ព្រឹកនេះស្ថានភាពទីផ្សារភាគហ៊ុនអាស៊ីយ៉ាងម៉េចដែរ?

ការជួញដូរនៅលើទីផ្សារភាគហ៊ុនអាស៊ីព្រឹកនេះបានធ្លាក់ថ្លៃច្រើន តាមពីក្រោយផ្សារភាគហ៊ុន Wall Street របស់អាមេរិក ខណៈដែលអ្នកជួញដូរនៅតែមានការបារម្ភទៅនឹងស្ថានភាពភូមិសាស្ត្រនយោបាយនៅក្នុងតំបន់ឧបទ្វីបកូរ៉េនៅឡើយ។

សន្ទស្សន៍ជួញដូរនៅលើផ្សារភាគហ៊ុនជប៉ុន Nikkei 225 បានធ្លាក់ថ្លៃអស់ ០,៣% ខណៈដែលប្រាក់ដុល្លារកំពុងមានសម្ពាធ និង ការឡើងថ្លៃរបស់លុយយ៉េន។ ចំណែកសន្ទស្សន៍ជួញដូរផ្សារភាគហ៊ុនកូរ៉េខាងត្បូង Kospi ក៏បានធ្លាក់ថ្លៃដែរអស់ ០,២៨% ជុំវិញការបារម្ភទៅនឹងស្ថានភាពនយោបាយនៅក្នុងតំបន់។

ងាកទៅមើលសន្ទស្សន៍ជួញដូរផ្សារភាគហ៊ុន អូស្ត្រាលី S&P/ASX 200 វិញបានធ្លាក់ថ្លៃដែរអស់ចំនួន ០,២៤% ដែលក្នុងនោះភាគហ៊ុនរបស់ក្រុមហ៊ុនហិរញ្ញវត្ថុធំៗបានធ្លាក់ថ្លៃខ្ពស់ជាងគេរហូតដល់ទៅ ១,០៧%។ ចំណែកភាគហ៊ុនរបស់ក្រុមហ៊ុនថាមពល និង ក្រុមហ៊ុនមាសមិនមានការប្រែប្រួលឡើងចុះនោះឡើយ ស្របពេលដែលទីផ្សារមាសកំពុងឡើងថ្លៃនៅសប្តាហ៍នេះ។

ការជួញដូរនៅលើទីផ្សារភាគហ៊ុនចិនវិញ ក៏ទទួលរងសម្ពាធធ្លាក់ថ្លៃដែរថ្ងៃនេះ។ សន្ទស្សន៍ជួញដូរនៅលើផ្សារភាគហ៊ុន ហុងកុង Hang Seng បានធ្លាក់ថ្លៃដល់ទៅ ០,៨៨% ខណៈដែលសន្ទស្សន៍ជួញដូរផ្សារភាគហ៊ុនចិនដីគោកគឺផ្សារភាគហ៊ុនសៀងហៃបានធ្លាក់ថ្លៃអស់ ០,៤៤% និង ផ្សារភាគហ៊ុន Shenzhen បានធ្លាក់ថ្លៃអស់ ០,២២៣%។

ការធ្លាក់ថ្លៃនៅលើផ្សារភាគហ៊ុនអាស៊ីគឺកើតមានឡើងដោយសារតែសម្ពាធនយោបាយនៅក្នុងតំបន់ឧបទ្វីបកូរ៉េនៅតែបន្តវត្តមាននៅឡើយ ទន្ទឹមនឹងការព្រមានធ្ងន់ៗរបស់ប្រមុខការទូតកូរ៉េខាងជើងកាលពីថ្ងៃច័ន្ទថា នឹងផ្តល់រង្វាន់ដ៏ជូរចត់មួយទៅអាមេរិកប្រសិនបើមហាអំណាចមួយនេះហ៊ានដាក់ទណ្ឌកម្មសេដ្ឋកិច្ចជាថ្មីទៀតដល់ទីក្រុងព្យុងយ៉ាង។ ជាមួយគ្នានេះ កូរ៉េខាងត្បូងលើកឡើងថា កូរ៉េខាងជើងទំនងនឹងធ្វើតេស្តមីស៊ីលជាថ្មីទៀតនៅពេលណាមួយក្នុងពេលឆាប់ៗខាងមុខ។

ទីផ្សារជួញដូរក៏កំពុងផ្តោតផងដែរលើសារចេញទេសាភិបាលធនាគារកណ្តាលអាមេរិកលោក Lael Brainard ដែលបានថ្លែងកាលពីម្សិលមិញថា កំណើនអតិផរណាមិនទាន់មានកំណើនស្របទៅតាមគោលដៅរបស់ធនាគារកណ្តាលនៅឡើយទេ។ លោកបានបន្ថែមថា ដូច្នេះ ស្ថាប័ននេះនៅមានការប្រុងប្រយ័ត្ននៅឡើយមុននឹងសម្រេចចិត្តដំឡើងអត្រាការប្រាក់ជាថ្មីម្តងទៀតនៅចុងឆ្នាំនេះ។

សារខាងលើនេះហើយដែលបានធ្វើឲ្យអ្នកវិភាគនានាយល់ឃើញថា ធនាគារកណ្តាលអាមេរិកហាក់មិនមានភាពប្រាកដប្រជានៅឡើយក្នុងការសម្រេចចិត្តដំឡើងអត្រាការប្រាក់របស់ខ្លួន។ កាលពីពេលថ្មីៗកន្លងទៅ សមាជិកគណៈកម្មការ របស់ធនាគារកណ្តាលក៏បានស្នើឲ្យមានការពន្យារពេលលើការដំឡើងអត្រាការប្រាក់នេះផងដែរ ដោយរង់ចាំមើលលទ្ធផលកំណើនអតិផរណាជាមុនសិន។

សញ្ញាណមិនល្អទាំងនេះបានរុញច្រានឲ្យទីផ្សារភាគហ៊ុនអាមេរិកបានបិទបញ្ចប់ការជួញដូរក្នុងស្ថានភាពសោះកក្រោះនៅក្រោយថ្ងៃឈប់សម្រាកទិវាពលកម្មប្រចាំឆ្នាំកាលពីថ្ងៃច័ន្ទកន្លងទៅ ជាពិសេសផ្សារភាគហ៊ុន Dow Jones ដែលបានធ្លាក់ថ្លៃដល់ទៅ ១,០៧%។

ទាក់ទងទៅនឹងព័ត៌មានសេដ្ឋកិច្ចរបស់អូស្ត្រាលីវិញ កំណើន GDP ប្រចាំត្រីមាសទី២ឆ្នាំ ២០១៧នេះ បានបង្ហាញ លទ្ធផលជាវិជ្ជមានក្នុងកំណើន ១,៨% ធៀបទៅនឹងរយៈពេលដូចគ្នានេះកាលពីឆ្នាំទៅ។ កំណើននេះខ្ពស់ជាងការព្យាករណ៍របស់សារព័ត៌មាន Reuters ដែលថា វាមានត្រឹមតែ ១,៩% ប៉ុណ្ណោះ ហើយជាសញ្ញាណល្អមួយកំពុងជួយឲ្យប្រាក់ដុល្លាររបស់ខ្លួនត្រូវបានជួញដូរក្នុងតម្លៃឡើងថ្លៃខ្ពស់ជាងមុននៅព្រឹកនេះ៕

ប្រភព៖ cnbc