ទីផ្សារប្រេងឆៅប្រែប្រួលដល់ណាហើយ?

ការជួញដូរប្រេងឆៅនៅលើទីផ្សារអាស៊ីព្រឹកនេះបានធ្លាក់ថ្លៃវិញ បន្ទាប់ពីបានជួញដូរឡើងថ្លៃបន្តិចកាលពីយប់មិញ បន្ទាប់ពីគ្រោះមហន្តរាយបង្កឡើងពីព្យុះ Harvey មកលើក្រុមហ៊ុនអណ្តូងប្រេងជាច្រើននៅរដ្ឋ Texas កន្លងទៅនេះបានធូរស្រាលឡើងវិញ។

សន្ទស្សន៍ជួញដូរប្រេងឆៅរបស់អាមេរិក (WTI) បានធ្លាក់ថ្លៃអស់ ១៥ សេន ឬស្មើនឹង ០,៥% ត្រូវបានជួញដូរក្នុងតម្លៃ ៤៦,៩៨ ដុល្លារក្នុងមួយបារ៉ែល បន្ទាប់ពីបានហក់ឡើងដល់ទៅ ២,៣% កាលពីថ្ងៃព្រហស្បតិ៍ម្សិលមិញ។ ចំណែកទីផ្សារប្រេងឆៅនៅលើទីផ្សារអន្តរជាតិវិញ បានធ្លាក់ថ្លៃអស់ ១០ សេនថ្ងៃនេះ ត្រូវបានជួញដូរក្នុងតម្លៃ ៥២,៧៦ ដុល្លារក្នុងមួយបារ៉ែល បន្ទាប់ពីបានហក់ឡើងដល់ទៅ ១,៥២ ដុល្លារ ឬ ស្មើនឹង ២,៩៩% កាលពីម្សិលមិញ។

តម្លៃប្រេងសាំងរបស់អាមេរិកបានឡើងថ្លៃជាង ២៨% ដែលមិនធ្លាប់មាននោះឡើយនៅក្នុងរយៈពេល២ឆ្នាំ គន្លងទៅនេះ ក្នុងតម្លៃជាង ២ ដុល្លារក្នុងមួយកាឡុងជុំវិញការព្រួយបារម្ភទៅនឹងការធ្លាក់ចុះនៃការផ្គត់ផ្គង់ប្រេងសាំងនៅមុនថ្ងៃបុណ្យឈប់សម្រាកការងារចូលមកដល់នៅចុងសប្តាហ៍នេះ។

បើយោងតាមការវាយតម្លៃធ្វើឡើងដោយសារព័ត៌មាន Reuters បានឲ្យដឹងថា យ៉ាងហោចណាស់ពលរដ្ឋអាមេរិក ៣៥ នាក់បានស្លាប់ដោយសារព្យុះត្រូពិច Harvey កាលពីពេលថ្មីៗកន្លងទៅនេះ និង តំបន់សំខាន់ៗនៅក្នុងរដ្ឋ Texas បានទទួលរងគ្រោះទឹកជំនន់យ៉ាងធ្ងន់ធ្ងរ។ មិនតែប៉ុណ្ណោះ វាបានបង្កឲ្យក្រុមហ៊ុនប្រេងមួយចំនួនស្ថិតនៅក្នុងតំបន់នេះបានបិទទ្វារផ្អាកការចម្រាញ់ប្រេងជាបណ្ដោះអាសន្នដែលការផ្អាកសកម្មភាពចម្រាញ់ប្រេងនេះមានចំនួនស្មើនឹង ៤,៤ លានបារ៉ែលក្នុងមួយថ្ងៃ។

ការិយាល័យអនុវត្ដច្បាប់ស្ដីពីសុវត្ថិភាព និងបរិស្ថាននៃក្រសួងមហាផ្ទៃអាមេរិកបាននិយាយថា ផលិតកម្មប្រេង ចំនួន ១៣,៥% នៅក្នុងឈូងសមុទ្រម៉ិកស៊ិកត្រូវបានបិទជាបណ្ដោះអាសន្នកាលពីថ្ងៃព្រហស្បតិ៍ម្សិលមិញ។ នេះបានជំរុញឲ្យរដ្ឋាភិបាលរបស់ខ្លួនសម្រេចចិត្តបញ្ចេញប្រេងឆៅចំនួន ១ លានបារ៉ែលក្នុងមួយថ្ងៃពីរោងចក្រផលិតប្រេងក្នុងរដ្ឋ Louisiana សម្រាប់ផ្គត់ផ្គង់តម្រូវការ ដែលនេះមិនធ្លាប់មាននោះឡើយនៅក្នុងរយៈពេល៥ឆ្នាំកន្លងទៅនេះ។

យ៉ាងណាក៏ដោយ ការស្តុកប្រេងសាំងរបស់មហាអំណាចមួយនេះបានកើនឡើងចំនួន ៣៥ ០០០ បារ៉ែលបើប្រៀបធៀបទៅនឹងការព្យាករណ៍របស់សារព័ត៌មាន Reuters ដែលថា វាអាចធ្លាក់ចុះចំនួន ១ លានបារ៉ែលកាលពីសប្តាហ៍មុន។ ចំណែកតម្រូវការប្រេងសាំងវិញ បានកើនឡើងក្នុងកំណត់ត្រាខ្ពស់បំផុតក្នុងសប្តាហ៍ដូចគ្នានេះ ពោលគឺមានចំនួន ៩,៨៥ លានបារ៉ែលក្នុងមួយថ្ងៃ៕

ប្រភព៖ cnbc