Thursday, September 14, 2017

Home Financial News ផ្សារភាគហ៊ុនអាស៊ីស្ងប់ស្ងាត់បន្តិច ក្រោយទិន្នន័យផលិតកម្មចិនមានកំណើនទាបជាងការរំពឹងទុក

ផ្សារភាគហ៊ុនអាស៊ីស្ងប់ស្ងាត់បន្តិច ក្រោយទិន្នន័យផលិតកម្មចិនមានកំណើនទាបជាងការរំពឹងទុក

ការជួញដូរនៅលើទីផ្សារភាគហ៊ុនធំៗរបស់អាស៊ីនៅព្រឹកនេះមិនមានការប្រែប្រួលខ្លាំងនោះឡើយ បន្ទាប់ពីអ្នកជួញដូរមានការខកចិត្តទៅនឹងរបាយការណ៍ចេញផ្សាយនៃទិន្នន័យផលិតកម្មចិននៅព្រឹកនេះបានបង្ហាញថា វាមានកំណើនទាបជាងការរំពឹងទុក។

សន្ទស្សន៍ជួញដូរផ្សារភាគហ៊ុនជប៉ុន Nikkei 225 បានធ្លាក់ចុះ បន្តិចអស់ចំនួន ០,០៣% បន្ទាប់ពីបានឡើងថ្លៃជាប់ៗគ្នាអស់រយៈពេល៣ថ្ងៃជាប់ៗគ្នា។ នៅកូរ៉េខាងត្បូង សន្ទស្សន៍ជួញដូរផ្សារភាគហ៊ុន Kospi របស់ខ្លួនបានឡើងថ្លៃបន្តិចបន្តួចប៉ុណ្ណោះត្រឹម ០,០៤% ខណៈដែលភាគហ៊ុនរបស់ក្រុមហ៊ុនបច្ចេកវិទ្យា ប្រេង និងលក់រាយបានធ្លាក់ចុះច្រើន។

នៅអូស្ត្រាលីវិញ សន្ទស្សន៍ជួញដូរផ្សារភាគហ៊ុន S&P/ASX 200 បានធ្លាក់ថ្លៃអស់ ០,១៩% ដោយសារតែភាគហ៊ុនរបស់ក្រុមហ៊ុនផលិតកម្ម លក់រាយ និង ធនាគារបានធ្លាក់ថ្លៃឡើងទៅមុខមិនរួច។ រីឯសន្ទស្សន៍ជួញដូរផ្សារភាគហ៊ុនចិន បានធ្លាក់ថ្លៃ ខ្លាំងដល់តម្លៃ ០,៣៩% សម្រាប់ផ្សារភាគហ៊ុនហុងកុង ០,១% សម្រាប់ផ្សារភាគហ៊ុនសៀងហៃ និង ០,១២៦% សម្រាប់ផ្សារភាគហ៊ុន Shenzhen។

យោងតាមទិន្នន័យនៅព្រឹកមិញដែលបានចេញផ្សាយជាសាធារណៈបានបង្ហាញថា កំណើនផលិតកម្មចិនបានកើនឡើងត្រឹមតែ ៦% ប៉ុណ្ណោះធៀបទៅនឹងរយៈពេលដូចគ្នានេះកាលពីឆ្នាំទៅ។ កំណើននេះទាបជាងការរំពឹងទុកដែលថា វាអាចមានកំណើនដល់ទៅ ៦,៦% នេះបើយោងតាមការប្រជាមតិរបស់សារព័ត៌មាន Reuters។ រីឯការលក់រាយក៏មិនបានមានកំណើនដល់គោលដៅ ១០,៥% ដែរ ពោលគឺមានកំណើនត្រឹមតែ ១០,១% ប៉ុណ្ណោះ។

ទិន្នន័យខាងលើនេះបានធ្វើឲ្យការជួញដូរប្រាក់ដុល្លារអូស្ត្រាលីធ្លាក់ថ្លៃដែរ ដោយត្រូវបានជួញដូរក្នុងតម្លៃ ០,៧៩៩៧ ដុល្លារបន្ទាប់ពីបានហក់ឡើងថ្លៃដល់តម្លៃ ០,៨០១៦ ដុល្លារកាលពីម្សិលមិញ។ ជាធម្មតាការជួញដូរប្រាក់ដុល្លារឡើងឬចុះគឺអាស្រ័យលើទិន្នន័យសេដ្ឋកិច្ចចិន ព្រោះថាចិនជាទីផ្សារនាំចេញធំបំផុតមួយរបស់អូស្ត្រាលី។

ងាកទៅមើលការជួញដូរនៅលើផ្សារភាគហ៊ុនអាមេរិកវិញ បានបិទការជួញដូរក្នុងតម្លៃបំបែកកំណត់ត្រាដដែលបើទោះបីជាវាមិនបានឡើងថ្លៃច្រើនកាលពីយប់មិញក៏ដោយ ដោយក្នុងនោះ ផ្សារភាគហ៊ុន Dow Jones បានឡើងថ្លៃ ០,១៨%។ ការឡើងថ្លៃនេះបានកើនមានឡើងនៅមុនពេលរបាយការណ៍អតិផរណារបស់ខ្លួនដែលនឹងចេញផ្សាយនៅយប់នេះ៕

ប្រភព៖ cnbc