ផ្សារភាគហ៊ុនអាស៊ីកំពុងរងសម្ពាធថ្ងៃនេះ

ស្របពេលទីផ្សារមាស និងប្រាក់យ៉េនជប៉ុនកំពុងឡើងថ្លៃ ការជួញដូរនៅលើទីផ្សារភាគហ៊ុនឯណេះវិញ កំពុងរងសម្ពាធខ្លាំងជុំវិញភាពតានតឹងឡើងវិញនៃភូមិសាស្ត្រនយោបាយឧបទ្វីបកូរ៉េ បន្ទាប់ពីប្រទេសនេះបានសាកល្បងធ្វើតេស្តអាវុធនុយក្លេអ៊ែរជាថ្មីទៀតកាលពីថ្ងៃអាទិត្យម្សិលមិញ។

ការជួញដូរនៅលើសន្ទស្សន៍ជួញដូរផ្សារភាគហ៊ុនជប៉ុន Nikkei 225 បានធ្លាក់ថ្លៃអស់ ០,៨៣% ខណៈដែលសន្ទស្សន៍ជួញដូរផ្សារភាគហ៊ុនកូរ៉េខាងត្បូង Kospi បានធ្លាក់ថ្លៃទាបជាងបន្តិចអស់ ០,៦២%។ ការធ្លាក់ថ្លៃនៃផ្សារភាគហ៊ុនកូរ៉េខាងត្បូងបានធ្លាក់ថ្លៃ ភ្លាមៗក្រោយកូរ៉េខាងជើងធ្វើតេស្ដអាវុធនុយក្លេអ៊ែរ។

ងាកទៅមើលសន្ទស្សន៍ជួញដូរផ្សារភាគហ៊ុនអូស្ត្រាលី S&P/ASX 200 បានធ្លាក់ថ្លៃអស់ ០,៣១% ដោយក្នុងនោះភាគហ៊ុនរបស់ក្រុមហ៊ុនមកពីវិស័យផ្សេងៗសុទ្ធតែបានធ្លាក់ថ្លៃដូចគ្នា។ ភាគហ៊ុនដែលធ្លាក់ថ្លៃជាងគេគឺភាគហ៊ុនរបស់ក្រុមហ៊ុនហិរញ្ញវត្ថុដែលបានធ្លាក់ថ្លៃអស់ ០,៤៦% ប៉ុន្តែភាគហ៊ុនរបស់ក្រុមហ៊ុនរ៉ែមាសបានឡើងថ្លៃ នៅពេលដែលទីផ្សារមាសកំពុងឡើងថ្លៃខ្លាំង។

ត្រឡប់ទៅមើលសន្ទស្សន៍ផ្សារភាគហ៊ុនចិនវិញ មានការឡើងចុះមិនស្របគ្នា នៅពេលស្ថានភាពនយោបាយនៅឧបទ្វីបកូរ៉េកើនឡើងកម្តៅឡើងវិញ។ សន្ទស្សន៍ជួញដូរផ្សារភាគហ៊ុនហុងកុង Hang Seng បានធ្លាក់ថ្លៃអស់ ០,៣៥% ខណៈដែលសន្ទស្សន៍ផ្សារភាគហ៊ុនសៀងហៃបានឡើងថ្លៃ ០,២% និង សន្ទស្សន៍ផ្សារភាគហ៊ុន Shenzhen បានឡើងថ្លៃ ០,១៨៤%។

ពាក់ព័ន្ធទៅនឹងស្ថានការណ៍នយោបាយនៅឧបទ្វីបកូរ៉េ កូរ៉េខាងជើងបានអះអាងកាលពីថ្ងៃអាទិត្យថា ខ្លួនបានធ្វើតេស្តសាកល្បងគ្រាប់បែកអ៊ីដ្រូសែដ៏ខ្លាំងក្លាមួយអាចបំពាក់លើក្បាលគ្រាប់នុយក្លេអ៊ែរក្នុងរយៈចម្ងាយបាន។ ការសាកល្បងនូវអ្វីដែលរដ្ឋាភិបាលទីក្រុងព្យុងយ៉ាងនិយាយថា គឺជាជោគជ័យដ៏ត្រចះត្រចង់បំផុត ត្រូវបានគេវាយតម្លៃថា អាចមានកម្លាំងផ្ទុះដល់ទៅ ១០០ គីឡូតោន នេះបើយោងតាមការចេញផ្សាយរបស់សារព័ត៌មាន Yonhap របស់កូរ៉េខាងត្បូង។

លោក Donald Trump បានចាត់ទុកការធ្វើតេស្តនុយក្លេអ៊ែររបស់កូរ៉េខាងជើងថា គឺមានលក្ខណៈញុះញង់បង្កឲ្យមានសង្គ្រាម និងគ្រោះថ្នាក់បំផុត។ នៅពេលមានសំនួរចោទសួរឡើងថា គួរតែមានអន្តរាគមន៍យោធាឬយ៉ាងណា លោក Trump បាននិយាយថា ត្រូវរង់ចាំមើលស្ថានការណ៍នយោបាយបន្តទៀតសិន ព្រមទាំងបានព្រមានថា អាមេរិកនឹងកាត់ផ្ដាច់ពាណិជ្ជកម្មជាមួយប្រទេសទាំងឡាយណាដែលនៅតែបន្តធ្វើពាណិជ្ជកម្មជាមួយកូរ៉េខាងជើង៕

ប្រភព៖ cnbc