Friday, September 15, 2017

Home Financial News ការសាកល្បងបាញ់មីស៊ីលជាថ្មីរបស់កូរ៉េខាងជើងបានធ្វើឲ្យទីផ្សារភាគហ៊ុនអាស៊ីរងសម្ពាធ

ការសាកល្បងបាញ់មីស៊ីលជាថ្មីរបស់កូរ៉េខាងជើងបានធ្វើឲ្យទីផ្សារភាគហ៊ុនអាស៊ីរងសម្ពាធ

ស្ថានភាពជួញដូរនៅលើផ្សារភាគហ៊ុនអាស៊ីព្រឹកនេះបានធ្លាក់ថ្លៃបន្ទាប់ពីមានព័ត៌មាននៃការបាញ់មីស៊ីលជាថ្មីទៀតរបស់កូរ៉េខាងជើងហោះរំលងទឹកដីជប៉ុន ធ្លាក់ចូលក្នុងដែនមហាសមុទ្រប៉ាស៊ីហ្វិក។

សន្ទស្សន៍ជួញដូរនៅលើទីផ្សារភាគហ៊ុនកូរ៉េខាងត្បូង Kospiដែលស្ថិតនៅជាប់នឹងរបងកូរ៉េខាងជើង បានទទួលរងសម្ពាធភ្លាមៗនៅពេលមានដំណឹងនៃការបាញ់មីស៊ីលជាថ្មីរបស់ទីក្រុងព្យុងយ៉ាង ពោលគឺវាបានធ្លាក់ថ្លៃអស់០,៣៦%។ ដំណឹងនេះបានធ្វើឲ្យភាគហ៊ុនក្រុមហ៊ុនបច្ចេកវិទ្យា និងក្រុមហ៊ុនរថយន្តធំៗនៅក្នុងប្រទេសនេះបានធ្លាក់ថ្លៃព្រោងព្រាត បន្ទាប់ពីបានជួញដូរឡើងថ្លៃ កាលពីថ្ងៃម្សិលមិញ។

ចំណែកសន្ទស្សន៍ជួញដូរនៅលើផ្សារភាគហ៊ុនអូស្ត្រាលី S&P/ASX 200 ឯណោះវិញ បានធ្លាក់ថ្លៃដែរក្នុងចំនួន ០,៦២% ដោយក្នុងនោះភាគហ៊ុនរបស់ក្រុមហ៊ុនរ៉ែបានធ្លាក់ថ្លៃខ្ពស់ដល់ទៅ ១,៧%។ ក្រៅពីនោះ ភាគហ៊ុនរបស់ក្រុមហ៊ុនធនាគារ និងក្រុមហ៊ុនលក់រាយផ្សេងៗទៀតក៏ស្ថិតនៅក្នុងសញ្ញាណជួញដូរអវិជ្ជមានដែរ។ ក៏ប៉ុន្តែសន្ទស្សន៍ជួញដូរនៅលើផ្សារភាគហ៊ុនជប៉ុន Nikkei 225 បានឡើងថ្លៃ ០, ១៥% ទៅវិញ។

ត្រឡប់មកមើលសន្ទស្សន៍ជួញដូរផ្សារភាគហ៊ុនចិនវិញ គឺត្រូវបានជួញដូរក្នុងសញ្ញាណអវិជ្ជមានទាំងអស់។ ក្នុងនោះសន្ទស្សន៍ជួញដូរផ្សារភាគហ៊ុន ហុងកុង Hang Seng បានធ្លាក់ថ្លៃអស់ ០,៧% ខណៈដែលសន្ទស្សន៍ជួញដូរផ្សារភាគហ៊ុនចិនដីគោក សៀងហៃ បានធ្លាក់ថ្លៃអស់ ០,៣៦% និង ផ្សារភាគហ៊ុន Shenzhen បានធ្លាក់ថ្លៃ បន្តិចបន្តួចប៉ុណ្ណោះត្រឹម ០,០២៦%។

នៅអាមេរិកវិញ ផ្សារភាគហ៊ុនរបស់ខ្លួនបានបិទបញ្ចប់ការជួញដូរក្នុងតម្លៃឡើងថ្លៃ កាលពីយប់មិញ ពោលគឺផ្សារភាគហ៊ុន Dow Jones បានឡើងថ្លៃ ០,២% ឬ ស្មើនឹង ៤៥,៣ ចំណុច។ ក៏ប៉ុន្តែ ផ្សារភាគហ៊ុន Nasdaqបានធ្លាក់ថ្លៃអស់ ០,៤៨%។

ទោះបីជាបែបនេះក្តី អ្នកជួញដូរកំពុងរីករាយទៅនឹងទិន្នន័យថ្លៃទំនិញប្រើប្រាស់នៅអាមេរិកដែលបានបង្ហាញថា វាមានកំណើនខ្ពស់ជាងការរំពឹងទុកនៅក្នុងខែសីហាកន្លងទៅនេះ ពោលគឺមានកំណើន ០,៤%។ ចំនួននេះខ្ពស់ជាងការព្យាករណ៍ធ្វើឡើងដោយសារព័ត៌មាន Reuters ដែលថា វាអាចមានកំណើនក្នុងអត្រាត្រឹមតែ ០,៣% ប៉ុណ្ណោះ។ សុទិដ្ឋិនិយមនៃរបាយការណ៍នេះនាំឲ្យមានការព្យាករណ៍ថា ធនាគារកណ្តាលអាមេរិកទំនងអាចដំឡើងអត្រាការប្រាក់ជាថ្មីនៅខែធ្នូចុងឆ្នាំខាងមុខ។

ត្រឡប់ទៅមើលភូមិសាស្ត្រនយោបាយនៅក្នុងតំបន់ឧបទ្វីបកូរ៉េវិញ យោងតាមការចេញផ្សាយរបស់សារព័ត៌មាន Reuters បានឲ្យដឹងថា មីស៊ីលមិនស្គាល់អត្តសញ្ញាណមួយបានហោះរំលងទឹកដីជប៉ុនមុនពេលវាធ្លាក់ចូលទៅក្នុងមហាសមុទ្រប៉ាស៊ីហ្វិកដែលនៅចម្ងាយប្រមាណ ២ ០០០ គីឡូម៉ែត្រភាគខាងកើតកោះ ហុកកៃដូ។ ជាការឆ្លើយតប បន្ទាប់ពីមានការបាញ់មីស៊ីលរបស់កូរ៉េខាងជើងខាងលើនេះ កូរ៉េខាងត្បូងឯណេះវិញក៏បានបាញ់មីស៊ីលរបស់ខ្លួនភ្លាមៗផងដែរចូលទៅក្នុងសមុទ្រជាប់ព្រំដែនកូរ៉េខាងជើង៕

ប្រភព៖ cnbc