Wednesday, September 27, 2017

Home Financial News ដុល្លារឡើងថ្លៃព្រឹកនេះក្រោយមានពន្លឺភ្លើងខៀវពីការដំឡើងអត្រាការប្រាក់របស់ធនាគារកណ្តាលអាមេរិក

ដុល្លារឡើងថ្លៃព្រឹកនេះក្រោយមានពន្លឺភ្លើងខៀវពីការដំឡើងអត្រាការប្រាក់របស់ធនាគារកណ្តាលអាមេរិក

ការជួញដូរប្រាក់ដុល្លារនៅព្រឹកថ្ងៃពុធនេះត្រូវបានគេមើលឃើញថា បានឡើងថ្លៃវិញបន្ទាប់ពីទទួលបានពន្លឺភ្លើងខៀវចេញពីធនាគារកណ្តាលអាមេរិកលើគោលនយោបាយដំឡើងអត្រាការប្រាក់រស់ខ្លួន ខណៈដែលការជួញដូរប្រាក់អឺរ៉ូទទួលរងសម្ពាធដោយសារតែស្ថានភាពនយោបាយក្នុងតំបន់មានការវិវត្តមិនសូវល្អ។

សន្ទស្សន៍ជួញដូរប្រាក់ដុល្លារធៀបទៅនឹងរូបិយប័ណ្ណនានានៅព្រឹកនេះត្រូវបានជួញដូរក្នុងតម្លៃ ៩៣,០៧ បន្ទាប់ពីបានហក់ឡើងដល់តម្លៃ ៩៣,២៨៦ កាលពីយប់មិញដែលជាតម្លៃជួញដូរខ្ពស់បំផុតមិនធ្លាប់មានជិត១ខែមកនេះ។ ការឡើងថ្លៃនេះបានកើតមានឡើងបន្ទាប់ពីប្រមុខធនាគារកណ្តាលអាមេរិកគឺលោកស្រី Janet Yellen បានបង្ហើបពីគម្រោងចង់ដំឡើងអត្រាការប្រាក់បើទោះបីជាកំណើនអតិផរណាបោះជំហានទៅមុខមិនសូវរលូនក៏ដោយ។

ធៀបទៅនឹងលុយយ៉េនរបស់ជប៉ុន ប្រាក់ដុល្លារបានហក់ឡើងដល់តម្លៃជួញដូរ ១១២,២៧ យ៉េនក្នុងមួយដុល្លារ ពោលគឺបានហក់ឡើងពីតម្លៃជួញដូរ ១១១,៥០ យ៉េនក្នុងមួយដុល្លារកាលពីថ្ងៃអង្គារម្សិលមិញ។ បើធៀបទៅនឹងលុយអឺរ៉ូវិញ ប្រាក់ដុល្លារក៏ឡើងថ្លៃដែរដោយត្រូវជួញដូរក្នុងតម្លៃ ១,១៧៥៧៥ ដុល្លារកាលពីថ្ងៃអង្គារម្សិលមិញ និង តម្លៃជួញដូរចុងក្រោយគឺ ១,១៧៩០ ដុល្លារ។

ប្រាក់អឺរ៉ូបានឡើងថ្លៃ ១០% នៅក្នុងឆ្នាំ ២០១៧ នេះដោយសារតែមានការគាំទ្រពីកំណើនសេដ្ឋកិច្ចនៅក្នុងតំបន់នេះ និង ការរំពឹងទុកលើគោលនយោបាយរបស់ធនាគារកណ្តាលអឺរ៉ុប។ យ៉ាងណាមិញ បញ្ហាបោះឆ្នោតនៅអាល្លឺម៉ង់កាលពីថ្ងៃអាទិត្យកន្លងទៅ បានធ្វើឲ្យប៉ះពាល់ដល់ការជួញដូរប្រាក់អឺរ៉ូ ខណៈដែលអ្នកវិនិយោគមានការព្រួយបារម្ភទៅនឹងនយោបាយរបស់ប្រទេសនេះ។

ងាកទៅ មើលការជួញដូរប្រាក់ដុល្លារអូស្ត្រាលីវិញ បានធ្លាក់ថ្លៃមកត្រឹមតម្លៃ ០,៧៨៧៤ ដុល្លារ បន្ទាប់ពីបានធ្លាក់ថ្លៃដល់តម្លៃជួញដូរទាបបំផុត ០,៧៨៦០ ដុល្លារដែលមិនធ្លាប់មាននៅ ក្នុងរយៈពេល៦សប្តាហ៍កន្លងទៅ។ ការធ្លាក់ថ្លៃនៃតម្លៃរូបិយប័ណ្ណមួយនេះដោយសារតែស្ថានភាពវិស័យឧស្សាហកម្មដែកដែលជាប្រភពចំណូលដ៏សំខាន់របស់ប្រទេសនេះមានស្ថានភាពមិនសូវល្អ។

យ៉ាងណាមិញ អ្វីដែលធ្វើឲ្យអ្នកជួញដូរចាប់អារម្មណ៍ជាងគេនៅថ្ងៃពុធនេះគឺការប្រកាសស្តីពីគម្រោងពន្ធដារដែលរៀបចំឡើងដោយរដ្ឋបាលរបស់លោក Trump នៅសភារបស់អាមេរិក ដែលនឹងមានឥទ្ធិពលដល់ទីផ្សារជួញដូរអន្តរជាតិ៕

ប្រភព៖ cnbc