Tuesday, September 12, 2017

Home Financial News ផ្សារភាគហ៊ុនអាស៊ីភាគច្រើនឡើងថ្លៃ ក្រោយស្ថានភាពនយោបាយល្អប្រសើរឡើងវិញ

ផ្សារភាគហ៊ុនអាស៊ីភាគច្រើនឡើងថ្លៃ ក្រោយស្ថានភាពនយោបាយល្អប្រសើរឡើងវិញ

នៅថ្ងៃនេះការជួញដូរនៅលើទីផ្សារភាគហ៊ុនអាស៊ីភាគច្រើនត្រូវបានគេមើលឃើញថា ស្ថិតនៅក្នុងសញ្ញាណវិជ្ជមាន តាមពីក្រោយផ្សារភាគហ៊ុន Wall Street របស់អាមេរិកដែលបានបិទបញ្ចប់ក្នុងទិសដៅវិជ្ជមាន ខណៈការបារម្ភទៅនឹងវិបត្តិនយោបាយក្នុងឧបទ្វីបកូរ៉េ និង ព្យុះ Irma របស់អ្នកជួញដូរបានធូរស្រាលឡើងវិញ។

ផ្សារភាគហ៊ុនដែលឡើងថ្លៃ មុនគេនោះ គឺសន្ទស្សន៍ជួញដូរផ្សារភាគហ៊ុនជប៉ុន Nikkei 225 ដែលបានឡើងថ្លៃ ១% ខណៈដែលទីផ្សារប្រាក់ដុល្លារបានឡើងថ្លៃកាលពីយប់មិញ ធៀបទៅនឹងលុយយ៉េន។ នៅកៀកជប៉ុនដែរ ពោលគឺសន្ទស្សន៍ជួញដូរផ្សារភាគហ៊ុនកូរ៉េខាងត្បូង Kospi បានឡើងថ្លៃ ០,២២%។

ត្រឡប់ទៅមើលសន្ទស្សន៍ ជួញដូរផ្សារភាគហ៊ុនអូស្រ្តាលី S&P/ASX 200 វិញ បានឡើងថ្លៃខ្ពស់ដែរដល់ ០,៧៣% ដោយក្នុងនោះភាគហ៊ុនរបស់ក្រុមហ៊ុនធំៗបានឡើងថ្លៃដែរ។ ភាគហ៊ុនដែលឡើងថ្លៃខ្ពស់ជាងគេ គឺភាគហ៊ុនរបស់ក្រុមហ៊ុនហិរញ្ញវត្ថុធំៗ ដែលបានឡើងថ្លៃដល់ទៅ ១,៥៧% ។

រីឯទីផ្សារភាគហ៊ុនចិនវិញ ត្រូវបានជួញដូរឡើងចុះ មិនស្របគ្នានោះទេ។ ក្នុងនោះសន្ទស្សន៍ជួញដូរផ្សារភាគហ៊ុនហុងកុង Hang Seng បានធ្លាក់ថ្លៃអស់ ០,០៨% ខណៈដែលសន្ទស្សន៍ជួញដូរផ្សារភាគហ៊ុន សៀងហៃ បានឡើងថ្លៃបន្តិចបន្តួចត្រឹមតែ ០,០៣%។ ចំពោះសន្ទស្សន៍ជួញដូរផ្សារភាគហ៊ុន Shenzhen ស្ទើរតែមិនប្រែប្រួលសោះដោយបានធ្លាក់ថ្លៃត្រឹមតែ ០,០១១។

កាលពីយប់មិញ សន្ទស្សន៍ជួញដូរផ្សារភាគហ៊ុន Wall Street របស់អាមេរិកបានបិទការជួញដូរក្នុងតម្លៃឡើងថ្លៃនៅពេលដែលអ្នកជួញដូរនានាមានអារម្មណ៍ធូរស្បើយពីស្ថានការណ៍នយោបាយដ៏តានតឹងនៅតំបន់ឧបទ្វីបកូរ៉េ និង គ្រោះមហន្តរាយព្យុះ Irma ដែលបានបំផ្លិចបំផ្លាញប្រព័ន្ធហេដ្ឋារចនាសម្ព័ន្ធនានារបស់អាមេរិក និង នៅតំបន់ការ៉ាប៊ីន។

យ៉ាងណាមិញ អ្នកជួញដូរនៅលើទីផ្សារអន្តរជាតិកំពុងតាមដានជាថ្មីទៀតលើការដាក់ទណ្ឌកម្មសេដ្ឋកិច្ចរបស់ក្រុមប្រឹក្សាអង្គការសហប្រជាជាតិទៅលើរដ្ឋាភិបាលកូរ៉េខាងជើងកាលពីម្សិលមិញបន្ទាប់ពីខ្លួនបានធ្វើតេស្តសាកល្បងអាវុធនុយក្លេអ៊ែរជាលើកទី៦កាលពីពេលថ្មីៗកន្លងទៅ។ ទណ្ឌកម្មថ្មីនេះបូករួមបញ្ចូលទាំងការកំណត់លើទំហំនាំចូលប្រេងសាំងដោយកូរ៉េខាងជើងផងដែរ នេះបើយោងតាមការចុះផ្សាយរបស់សារព័ត៌មាន Reuters។

ទំនុកចិត្តនៅលើទីផ្សារអន្តរជាតិនេះ បានជួយជ្រោមជ្រែងឲ្យប្រាក់ដុល្លារមានក្តីសង្ឃឹមឡើងវិញ ជាពិសេសធៀបទៅនឹងលុយយ៉េនរបស់ជប៉ុន។ សន្ទស្សន៍ប្រាក់ដុល្លារធៀបទៅនឹងរូបិយប័ណ្ណសំខាន់ៗចំនួន៦ កំពុងស្ថិតនៅទីតាំង ៩១,៩៤៣ នៅម៉ោង ៩:៤៧ ព្រឹកនេះ បន្ទាប់ពីបានហក់ឡើងថ្លៃខ្លាំងកាលពីយប់មិញ ក្រោយជួញដូរធ្លាក់ថ្លៃដល់តម្លៃទាបបំផុតមិនធ្លាប់មាននៅក្នុងរយៈពេល១០ខែកន្លងទៅកាលពី ថ្ងៃសុក្រសប្តាហ៍មុន។

កាលពីម្សិលមិញនេះផងដែរ ធនាគារកណ្តាលរបស់ចិន (PBOC) បានកំណត់តម្លៃប្រាក់យន់របស់ខ្លួនឱ្យទាបជាងតម្លៃ ៦,៥២៧៧ យន់ក្នុងមួយដុល្លារ ដោយបានបំបែកកំណត់ត្រាឡើងថ្លៃអស់រយៈពេល១១ថ្ងៃជាប់ៗគ្នារបស់វា។ ស្ថាប័ននេះ ថែមទាំងបានអនុញ្ញាតឱ្យតម្លៃលុយយន់ធៀបនឹងប្រាក់ដុល្លារកើនឡើង ឬធ្លាក់ចុះរហូតដល់ ២% ធៀបទៅនឹងតម្លៃគោលនេះ។ ការសម្រេចចិត្តនេះបានធ្វើឡើងបន្ទាប់ពីធនាគារកណ្តាលខាងលើបានរៀបចំវិធានការមួយចំនួនដើម្បីគាំទ្ររូបិយប័ណ្ណរបស់ខ្លួន៕

ប្រភព៖ cnbc