ដុល្លារបន្តឡើងថ្លៃជាថ្មីទៀតនៅព្រឹកនេះ

ការជួញដូរប្រាក់ដុល្លារត្រូវបានគេមើលឃើញថា កំពុងបន្តឡើងថ្លៃទៀតដល់តម្លៃជួញដូរខ្ពស់បំផុតមួយមិនធ្លាប់មាននៅក្នុងរយៈពេល៤សប្តាហ៍កន្លងទៅនេះ បើធៀបទៅនឹងលុយយ៉េនរបស់ជប៉ុន ខណៈដែលអ្នកជួញដូរកំពុងរង់ចាំទិន្នន័យអត្រាអតិផរណារបស់អាមេរិកដែលនឹងចេញផ្សាយនៅយប់នេះដើម្បីប្រមើលមើលពីលទ្ធភាពដំឡើងអត្រាការប្រាក់របស់ធនាគារកណ្តាលអាមេរិក។

ធៀបទៅនឹងលុយយ៉េន នៅព្រឹកនេះប្រាក់ដុល្លារបានបន្តឡើងថ្លៃជាថ្មីចំនួន ០,១% ត្រូវបានជួញដូរក្នុងតម្លៃ ១១០,៥៩ យ៉េនក្នុងមួយដុល្លារបន្ទាប់ពីបានហក់ឡើងថ្លៃដល់តម្លៃ ១១០,៦៩ យ៉េនក្នុងមួយដុល្លារម្តងរួចមកហើយកាលពីយប់មិញ។ តម្លៃនេះ គឺជាតម្លៃជួញដូរខ្ពស់បំផុតមិនធ្លាប់មានគិតចាប់តាំងពីថ្ងៃទី ១៦ សីហាមក។

ការងើបឡើងវិញនៃ តម្លៃប្រាក់ដុល្លារនៅសប្តាហ៍នេះ គឺបានជួយជ្រោមជ្រែងពីស្ថានភាពល្អប្រសើរឡើងវិញនៃស្ថានភាពនយោបាយអន្តរជាតិ និង សេដ្ឋកិច្ចអាមេរិក ខណៈដែលអត្រាការប្រាក់លើមូលបត្របំណុលរបស់ខ្លួនក៏មានកំណើនផងដែរ។ កាលពីសប្តាហ៍មុន វាបានធ្លាក់ថ្លៃដោយសារតែអ្នកជួញដូរមានការបារម្ភទៅនឹងគ្រោះមហន្តរាយពីព្យុះ Irma និង វិបត្តិនយោបាយនៅក្នុងតំបន់ឧបទ្វីបកូរ៉េ។

នៅថ្ងៃនេះប្រធានបទដ៏សំខាន់សម្រាប់អ្នកជួញដូរទីផ្សារត្រូវតាមដាននោះ គឺរបាយការណ៍ទិន្នន័យអតិផរណារបស់អាមេរិកនៅយប់នេះ។ ទិន្នន័យខាងលើសំខាន់ណាស់សម្រាប់អ្នកជួញដូរដោយរំពឹងថា ប្រសិនបើអតិផរណាមានការកើនឡើង នោះប្រាក់ដុល្លារនឹងឡើងថ្លៃជាមិនខានដែលជាក្តីសង្ឃឹមមួយសម្រាប់ធនាគារកណ្តាលរបស់ខ្លួនអាចដំឡើងអត្រាការប្រាក់ជាថ្មីនៅក្នុងឆ្នាំខាងមុខ។

ជាមួយគ្នានេះគេរំពឹងទុកផងដែរថា សន្ទស្សន៍ថ្លៃទំនិញប្រើប្រាស់របស់អាមេរិកអាចនឹងកើនឡើង ១,៦% នៅក្នុងខែសីហាកន្លងទៅ បើធៀបទៅនឹងកំណើន ១,៧% កាលពីខែកក្កដា។ ចំណែកធនាគារកណ្តាលអាមេរិកវិញបានដាក់គោលដៅអតិផរណា ២% ហើយតួលេខនៃការធ្លាក់ចុះអតិផរណានៅពេលកន្លងមកបានកាត់បន្ថយការរំពឹងទុកសម្រាប់ធនាគារកណ្តាលក្នុងការបង្កើនអត្រាការប្រាក់ម្តងទៀតនៅចុងឆ្នាំនេះ។

ត្រឡប់ទៅមើលការជួញដូរប្រាក់អឺរ៉ូវិញ ហាក់មិនមានការប្រែប្រួលខ្លាំងនោះទេ ដោយត្រូវបានជួញដូរក្នុងតម្លៃ ១,១៨៨៦ ដុល្លារ។ យ៉ាងណាមិញ តម្លៃនេះទាបជាងតម្លៃជួញដូរឡើងថ្លៃខ្ពស់បំផុត ១,២០៩២ ដុល្លារកាលពីថ្ងៃសុក្រកន្លងទៅ ដែលវាមិនធ្លាប់មាននោះឡើយនៅក្នុងរយៈពេលជាង២ឆ្នាំកន្លងមកនេះ។

នៅយប់នេះផងដែរ អ្នកជួញដូរក៏ផ្ដោតយកចិត្តទុកដាក់ផងដែរលើកិច្ចប្រជុំរបស់ធនាគារកណ្តាលអង់គ្លេស និង ធនាគារកណ្តាលរបស់ស្វីសស្តីពីគោលនយោបាយរូបិយវត្ថុរបស់ខ្លួន។ លុយផោនក៏មិនទាន់មានសញ្ញាណវិជ្ជមានខ្លាំងនោះដែរ ហើយកំពុងត្រូវបានជួញដូរក្នុងតម្លៃ ១,៣២១១ ដុល្លារ ក្រោយធ្លាក់ថ្លៃកាលពីយប់មិញ នៅពេលដែលអ្នកជួញដូរសម្រុកជួញដូរយកចំណេញមុនកិច្ចប្រជុំមកដល់៕

ប្រភព៖ cnbc