Friday, September 15, 2017

Home Financial News លុយយ៉េន និង ហ្រ្វង់ស្វីសឡើងថ្លៃភ្លាមក្រោយកូរ៉េខាងជើងបាញ់មីស៊ីលជាថ្មីនៅព្រឹកនេះ

លុយយ៉េន និង ហ្រ្វង់ស្វីសឡើងថ្លៃភ្លាមក្រោយកូរ៉េខាងជើងបាញ់មីស៊ីលជាថ្មីនៅព្រឹកនេះ

ការជួញដូរប្រាក់យ៉េនរបស់ជប៉ុន និង ហ្រ្វង់ស្វីសរបស់ស្វីសបានហក់ឡើងថ្លៃភ្លាមៗបន្ទាប់ពីមានដំណឹងថា កូរ៉េខាងជើងបានសាកល្បងបាញ់មីស៊ីលជាថ្មីទៀតនៅព្រឹកថ្ងៃសុក្រនេះ ដោយបានហោះរំលងទឹកដីជប៉ុនទៅធ្លាក់នៅក្នុងដែនមហាសមុទ្រប៉ាស៊ីហ្វិក។

ទីផ្សារប្រាក់ដុល្លារដែលទើបនឹងមានសង្ឃឹមរើបៗនៅក្នុងរយៈពេលប៉ុន្មានថ្ងៃកន្លងទៅនៅសប្តាហ៍នេះ បែរជាធ្លាក់ថ្លៃវិញភ្លាមៗ ហើយត្រូវបានជួញដូរក្នុងតម្លៃ ១០៩,៥៥ យ៉េនក្នុងមួយដុល្លារ។ តម្លៃនេះទាបជាងតម្លៃជួញដូរកាលពី ថ្ងៃម្សិលមិញ ដែលវាបានហក់ឡើងដល់តម្លៃ ១១០,០៥ យ៉េនក្នុងមួយដុល្លារនៅលើទីផ្សារអាមេរិក។

ការជួញដូរប្រាក់ដុល្លារក៏ធ្លាក់ថ្លៃផងដែរបើធៀបទៅនឹងលុយហ្រ្វង់ស្វីសរបស់ស្វីស ពោលគឺបានធ្លាក់ថ្លៃអស់០,២% ត្រូវបានជួញដូរក្នុងតម្លៃ ០,៩៦២១ ហ្វ្រង់ស្វីសក្នុងមួយដុល្លារ។

ជាទូទៅលុយយ៉េន និង ហ្វ្រង់ស្វីសឡើងថ្លៃនៅពេលដែលស្ថានភាពភូមិសាស្ត្រនយោបាយអន្តរជាតិមិនអំណោយផងតួយ៉ាងដូចជាការសាកល្បងបាញ់មីស៊ីលរបស់កូរ៉េខាងជើងជាដើម។ នេះក៏ដោយសារតែរូបិយប័ណ្ណទាំងនេះត្រូវបានជ្រើសទុកជួញដូរតទាល់ទៅនឹងស្ថានភាពខាតបង់ ខណៈជប៉ុនគឺជាម្ចាស់បំណុលដ៏ធំបំផុតមួយនៅលើពិភពលោក។

សូមបញ្ជាក់ថា នៅព្រឹកថ្ងៃសុក្រនេះ មីស៊ីលមួយគ្រាប់របស់កូរ៉េខាងជើងបានហោះរំលងទឹកដីជប៉ុននៅភាគខាងជើងដែនកោះ Hokkaido ហើយបានបន្តទៅធ្លាក់នៅដែនសមុទ្រប៉ាស៊ីហ្វិក។ នេះបើយោងតាមសេចក្តីរាយការណ៍របស់មន្រ្តីជាន់ខ្ពស់របស់ជប៉ុន និងកូរ៉េខាងត្បូង ពោលគឺត្រឹមតែប៉ុន្មានសប្តាហ៍ប៉ុណ្ណោះ បន្ទាប់ពីខ្លួនបានធ្វើតេស្តសាកល្បងអាវុធនុយក្លេអ៊ែរម្តងរួចមកហើយកាលពីពេលថ្មីៗកន្លងទៅ៕

ប្រភព៖ cnbc