មាសបន្តធ្លាក់ថ្លៃទៀតកាន់តែខ្លាំងថ្លៃនេះ

តម្លៃមាសដែលបានស្ទុះឡើងថ្លៃកាលពីសប្តាហ៍មុន កំពុងបន្តមានសម្ពាធធ្លាក់ថ្លៃ កាន់តែខ្លាំងទៀតនៅថ្ងៃអង្គារនេះបន្ទាប់ពីបានធ្លាក់ថ្លៃកាលពីម្សិលមិញម្តងរួចមកហើយ។ ការធ្លាក់ថ្លៃនេះបានកើតមានឡើងនៅអំឡុងពេលទីផ្សារជួញដូរប្រាក់ដុល្លារមានសង្ឃឹមឡើងវិញ ក្រោយក្តីបារម្ភរបស់អ្នកជួញដូរទៅលើវិបត្តិក្នុងតំបន់ឧបទ្វីបកូរ៉េ និង ព្យុះ Irma បោកបក់មកលើទឹកដីអាមេរិកបានស្ងប់ស្ងាត់ទៅវិញ។

ការជួញដូរមាសតាមស្បត (Spot Gold) បានបន្តធ្លាក់ថ្លៃអស់ ០,១% ទៀត ស្ថិតនៅក្នុងតម្លៃជួញដូរ ១ ៣២៥,៥៦ ដុល្លារក្នុងមួយអោននៅម៉ោង ៨:០០ ព្រឹកកន្លងទៅនេះ។ កាលពីម្សិលមិញ វាបានធ្លាក់ថ្លៃអស់ ១,៤% ដែលជាការធ្លាក់ថ្លៃប្រចាំ ថ្ងៃដ៏ច្រើនបំផុតមិនធ្លាប់មានគិតចាប់តាំងពីដើមខែកក្កដាឆ្នាំ ២០១៧នេះមក។ ចំណែកទីផ្សារមាសរបស់អាមេរិកវិញ បានធ្លាក់ថ្លៃអស់ ០,៤% ត្រូវបានជួញដូរក្នុងតម្លៃ ១ ៣៣០,០០ ដុល្លារក្នុងមួយអោន។

ងាកទៅមើលស្ថានការណ៍នយោបាយវិញ ចិន និង រុស្ស៊ី បានចូលរួមក្នុងការបោះឆ្នោតជាឯកច្ឆន្ទមួយ ដើម្បីដាក់ទណ្ឌកម្មថ្មីទៅលើប្រទេសកូរ៉េខាងជើង បន្ទាប់ពីធ្វើតេស្តសាកល្បងអាវុធនុយក្លេអ៊ែរជាលើកទី៦ កាលពីពេលថ្មីៗកន្លងទៅ។

ការបោះឆ្នោតរបស់ក្រុមប្រឹក្សាសន្តិសុខអង្គការសហប្រជាជាតិ ទទួលបានលទ្ធផល ១៥-០ ដោយគាំទ្រលើសំណើនៃការដាក់ទណ្ឌកម្មរបស់អាមេរិក ចំនួន ៦ ធំៗដូចជា ហាមឃាត់ការនាំចូលប្រេងកាត, ការនាំចេញវាយនភណ្ឌ, បញ្ចប់កិច្ចសន្យាការងារក្រៅប្រទេស, បង្ក្រាបការរត់ពន្ធ, បញ្ឈប់ការបណ្ដាក់ទុនជាមួយប្រទេសដទៃទៀត និងការដាក់ទណ្ឌកម្មលើអង្គភាពរដ្ឋាភិបាលកូរ៉េខាងជើង។

អ្នកបង្កើតគោលនយោបាយធនាគារកណ្តាលអឺរ៉ុបចំនួនប្រាំមួយនាក់បានត្រៀមខ្លួនកាលពី ថ្ងៃច័ន្ទម្សិលមិញនេះសម្រាប់ការវិលត្រឡប់មកវិញនៃការអនុវត្តសកម្មភាពរបស់ខ្លួនលើវិស័យរូបិយវត្ថុដោយសារតែកំណើនសេដ្ឋកិច្ចនៅក្នុងតំបន់នេះ កំពុងបង្ហាញសញ្ញាណវិជ្ជមានកាន់តែខ្លាំងឡើង។

កាលពីម្សិលមិញនេះផងដែរ ធនាគារកណ្ដាលរបស់ចិនបានលុបចោលវិធានការចំនួនពីរដែលត្រូវបានធ្វើឡើងសម្រាប់គាំទ្រប្រាក់យន់នៅពេលវាស្ថិតនៅក្រោមសម្ពាធជួញដូរ។ ចំណែកធនាគារកណ្តាលរុស្ស៊ីវិញ គេរំពឹងថា ស្ថាប័ននេះ នឹងកំណត់កាត់បន្ថយអត្រាការប្រាក់ចំនួន ៨,៥% នៅថ្ងៃសុក្រចុងសប្តាហ៍នេះ ដើម្បីទប់ទល់ទៅនឹងការធ្លាក់ចុះ អត្រាអតិផរណាដ៏ច្រើនរបស់ខ្លួន៕

ប្រភព៖ cnbc