ព្រឹត្តិការណ៍សេដ្ឋកិច្ចពិភពលោកសំខាន់ៗចំនួន១៣ កើតមាននៅក្នុងខែកញ្ញានេះដែលអ្នកជួញដូរត្រូវដឹង!

នេះគឺជាព្រឹត្តិការណ៍សេដ្ឋកិច្ចសំខាន់ៗរបស់ពិភពលោកដែលកើតមាននៅក្នុងខែកញ្ញានេះដែលអ្នកជួញដូរទាំងអស់មិនគួរមើលរំលងនោះឡើយ។ ចង់ដឹងថា មានព្រឹត្តិការណ៍អ្វីខ្លះកើតមានឡើង សូមតាមដានដូចខាងក្រោម៖

ថ្ងៃទី១ កញ្ញា៖ ព័ត៌មានទិន្នន័យអត្រាគ្នាការងារ (Unemployment Rate) និង ស្ថានភាពការងារនៅអាមេរិក(Non-Farm Payrolls )
អត្រាគ្មានការងារធ្វើនៅអាមេរិកបានធ្លាក់ចុះមកត្រឹម ៤,៣% កាលពីខែកក្កដា ដែលជាចំនួនទាបបំផុតមួយមិនធ្លាប់មាននៅ ក្នុងរយៈពេល១៦ឆ្នាំកន្លងទៅនេះ។ ចំនួននេះក៏នៅតែមិនមានការប្រែប្រួលដែរសម្រាប់ខែសីហា តែចំនួនការងារបានកើនឡើង ២០៩ ០០០ កន្លែង ខ្ពស់ជាងការរំពឹងទុកដែលថា វាមានត្រឹមតែ ១៨៤ ០០០ កន្លែងប៉ុណ្ណោះ។

ថ្ងៃទី ៦ កញ្ញា៖ ព័ត៌មានទិន្នន័យពាណិជ្ជកម្មអាមេរិកប្រចាំខែកក្កដា
ឧនភាពពាណិជ្ជកម្មអាមេរិកបានធ្លាក់ចុះមកត្រឹមចំនួន ៤៣,៦ ពាន់លានដុល្លារកាលពីខែមិថុនាកន្លងទៅពីចំនួន ៤៦,៤ ពាន់លានដុល្លារកាលពីខែឧសភា។ ចំនួននេះទាបជាងការព្យាករណ៍ដែលថា វាមានដល់ទៅ ៤៥ ពាន់លានដុល្លារ។ សញ្ញាណជាវិជ្ជមាននេះគឺដោយសារតែបានជួយជ្រោមជ្រែងពីកំណើនទីផ្សារនាំចេញរបស់ខ្លួន។

ថ្ងៃទី ៧ កញ្ញា៖ ព័ត៌មានអត្រាកំណើន GDP នៅក្នុងតំបន់ចាយប្រាក់អឺរ៉ូ និង សេចក្តីសម្រេចដំឡើងអត្រាការប្រាក់របស់ធនាគារកណ្តាលអឺរ៉ុប
សេដ្ឋកិច្ចនៅក្នុងតំបន់ចាយប្រាក់អឺរ៉ូត្រូវបានគេវាយតម្លៃថា នឹងមានកំណើន ២,២% នៅក្នុងត្រីមាសដែលបញ្ចប់ទៅត្រឹមខែមិថុនាកន្លងទៅ ពីកំណើន ១,៩% កាលពីត្រីមាសទី១។ ចំណែកបញ្ហាអត្រាការប្រាក់វិញ គេរំពឹងថា នឹងមិនមានការប្រែប្រួលអ្វីដែរ។ អត្រាការប្រាក់គោលនៅក្នុងតំបន់នេះស្ថិតនៅក្នុងអត្រា ០% ហើយនៅពេលខាងមុខក៏គេរំពឹងថា ក៏មិនត្រូវបានដំឡើងជាថ្មីដែរ។

ថ្ងៃទី៨ កញ្ញា៖ ព័ត៌មានទិន្នន័យពាណិជ្ជកម្មអាល្លឺម៉ង់និង អង់គ្លេសប្រចាំខែកក្កដា
អតិរេកពាណិជ្ជកម្ម (ស្ថានភាពដែលការនាំចេញច្រើនជាងការនាំចូល) របស់អាល្លឺម៉ង់បានថយចុះមកត្រឹមចំនួន ២២,៣ ពាន់លានអ៊ឺរ៉ូក្នុងខែមិថុនាកន្លងទៅពីចំនួន ២៤,៥ ពាន់លានអ៊ឺរ៉ូក្នុងខែមិថុនាឆ្នាំ ២០១៦។ ទន្ទឹមនឹងនេះដែរ ឱនភាពពាណិជ្ជកម្មចក្រភពអង់គ្លេសវិញ បានកើនឡើងបន្ថែមទៀតចំនួន ២ ពាន់លានផោនក្នុងខែមិថុនាដល់ចំនួនសរុប ៤,៥៦ ពាន់លានផោន។ នេះបានបង្ហាញពីឱនភាពពាណិជ្ជកម្មដ៏ខ្ពស់បំផុតមួយមិនធ្លាប់មានចាប់តាំងពីខែកញ្ញាឆ្នាំ ២០១៦មក ហើយការនាំចូលវិញ មានការកើនឡើងខ្ពស់ក្នុងកំណត់ត្រាចំនួន ៥៣,៩៥ ពាន់លានផោន។

ថ្ងៃទី ១២ កញ្ញា៖ ព័ត៌មានស្ថានភាពអត្រាអតិផរណារបស់អង់គ្លេសប្រចាំខែសីហា
អត្រាអតិផរណារបស់អង់គ្លេសត្រូវបានរាយការណ៍ថា មានចំនួន ២,៦% ក្នុងខែកក្កដាកន្លងទៅ។ អត្រានេះគឺមានចំនួនដូចគ្នាទៅនឹងខែមិថុនា ហើយត្រូវបានគេរំពឹងថា វាក៏មិនមានការផ្លាស់ប្ដូរដែរនៅក្នុងខែសីហានេះ។

ថ្ងៃទី ១៣ កញ្ញា៖ ព័ត៌មានអត្រាគ្មានការងារធ្វើរបស់អង់គ្លេសប្រចាំខែកក្កដា
អត្រាគ្មានការងារធ្វើរបស់អង់គ្លេសបានធ្លាក់ចុះដល់កម្រិតទាបបំផុតមិនធ្លាប់មាននៅក្នុងរយៈពេល៤០ឆ្នាំមកនេះកាលពីខែមិថុនាកន្លងទៅមកចំនួនត្រឹមតែ ៤,៤% ប៉ុណ្ណោះ។ អត្រាគ្មានការងារធ្វើសម្រាប់ខែកក្កដាកន្លងទៅ ត្រូវបានគេរំពឹងទុកថា នឹងមិនមានការផ្លាស់ប្ដូរនោះទេ។

ថ្ងៃទី ១៤ កញ្ញា៖ ព័ត៌មាននៃការដំឡើងអត្រាការប្រាក់របស់ធនាគារកណ្តាលអង់គ្លេស (BoE) និង ទិន្នន័យអត្រាអតិផរណាអាមេរិក (Fed) ប្រចាំខែសីហា
ធនាគារកណ្តាលអង់គ្លេស (BoE)បានសម្រេចចិត្តរួចហើយក្នុងការរក្សាអត្រាការប្រាក់របស់ខ្លួនឲ្យនៅក្នុងកម្រិតមួយទាបដដែលពោលគឺ ០,២៥% នៅក្នុងកិច្ចប្រជុំរបស់ខ្លួនកាលពីខែសីហាកន្លងទៅ។ ក្រុមអ្នកបង្កើតគោលនយោបាយធនាគារកណ្តាលរបស់ខ្លួនបានសម្ដែងការព្រួយបារម្ភចំពោះការធ្លាក់ចុះនៃសេដ្ឋកិច្ចក្នុងរយៈពេលខ្លីនេះ ហើយការផ្លាស់ប្ដូរអត្រាការប្រាក់នេះទំនងជាមិនត្រូវបានធ្វើឡើងនៅពេលឆាប់ៗនេះឡើយ។

យ៉ាងណាមិញ ងាកទៅមើលសេដ្ឋកិច្ចអាមេរិកវិញ តម្លៃទំនិញប្រើប្រាស់ (consumer prices) របស់ប្រទេសនេះបានមានកំណើន ១,៧% កាលពីខែកក្កដាកន្លងទៅ ពោលគឺនៅទាបជាងការព្យាករណ៍ទៅលើកំណើនអត្រាអតិផរណាដែលថា វាអាចមានកំណើនដល់ទៅ ១,៨%។ ក៏ប៉ុន្តែគេសង្ឃឹមថា អត្រាអតិផរណានឹងល្អប្រសើរជាងខែមិថុនាកន្លងទៅសម្រាប់ខែសីហានេះ។

ថ្ងៃទី ១៥ កញ្ញា៖ ព័ត៌មានស្តីពីទិន្នន័យលក់រាយរបស់អាមេរិក (Retail Sales)ប្រចាំខែសីហា
ពីមួយខែទៅមួយខែកំណើនលក់រាយនៅអាមេរិកបានកើនឡើង ០,៦% ក្នុងខែកក្កដាកន្លងទៅ ពីកំណើន ០,៣% កាលពីខែមិថុនា។ កំណើនប្រចាំខែកក្កដា មានចំនួនមួយខ្ពស់ជាងការព្យាករណ៍ដែលថា វាអាចមានកំណើនត្រឹមតែ ០,៤% ខណៈដែលស្ថានភាពទីផ្សារលក់រាយនេះមានភាពល្អប្រសើរឡើងចាប់តាំងពីខែចុងខែធ្នូឆ្នាំ ២០១៦មក។ ក៏ប៉ុន្តែ គេបានព្យាករណ៍ថា សម្រាប់ខែសីហានេះវានឹងធ្លាក់ចុះអស់ ០,២៥%។

ថ្ងៃទី ១៩ កញ្ញា៖ ព័ត៌មានស្តីពីសន្ទស្សន៍ទំនុកចិត្តលើសេដ្ឋកិច្ចអាល្លឺម៉ង់ប្រចាំខែកញ្ញានេះ
សន្ទស្សន៍ទំនុកចិត្តអ្នកប្រើប្រាស់លើសេដ្ឋកិច្ចអាល្លឺម៉ង់ (Consumer Sentiment Index)បានធ្លាក់ចុះកាលពីខែសីហាកន្លងទៅមកក្នុងចំនួនទាបបំផុតមិនធ្លាប់មានគិតចាប់តាំងពីខែតុលាឆ្នាំ ២០១៦មក។ សម្រាប់ខែកញ្ញានេះ គេរំពឹងថា ទំនុកចិត្តអ្នកប្រើប្រាស់នឹងបន្តធ្លាក់ចុះទៀត។

ថ្ងៃទី ២០ កញ្ញា៖ ព័ត៌មានបទអត្ថាធិប្បាយនៃការដំឡើងអត្រាការប្រាក់របស់ធនាគារកណ្តាលអាមេរិកប្រចាំខែសីហា
នៅក្នុងកិច្ចប្រជុំរបស់ខ្លួនកាលពីខែកក្កដាកន្លងទៅ ធនាគារកណ្តាលអាមេរិកបានសម្រេចរក្សាអត្រាការប្រាក់របស់ខ្លួនឲ្យនៅដដែលពីចំនួន ១% ដល់ ១,២៥% ។ គេរំពឹងថា ស្ថាប័ននេះនឹងបញ្ជាក់ជាថ្មីនូវអត្រាការប្រាក់គោលរបស់ខ្លួនសម្រាប់លទ្ធផលកិច្ចប្រជុំនៅក្នុងខែសីហាកន្លងទៅ។

ថ្ងៃទី ២១ កញ្ញា៖ ព័ត៌មានទំនុកចិត្តអ្នកប្រើប្រាស់នៅក្នុងតំបន់ចាយប្រាក់អឺរ៉ូសម្រាប់ខែកញ្ញានេះ
សន្ទស្សន៍ទំនុកចិត្តអ្នកប្រើប្រាស់នៅក្នុងតំបន់ចាយប្រាក់អឺរ៉ូ (Eurozone’s consumer confidence index) បានកើនឡើងពីចំនួន -១,៥ ទៅ -១,៧ កាលពីខែកក្កដាកន្លងទៅ។ ការរំពឹងទុកនៅលើទីផ្សារ គឺវានឹងមានស្ថានភាពល្អប្រសើរឡើងវិញធ្លាក់មកត្រឹមចំនួន -១,២% សម្រាប់ខែកញ្ញានេះ។

ថ្ងៃទី ២៨ កញ្ញា៖ ព័ត៌មានស្តីពីទំនុកចិត្តលើអាជីវកម្មក្នុងតំបន់ចាយប្រាក់អឺរ៉ូ និង អត្រាគ្មានការងារធ្វើរបស់អាល្លឺម៉ង់ប្រចាំខែកញ្ញា និងទិន្នន័យអត្រាកំណើន GDP របស់អាមេរិកប្រចាំត្រីមាសទី២
តួលេខទំនុកចិត្តលើអាជីវកម្មក្នុងតំបន់ចាយប្រាក់អឺរ៉ូ (Eurozone’s business confidence index)បានធ្លាក់ចុះមកត្រឹម ១,០៥ ពីចំនួនខ្ពស់បំផុត ១,១៦ នៅក្នុងរយៈពេល៦ឆ្នាំកន្លងទៅកាលពីខែមិថុនា។ តួលេខនេះត្រូវបានគេរំពឹងថា នឹងបន្តធ្លាក់ចុះទៀតសម្រាប់ខែសីហា និង ខែកញ្ញានេះ។

ទោះបីជាបែបនេះក្តី អត្រាគ្មានការងារធ្វើនៅអាល្លឺម៉ង់វិញបានធ្លាក់ចុះមកត្រឹមចំនួនមួយល្អប្រសើរ ពោលគឺមាន ៣,៨% សម្រាប់ខែមិថុនាកន្លងទៅ ដែលជាអត្រាមួយទាបបំផុតមិនធ្លាប់មានគិតចាប់តាំងពីខែ វិច្ឆិកាឆ្នាំ ១៩៨០មក។ ក៏ប៉ុន្តែគេរំពឹងថា វានឹងមានកំណើនឡើងវិញ ៥% សម្រាប់ខែសីហា និង ខែកញ្ញានេះ។

ចំណែកស្ថានភាពកំណើន GDP របស់អាមេរិកវិញ ទិន្នន័យបឋមបានបង្ហាញលទ្ធផលជាវិជ្ជមានដោយមានកំណើន ២,៦% នៅក្នុងត្រីមាសទី ២ឆ្នាំ ២០១៧នេះពីកំណើន ១,២% កាលពីត្រីមាសទី១។ គេរំពឹងថា កំណើន GDP ជាផ្លូវការ របស់អាមេរិកនឹងមិនមានការប្រែប្រួលនោះទេសម្រាប់ត្រីមាសទី២នេះ។

ថ្ងៃទី ២៩ កញ្ញា៖ ព័ត៌មានស្តីពីអត្រាកំណើន GDP របស់អង់គ្លេសក្នុងត្រីមាសទី២
លទ្ធផលស្តីពីទិន្នន័យកំណើន GDP របស់អង់គ្លេសនឹងប្រកាសឲ្យដឹងនៅថ្ងៃទី ២៩ កញ្ញាខាងមុខ ខណៈដែលកាលពីត្រីមាសទី១កន្លងទៅវាមានកំណើន ២%។ ក៏ប៉ុន្តែការព្យាករណ៍បានលើកឡើងថា វានឹងធ្លាក់ចុះមកវិញត្រឹមចំនួន ១,៧% ៕

ប្រភព៖ Forex.info