ដុល្លារបន្តឡើងថ្លៃជាថ្មីទៀតនៅថ្ងៃនេះ

ការជួញដូរប្រាក់ដុល្លារត្រូវបានគេមើលឃើញថា កំពុងបន្តឡើងថ្លៃទៀតក្នុងថ្ងៃនេះធៀបទៅ នឹងរូបិយប័ណ្ណនានាដែលត្រូវបានជួញដូរនៅ លើទីផ្សារអន្តរជាតិ ដោយសារតែមានក្តីសង្ឃឹមទៅលើរដ្ឋបាលលោក Donald Trump ក្នុងកម្មវិធីគោលនយោបាយអភិវឌ្ឍជាតិរបស់លោក។

សន្ទស្សន៍ជួញដូរប្រាក់ដុល្លារធៀបទៅនឹងរូបិយប័ណ្ណទាំង៦ បានស្ថិតនៅទីតាំងតម្លៃ ៩៣,៤១៤ បន្ទាប់ពីបានហក់ឡើងខ្ពស់ដល់តម្លៃ ៩៣,៦០៧ ម្តងរួចមកហើយកាលពីថ្ងៃម្សិលមិញ។ តម្លៃនេះគឺជាតម្លៃឡើងថ្លៃដ៏ខ្ពស់បំផុតមិនធ្លាប់មានគិតចាប់តាំងពីថ្ងៃទី ២៣ សីហាមក ដែលជាហេតុធ្វើឲ្យរូបិយប័ណ្ណមួយនេះឡើងថ្លៃបាន ១,៣% នៅក្នុងសប្តាហ៍ នេះ។

កាលពីថ្ងៃពុធម្សិលមិញ លោកប្រធានាធិបតីអាមេរិក Donald Trump បានដាក់សំណើលើកម្មវិធីកំណែទម្រង់ពន្ធដារដ៏ធំបំផុតរបស់មហាអំណាចមួយនេះដែលមិនធ្លាប់មាននោះឡើយនៅក្នុងរយៈពេល៣ទសវត្សរ៍កន្លងមកសម្រាប់ជួយកាត់បន្ថយការបង់ពន្ធដល់ពលរដ្ឋរបស់ខ្លួនភាគច្រើន។ ប៉ុន្តែសំណើរបស់លោកបានជំរុញឱ្យមានការរិះគន់ថា ផែនការនេះនឹងជួយដល់អ្នកមាន និងក្រុមហ៊ុនធំៗ ទៅវិញទេ ហើយវានឹងអាចបន្ថែមបន្ទុកឲ្យខាតបង់ប្រាក់ចំណូលជាតិរាប់ពាន់លានដុល្លារ។

ការបង្ហាញផែនការពន្ធរួមគ្នាជាមួយនឹងទិន្នន័យសុទិដ្ឋិនិយមស្ដីពីការបញ្ជាទិញទំនិញប្រើប្រាស់ជាលក្ខណៈយូរអង្វែងទៅមុខទៀតរបស់អាមេរិក បានជួយគាំទ្រដល់ទីផ្សារប្រាក់ដុល្លារ ខណៈដែលទីផ្សារជួញដូរមានការរំពឹងទុកឡើងវិញថា ធនាគារកណ្តាលរបស់ខ្លួន នឹងដំឡើងអត្រាការប្រាក់ម្តងទៀតនៅចុងឆ្នាំនេះ។

ងាកមកមើលការជួញដូរប្រាក់ដុល្លារធៀបទៅនឹងលុយយ៉េនរបស់ជប៉ុនវិញ ត្រូវបានជួញដូរក្នុងតម្លៃ ១១២,៨២ យ៉េនក្នុងមួយដុល្លារនៅថ្ងៃនេះបន្ទាប់ពីបានឡើងថ្លៃដល់ ១១៣,២៦ យ៉េនម្តងរួចមកហើយកាលពី ថ្ងៃពុធម្សិលមិញ ដែលជាការឡើងថ្លៃដ៏ខ្ពស់បំផុតមិនធ្លាប់មាននៅក្នុងរយៈពេលជាង២ខែកន្លងមកនេះ។

ចំណែកការជួញដូរប្រាក់អឺរ៉ូ បានងើបឡើងបន្តិចវិញក្នុងថ្ងៃនេះ ត្រូវបានជួញដូរក្នុងតម្លៃ ១,១៧៤៨ ដុល្លារ បន្ទាប់ពីបានធ្លាក់ថ្លៃដល់តម្លៃ ១,១៧១៧ ដុល្លារកាលពីថ្ងៃពុធម្សិលមិញ ដែលជាការជួញដូរក្នុងតម្លៃទាបបំផុតមិនធ្លាប់មាននៅ ក្នុងរយៈពេលជាង ១ ខែមកនេះ។ ការធ្លាក់ថ្លៃនៅក្នុងសប្តាហ៍នេះ គឺដោយសារតែអ្នកជួញដូរមានការព្រួយបារម្ភទៅនឹងស្ថានការណ៍បោះឆ្នោតនៅអាល្លឺម៉ង់កាលពីចុងសប្តាហ៍កន្លងទៅ។

នៅនូវែលហ្សេឡង់ឯណោះវិញ កាលពីថ្ងៃព្រហស្បតិ៍ម្សិលមិញ ធនាគារកណ្តាលរបស់ខ្លួនបានសម្រេចរក្សាអត្រាការប្រាក់ឲ្យនៅដដែលក្នុងអត្រាទាបបំផុត ១,៧៥% ហើយនៅតែប្រកាន់ខ្ជាប់គោលជំហរអព្យាក្រឹតរបស់ខ្លួនប្រឆាំងទៅនឹងភាពមិនច្បាស់លាស់នៃបរិបទនយោបាយ បន្ទាប់ពីមានការបោះឆ្នោតជាតិដ៏ចម្រូងចម្រាសមួយកាលពីពេលថ្មីៗកន្លងទៅ៕

ប្រភព៖ cnbc