ទីផ្សារមាសនៅតែងើបទៅមុខមិនរួច ថ្ងៃនេះ

ការជួញដូរមាសនៅ ថ្ងៃនេះ ត្រូវបានគេមើលឃើញថា ហាក់មិនមានការប្រែប្រួលច្រើននោះឡើយបន្ទាប់ពីបានធ្លាក់ថ្លៃខ្លាំងជាបន្តបន្ទាប់នៅសប្តាហ៍នេះមកកាន់តម្លៃទាបបំផុតមួយមិនធ្លាប់មាននៅក្នុងរយៈពេល៦សប្តាហ៍កន្លងទៅ។

ទីផ្សារជួញដូរមាសតាមស្បត (Spot Gold) ត្រូវបានជួញដូរក្នុងតម្លៃ ១ ២៨៦,៨៦ ដុល្លារក្នុងមួយអោនដែលជាតម្លៃប្រហាក់ប្រហែលទៅនឹងតម្លៃជួញដូរកាលពីថ្ងៃម្សិលមិញ។ តម្លៃជួញដូរនៅសប្តាហ៍នេះ គឺជាតម្លៃជួញដូរធ្លាក់ថ្លៃខ្ពស់បំផុតប្រចាំខែ ពោលគឺចំនួនប្រមាណ ២,៧% ហើយជាការធ្លាក់ថ្លៃប្រចាំខែដ៏ច្រើនបំផុតនៅក្នុងឆ្នាំ ២០១៧ នេះ។ ចំណែកទីផ្សារមាសរបស់អាមេរិកវិញ ឡើងថ្លៃបន្តិចបន្តួចប៉ុណ្ណោះក្នុងចំនួន ០,១% ត្រូវបានជួញដូរក្នុងតម្លៃ ១ ២៨៩,៨០ ដុល្លារក្នុងមួយអោន។

សេដ្ឋកិច្ចអាមេរិកមានកំណើនលឿនជាងការរំពឹងទុកក្នុងពីត្រីមាសទី ២ កន្លងទៅ ដែលជាកំណត់ត្រាកើនឡើងដ៏ឆាប់រហ័សមិនធ្លាប់មានជាងរយៈពេល២ឆ្នាំមកនេះ។ ប៉ុន្តែសន្ទុះនេះទំនងជាធ្លាក់ចុះនៅក្នុងត្រីមាសទី ៣ឆ្នាំ ២០១៧នេះ ដោយសារតែផលប៉ះពាល់ពីព្យុះសង្ឃរា Harvey និង Irma ដែលបោកបក់ចូលប្រទេសនេះកាលពីពេលថ្មីៗកន្លងទៅ ។

កាលពីថ្ងៃព្រហស្បតិ៍ម្សិលមិញ មន្ត្រីសេតវិមានបានព្យាយាមការពារផែនការពន្ធដារថ្មីរបស់ខ្លួនប្រឆាំងទៅនឹងការរិះគន់ថា វានឹងជួយអ្នកមានជាជាងជួយអ្នកវណ្ណៈកណ្តាល ខណៈដែលគណបក្សសាធារណរដ្ឋនៅក្នុងសភាជាតិបានរៀបចំបោះជំហានទៅមុខដើម្បីតាក់តែងច្បាប់ពិតប្រាកដមួយលើកម្មវិធីកំណែទម្រង់សេដ្ឋកិច្ចជាតិនេះ។

នៅជប៉ុនឯណោះវិញ ទិន្នន័យរបស់រដ្ឋាភិបាលបានបង្ហាញនៅថ្ងៃសុក្រនេះថា តម្លៃទំនិញប្រើប្រាស់របស់ខ្លួនបានកើនឡើង ០,៧% កាលពីខែសីហាកន្លងទៅធៀបទៅនឹងរយៈពេលដូចគ្នាកាលពីឆ្នាំមុន។ សន្ទស្សន៍ថ្លៃទំនិញប្រើប្រាស់របស់វិស័យសំខាន់គាំទ្រដល់សេដ្ឋកិច្ចជាតិដូចជាផលិតកម្មប្រេងក៏មានការកើនឡើងផងដែរ លើកលែងតែវិស័យម្ហូបអាហារប៉ុណ្ណោះ។

ទិន្នន័យបឋមរបស់រដ្ឋាភិបាលជប៉ុនក៏បានបង្ហាញផងដែរថា ផលិតកម្មនៅក្នុងវិស័យឧស្សាហកម្មរបស់ជប៉ុនបានកើនឡើង ២,១% នៅក្នុងខែសីហាកន្លងទៅធៀបទៅនឹងខែកក្កដា៕

ប្រភព៖