២ ៣៨១,២១។

ទន្ទឹមនឹងនេះផងដែរ លោកស្រី Esther George ដែលជាប្រមុខធនាគារកណ្តាលអាមេរិកមកពីទីក្រុង Kansas បានថ្លែងកាលពីថ្ងៃព្រហស្បតិ៍ម្សិលមិញថា ការបន្តដំឡើងអត្រាការប្រាក់ គឺវាសមស្របទៅហើយទៅនឹងស្ថានភាពសេដ្ឋកិច្ចអាម៉េរិកបច្ចុប្បន្ន។ សាររបស់លោកស្រីនេះបានផ្តល់ក្តីសង្ឃឹមបន្ថែមទៀតពីលើសាររបស់លោកស្រី Yellen ប្រមុខធនាគារកណ្តាលអាមេរិកកាលពីពេលថ្មីៗកន្លងទៅលើគម្រោងចង់ដំឡើង អត្រាការប្រាក់នេះ។

ងាកមកមើលអ្នកជួញដូរនៅលើទីផ្សារអន្តរជាតិវិញក៏កំពុងចាប់អារម្មណ៍ផងដែរលើទិន្នន័យសេដ្ឋកិច្ចជប៉ុនដែលត្រូវបានចេញផ្សាយនៅព្រឹកនេះ។ បើយោងតាមទិន្នន័យរដ្ឋាភិបាលបានបង្ហាញថា សន្ទស្សន៍ថ្លៃទំនិញប្រើប្រាស់របស់ប្រទេសនេះបានឡើងថ្លៃ ០,៧% ធៀបទៅនឹងរយៈពេលដូចគ្នានេះកាលពីឆ្នាំទៅ ហើយនេះបានធ្វើឲ្យវាឡើងថ្លៃជាប់ៗគ្នានៅក្នុងរយៈពេល៨ខែក្នុងឆ្នាំ ២០១៧នេះ៕

ប្រភព៖ cnbc