Wednesday, September 27, 2017

Home Unlabelled មាសមិនមានការប្រែប្រួលខ្លាំងទេក្រោយធ្លាក់ថ្លៃខ្លាំងអស់ជាង ១% កាលពីម្សិលមិញ

មាសមិនមានការប្រែប្រួលខ្លាំងទេក្រោយធ្លាក់ថ្លៃខ្លាំងអស់ជាង ១% កាលពីម្សិលមិញ

ការជួញដូរមាសនៅព្រឹកថ្ងៃពុធនេះហាក់មិនមានការប្រែប្រួលខ្លាំងនោះឡើយបន្ទាប់ពីបានធ្លាក់ថ្លៃអស់ជាង ១% កាលពីម្សិលមិញ បន្ទាប់ពីមានព័ត៌មានចេញពីប្រមុខធនាគារកណ្តាលអាមេរិកលើគម្រោងចង់ដំឡើងអត្រាការប្រាក់នៅចុងឆ្នាំ នេះ។

នៅព្រឹកនេះមាសឡើងថ្លៃបន្តិចបន្តួចត្រឹមតែ ០,១% ត្រូវបានជួញដូរក្នុងតម្លៃ ១ ២៩៤,៦២ ដុល្លារក្នុងមួយអោន បន្ទាប់ពីបានធ្លាក់ថ្លៃអស់ ១,៣% កាលពីថ្ងៃម្សិលមិញដែលជាការធ្លាក់ថ្លៃដ៏ច្រើនបំផុតមិន ធ្លាប់មាននៅ ក្នុងរយៈពេល២សប្តាហ៍កន្លងទៅនេះ។ ចំណែកទីផ្សារជួញដូរមាសរបស់អាមេរិកវិញ បានធ្លាក់ថ្លៃអស់ ០,៣៥% ត្រូវបានជួញដូរក្នុងតម្លៃ ១ ២៩៧,១០ ដុល្លារក្នុងមួយអោន។

ការធ្លាក់ថ្លៃដ៏ច្រើនបែបនេះបានកើតមានឡើងបន្ទាប់ពីសាររបស់លោកស្រី Yellen ប្រមុខធនាគារកណ្តាលអាមេរិកដែលបង្ហាញសុទិដ្ឋិនិយមនៃការដំឡើងអត្រាការប្រាក់នៅចុងឆ្នាំនេះ បើទោះបីជាស្ថានភាពអតិផរណាមិនទាន់មានសញ្ញាណល្អក៏ដោយ។ ការលើកឡើងរបស់លោកស្រី ជំរុញឲ្យប្រាក់ដុល្លារមានសង្ឃឹមនៅក្នុងទីផ្សារជួញដូរ ហើយរុញច្រានឲ្យទីផ្សារមាសធ្លាក់ថ្លៃខ្លាំងតែម្តង។

បើក្រឡេកទៅមើលសេដ្ឋកិច្ចអាមេរិកវិញ ទំនុកចិត្តលើកើនឡើងនៃថ្លៃទំនិញប្រើប្រាស់បានធ្លាក់ចុះនៅក្នុងខែកញ្ញានេះ ខណៈដែលទីផ្សារលំនៅឋានក៏មានការធ្លាក់ចុះផងដែរកាលពីខែសីហាកន្លងទៅ។ បញ្ហានេះបណ្តាលមកពីគ្រោះមហន្តរាយខ្យល់ព្យុះផ្ទួនៗគ្នាកាលពីពេលថ្មីៗកន្លងទៅ ជាហេតុនាំឲ្យមានការរំពឹងទុកថា សេដ្ឋកិច្ចរបស់មហាអំណាចមួយនេះ នឹងទទួលរងផលប៉ះពាល់នៅក្នុងត្រីមាសទី៣ឆ្នាំនេះ។

ត្រឡប់ទៅតាមដានស្ថានភាពនយោបាយអន្តរជាតិវិញ លោកប្រធានាធិបតីអាមេរិក Donald Trump បានព្រមានកូរ៉េខាងជើងកាលពីថ្ងៃអង្គារម្សិលមិញថា ជម្រើសដោយប្រើប្រាស់កងកម្លាំងយោធាណាមួយនឹងអាចកម្ទេចក្រុងព្យុងយ៉ាងបាន។ ប៉ុន្តែលោកបានថ្លែងបញ្ជាក់ថា ការប្រើប្រាស់កម្លាំងទ័ពនេះមិនមែនជាជម្រើសដំបូងរបស់រដ្ឋបាលទីក្រុងវ៉ាស៊ីនតោនឡើយក្នុងការដោះស្រាយកម្មវិធីអាវុធនុយក្លេអ៊ែររបស់កូរ៉េខាងជើង៕

ប្រភព៖ cnbc