ទីផ្សារភាគហ៊ុនអាស៊ីឡើងចុះមិនស្របគ្នា

ការជួញដូរនៅលើទីផ្សារភាគហ៊ុនអាស៊ីនៅថ្ងៃព្រហស្បតិ៍នេះត្រូវបានគេមើលឃើញថា បានឡើងចុះមិនស្របគ្នា បន្ទាប់ពីទីផ្សារភាគហ៊ុនអាមេរិកត្រូវបានបិទបញ្ចប់ជួញដូរក្នុងតម្លៃឡើងថ្លៃ ក្រោយគម្រោងពន្ធដារថ្មីត្រូវបានដាក់បង្ហាញជាសាធារណៈ។

ទីផ្សារភាគហ៊ុនជប៉ុន គឺជាទីផ្សារជួញដូរឡើងថ្លៃ មុនគេក្នុងចំនួន ០,៣៥% ខណៈដែលភាគហ៊ុនរបស់ក្រុមហ៊ុនបច្ចេកវិទ្យា និង ក្រុមហ៊ុនហិរញ្ញវត្ថុធំៗសុទ្ធតែបានឡើងថ្លៃខ្ពស់។ ក៏ប៉ុន្តែនៅកូរ៉េខាងត្បូងវិញ ផ្សារភាគហ៊ុន Kospi របស់ខ្លួនបានធ្លាក់ថ្លៃអស់ ០,២% ខណៈដែលភាគហ៊ុនរបស់ក្រុមហ៊ុនរថយន្ត និង ប្រេងឆៅរបស់ប្រទេសនេះក៏ធ្លាក់ថ្លៃដែរ។

នៅអូស្ត្រាលី ផ្សារភាគហ៊ុន S&P/ASX 200 បានឡើងថ្លៃ ០,១៣% ជាមួយនឹងការឡើងថ្លៃខ្ពស់របស់ក្រុមហ៊ុនព័ត៌មានវិទ្យា និងក្រុមហ៊ុនលក់រាយ។ រីឯភាគហ៊ុនរបស់ក្រុមហ៊ុនធនាគារវិញ បានឡើងថ្លៃ តិចតួចប៉ុណ្ណោះត្រឹម ០,២៧% ឡើងទៅ។

ងាកទៅមើលការជួញដូរនៅលើផ្សារភាគហ៊ុនចិនវិញ សន្ទស្សន៍ជួញដូរផ្សារភាគហ៊ុនហុងកុង Hang Seng បានទទួលរងសម្ពាធដោយបានធ្លាក់ថ្លៃអស់ ០,៣១% នៅពេលចាប់ផ្តើមបើកការជួញដូរ។ ចំណែកសន្ទស្សន៍ជួញដូរផ្សារភាគហ៊ុនចិនដីគោក ដូចជា សន្ទស្សន៍ជួញដូរផ្សារភាគហ៊ុន សៀងហៃបានធ្លាក់ថ្លៃអស់ ០,១% និង សន្ទស្សន៍ជួញដូរផ្សារភាគហ៊ុន Shenzhen មិនមានការប្រែប្រួលនោះទេ។

ផែនការដែលមានការរំពឹងទុកខ្ពស់ក្នុងការធ្វើកំណែទម្រង់ពន្ធដារនៅអាមេរិកត្រូវបានចេញផ្សាយជាសាធារណៈដោយគណបក្សសាធារណរដ្ឋកាលពីថ្ងៃពុធម្សិលមិញ។ សំណើនេះនឹងធ្វើឲ្យអត្រាពន្ធសាជីវកម្មធ្លាក់មកត្រឹម ២០% ពីចំនួន ៣៥% និងកាត់បន្ថយអត្រាពន្ធលើប្រាក់ចំណូលពីពលរដ្ឋដែលមានប្រាក់ចំណូលខ្ពស់ពីអត្រា ៣៩,៦% មកត្រឹម៣៥% វិញ។

អ្នកជួញដូរនៅលើ ទីផ្សារអន្តរជាតិបានអបអរលើសំណើពន្ធដារថ្មីនេះ ដែលធ្វើឲ្យទីផ្សារជួញដូរនៅលើផ្សារភាគហ៊ុនអាមេរិកបានបិទបញ្ចប់ ជួញដូរឡើងថ្លៃដែរកាលពីយប់មិញ។ ផ្សារភាគហ៊ុន Dow Jones បានឡើងថ្លៃ ០,២៥% នៅក្នុងកំណត់ត្រាខ្ពស់បំផុតមួយជាថ្មីម្តងទៀតកាលពីយប់មិញ៕

ប្រភព៖ cnbc