Tuesday, September 5, 2017

Home Financial News ផ្សារភាគហ៊ុនអាស៊ីកំពុងប្រុងប្រយ័ត្នខ្លាំងក្រោយធ្លាក់ថ្លៃកាលពីម្សិលមិញ

ផ្សារភាគហ៊ុនអាស៊ីកំពុងប្រុងប្រយ័ត្នខ្លាំងក្រោយធ្លាក់ថ្លៃកាលពីម្សិលមិញ

ការជួញដូរនៅលើផ្សារភាគហ៊ុនអាស៊ីព្រឹកនេះកំពុងមានការប្រុងប្រយ័ត្នខ្លាំងបន្ទាប់ពីមានសម្ពាធច្រើនកាលពីថ្ងៃច័ន្ទម្សិលមិញនៅពេលដែលអ្នកជួញដូរផ្តោតលើភាពតានតឹងនៅក្នុងភូមិសាស្ត្រនយោបាយនៅក្នុងតំបន់ឧបទ្វីបកូរ៉េ។

សន្ទស្សន៍ជួញដូរផ្សារភាគហ៊ុន Nikkei 225 បានធ្លាក់ថ្លៃអស់ ០,២៦% ខណៈដែលសន្ទស្សន៍ជួញដូរផ្សារភាគហ៊ុនកូរ៉េខាងត្បូង Kospi បានត្រឡប់ធ្លាក់ថ្លៃ បន្តិចមកវិញអស់ ០,០៣% បន្ទាប់ពីបានធ្លាក់ថ្លៃអស់ច្រើនជាង ១% កាលពីថ្ងៃម្សិលមិញនៅពេលវិបត្តិឧបទ្វីបកូរ៉េកើនកំដៅឡើងវិញ។

ងាកទៅមើលសន្ទស្សន៍ជួញដូរផ្សារភាគហ៊ុនអូស្ត្រាលី S&P/ASX 200 ក៏បានធ្លាក់ថ្លៃដែរក្នុងចំនួន ០,៣៣% ដោយបានទាញទម្លាក់ដោយភាគហ៊ុនរបស់ក្រុមហ៊ុនថាមពល និងក្រុមហ៊ុនលក់រាយផ្សេងៗទៀត។ ចំណែកភាគហ៊ុនរបស់បណ្តាក្រុមហ៊ុនធនាគារធំៗក៏សុទ្ធតែបានធ្លាក់ថ្លៃដែរក្នុងចំនួនចាប់ពី ០,៤៧% ឡើងទៅ។

យ៉ាងណាមិញ ងាកមកមើលទីផ្សារជួញដូរភាគហ៊ុនរបស់ចិនវិញ បានស្ថិតនៅក្នុងសញ្ញាណវិជ្ជមានទាំងអស់។ ក្នុងនោះសន្ទស្សន៍ជួញដូរផ្សារភាគហ៊ុនហុងកុង Hang Seng បានឡើងថ្លៃចំនួន ០,៣៩% ខណៈដែលសន្ទស្សន៍ជួញដូរផ្សារភាគហ៊ុនសៀងហៃបានឡើងថ្លៃ ០,១៣% និងសន្ទស្សន៍ជួញដូរផ្សារភាគហ៊ុន Shenzhen បានឡើងថ្លៃចំនួន ០,១២៦%។

ចំណែកការជួញដូរនៅលើទីផ្សារភាគហ៊ុនអាមេរិកនឹងបើកការជួញដូរនៅថ្ងៃនេះឡើងវិញក្រោយបានបិទការជួញដូរមួយថ្ងៃក្នុងថ្ងៃទិវាពលកម្មរបស់ខ្លួនកាលពីថ្ងៃម្សិលមិញ។

ភាពតានតឹងនៅក្នុងតំបន់ឧបទ្វីបកូរ៉េនៅតែស្ថិតក្នុងការតាមដានពីសំណាក់ទីផ្សារអន្តរជាតិបើទោះបីជាទីផ្សារជួញដូរបានស្ទុះឡើងវិញបន្តិចក៏ដោយ។ កាលពីថ្ងៃចន្ទម្សិលមិញ អាមេរិកបានអំពាវនាវឱ្យមានការដាក់ទណ្ឌកម្មដ៏ធ្ងន់ធ្ងរបំផុតទៅលើកូរ៉េខាងជើង ពោលគឺមួយថ្ងៃបន្ទាប់ពីប្រទេសនេះបានសាកល្បងធ្វើតេស្ដអាវុធនុយក្លេអ៊ែរជាថ្មីទៀតកាលពីថ្ងៃអាទិត្យម្សិលមិញ។

បើយោងតាមសារព័ត៌មាន Reuters បានឲ្យដឹងថា លោកប្រធានាធិបតី Donald Trump ក៏បានថ្លែងផងដែរទៅកាន់លោកប្រធានាធិបតីកូរ៉េខាងត្បូង Moon Jae-in តាមប្រព័ន្ធទូរស័ព្ទនៅអំឡុងពេលស្ថានភាពតានតឹងបានកើតមានឡើងវិញ។ ជាមួយគ្នានោះ លោក Trump បានយល់ព្រមឲ្យកូរ៉េខាងត្បូងទិញអាវុធបន្ថែមទៀតក្នុងតម្លៃរាប់ពាន់លានដុល្លារពីអាមេរិកសម្រាប់គោលនយោបាយការពារជាតិនៅពេលខាងមុខ។

យោងតាមសារព័ត៌មាន Yonhapបានឲ្យដឹងដែរថា កូរ៉េខាងត្បូងបានមើលឃើញថា កូរ៉េខាងជើងគ្រោងនឹងសាកល្បងបាញ់មីស៊ីលអន្តរទ្វីបជាថ្មីទៀតនៅពេលឆាប់ៗខាងមុខ។ យ៉ាងណាក៏ដោយ រដ្ឋាភិបាលទីក្រុងសេអ៊ូលបានដំឡើងរួចហើយនៅខែលមីស៊ីលទប់ទល់ទៅនឹងការវាយប្រហារណាមួយចេញពីកូរ៉េខាងជើង ដែលជាសកម្មភាពមួយធ្វើរដ្ឋាភិបាលចិនខឹងសម្បា៕

ប្រភព៖ cnbc