Tuesday, September 26, 2017

Home Financial News ផ្សារភាគហ៊ុនអាស៊ីមានសម្ពាធ ក្រោយកូរ៉េខាងជើងចោទប្រកាន់អាមេរិកថា ជាអ្នកប្រកាសសង្គ្រាមមុន

ផ្សារភាគហ៊ុនអាស៊ីមានសម្ពាធ ក្រោយកូរ៉េខាងជើងចោទប្រកាន់អាមេរិកថា ជាអ្នកប្រកាសសង្គ្រាមមុន

ការជួញដូរនៅលើផ្សារភាគហ៊ុនអាស៊ីត្រូវបានគេមើលឃើញថា មានសម្ពាធធ្លាក់ចុះនៅព្រឹកថ្ងៃអង្គារនេះតាមពីក្រោយផ្សារភាគហ៊ុន Wall Street ដែលបានធ្លាក់ថ្លៃកាលពីយប់មិញ បន្ទាប់ពីការប្រឈមមុខដាក់គ្នារវាងអាមេរិក និងកូរ៉េខាងជើងបានកើនកម្តៅឡើងវិញ។

ផ្សារភាគហ៊ុនដែលធ្លាក់ថ្លៃ មុនគេ គឺផ្សារភាគហ៊ុនជប៉ុន Nikkei 225 ដែលបានធ្លាក់ថ្លៃអស់ ០,២៨% បន្ទាប់ពីលុយយ៉េនត្រូវបានជួញដូរឡើងថ្លៃវិញ ចាប់តាំងពីយប់មិញ ខណៈដែលអ្នកជួញដូរកំពុងផ្តោតលើស្ថានភាពភូមិសាស្ត្រនយោបាយនៅឧបទ្វីបកូរ៉េ។

នៅកូរ៉េខាងត្បូងឯណេះវិញ ផ្សារភាគហ៊ុន Kospi របស់ខ្លួនបានធ្លាក់ថ្លៃដែរ ប៉ុន្តែទាបជាងបន្តិច ពោលគឺត្រឹម ០,១២% ខណៈដែលភូមិសាស្ត្រនយោបាយរបស់ខ្លួនកំពុងថ្លឹងថ្លែងដល់ទីផ្សារជួញដូររបស់ខ្លួន។ ភាគហ៊ុនរបស់ក្រុមហ៊ុនបច្ចេកវិទ្យាធំៗនៅក្នុងប្រទេសនេះដូចជា ក្រុមហ៊ុន Samsung បានធ្លាក់ថ្លៃអស់ ១,៤៩% និងក្រុមហ៊ុន LG បានធ្លាក់ថ្លៃដល់ទៅ ៣,០៨%។

ងាកទៅមើលការជួញដូរនៅលើផ្សារភាគហ៊ុនអូស្ត្រាលី ហាក់ធ្លាក់ថ្លៃ តិចតួចប៉ុណ្ណោះ ក្នុងចំនួន ០,០៦%។ យ៉ាងណាមិញ ភាគហ៊ុនរបស់ក្រុមហ៊ុនថាមពល មានសញ្ញាណឡើងថ្លៃល្អរហូតដល់ ២,២៨% ប៉ុន្តែភាគហ៊ុនរបស់ក្រុមហ៊ុនលក់រាយ និង ទូរគមនាគមន៍បានធ្លាក់ថ្លៃច្រើនដែរ។

ត្រឡប់ទៅមើលការជួញដូរនៅលើផ្សារភាគហ៊ុនចិនវិញ ក៏មានសញ្ញាណអវិជ្ជមានដែរ។ ក្នុងនោះផ្សារភាគហ៊ុន ហុងកុង Hang Seng បានធ្លាក់ថ្លៃអស់ ០,១៦% ខណៈដែលផ្សារភាគហ៊ុនចិនដីគោក ដូចជា ផ្សារភាគហ៊ុនសៀងហៃបានធ្លាក់ថ្លៃតិចតួចត្រឹម ០,០៣% និងផ្សារភាគហ៊ុន Shenzhen បានធ្លាក់ថ្លៃអស់០,២៧១%។

ភាពតានតឹងខាងភូមិសាស្ត្រនយោបាយបានកើតមានឡើងសាជាថ្មីទៀតកាលពីយប់មិញបន្ទាប់ពីរដ្ឋមន្រ្តីការបរទេសរបស់កូរ៉េខាងជើងបានមានប្រសាសន៍ថា ប្រធានាធិបតីអាមេរិកលោក Donald Trumpបានប្រកាសសង្គ្រាមមុនប្រឆាំង ទៅនឹងទីក្រុងព្យុងយ៉ាង។

រដ្ឋមន្ត្រីការបរទេសលោក រីយ៉ុងហូ បានបញ្ជាក់ថា សាររបស់លោក Trump គឺមានន័យថា កូរ៉េខាងជើងអាចកំណត់គោលដៅ និងបាញ់ទម្លាក់យន្តហោះទម្លាក់គ្រាប់បែកទាំងអស់របស់អាមេរិកដែលហោះចូលដែនអាកាសរបស់ខ្លួន ខណៈដែលសេតវិមានអាមេរិកបានឆ្លើយតបថា រដ្ឋាភិបាលទីក្រុងវ៉ាស៊ីនតោនមិនបានប្រកាសសង្រ្គាមណាមួយទៅលើរដ្ឋដ៏ឯកោនេះឡើយ។

អ្នកវិភាគបាននិយាយថា ការចោទប្រកាន់របស់កូរ៉េខាងជើងទៅលើលោកTrump ជាអ្នកដែលបានប្រកាសសង្គ្រាមមុននោះ បានធ្វើឱ្យទីផ្សារសាកលលោកមានភាពចលាចលខ្លាំង។ចំណែកស្ថានភាពនយោបាយនៅជប៉ុនឯណោះវិញ លោកនាយករដ្ឋមន្ត្រី Shinzo Abe បានថ្លែងកាលពីថ្ងៃចន្ទម្សិលមិញថា លោកនឹងរំលាយសភាជាន់ទាបចោលនៅថ្ងៃទី២៨ ខែកញ្ញានេះឲ្យបានមុនការបោះឆ្នោតដែលនឹងត្រូវធ្វើឡើងនៅថ្ងៃទី ២២ ខែតុលាខាងមុខ។

នៅថ្ងៃនេះអ្នកជួញដូរក៏ចាប់អារម្មណ៍ផងដែរលើប្រសាសន៍របស់ប្រមុខធនាគារកណ្តាលអាមេរិកប្រចាំទីក្រុងញីវយ៉កគឺលោក William Dudley និងលោក Charles Evans ប្រមុខធនាគារកណ្តាលអាមេរិកមកពីទីក្រុង Chicago ។ លោក Dudley បានឱ្យដឹងកាលពីថ្ងៃចន្ទម្សិលមិញថា ធនាគារកណ្តាលកំពុងស្ថិតនៅលើគន្លងផ្លូវដ៏ យឺតយ៉ាវមួយក្នុងការដំឡើងអត្រាការប្រាក់ ខណៈដែលបញ្ហាប្រឈមមុខនៅពេលបច្ចុប្បន្នកំពុងធ្វើឲ្យប៉ះពាល់ដល់អតិផរណា។ ចំណែកលោក លោក Evans បានថ្លែងយ៉ាងប្រុងប្រយ័ត្នបន្ថែមទៀតថា ធនាគារកណ្តាលត្រូវរង់ចាំសញ្ញាណល្អនៃកំណើនថ្លៃទំនិញប្រើប្រាស់ជាមុនសិនមុនពេលសម្រេចដំឡើងអត្រាការប្រាក់៕

ប្រភព៖ cnbc