ប្រាក់ដុល្លារមិនប្រែប្រួលខ្លាំងនោះឡើយថ្ងៃនេះ

ការជួញដូរប្រាក់ដុល្លារនៅព្រឹកថ្ងៃអង្គារនេះកំពុងស្ថិតនៅក្នុងសញ្ញាណមិនប្រែប្រួលច្រើននោះឡើយបន្ទាប់ពីអ្នកជួញដូរបានផ្តោតលើព្រឹត្តិការណ៍នយោបាយនៅតំបន់ឧបទ្វីបកូរ៉េក្រោយកូរ៉េខាងជើងសាកល្បងធ្វើតេស្ដអាវុធនុយក្លេអ៊ែរជាថ្មីកាលពីថ្ងៃអាទិត្យកន្លងទៅ ហើយងាកមកមើលព្រឹត្តិការណ៍គោលនយោបាយហិរញ្ញវត្ថុ និងសារពើពន្ធរបស់អាមេរិក។

ប្រាក់ដុល្លារមិនមានការប្រែប្រួលខ្លាំងនោះទេ ដោយត្រូវបានជួញដូរក្នុងតម្លៃ ១០៩,៧៨០ យ៉េនក្នុងមួយដុល្លារ។ កាលពីថ្ងៃម្សិលមិញវាបានធ្លាក់ថ្លៃដល់តម្លៃ ១០៩,២២០ យ៉េនក្នុងមួយដុល្លារនៅពេលដែលអ្នកជួញដូរផ្តោតលើបញ្ហាឧបទ្វីបកូរ៉េ។ ចំណែកប្រាក់អឺរ៉ូវិញ ក៏មានស្ថានភាពមិនខុសគ្នាពីប្រាក់ដុល្លារនោះទេ ហើយវាកំពុងត្រូវបានជួញដូរក្នុងតម្លៃ ១,១៨៩៥ ដុល្លារ ដោយបានទាញមកវិញពីតម្លៃ ជួញដូរឡើងថ្លៃខ្ពស់បំផុត ១,១៩២២ ដុល្លារកាលពីថ្ងៃម្សិលមិញ។

ការធ្វើតេស្តសាកល្បងអាវុធនុយក្លេអ៊ែររបស់កូរ៉េខាងជើងកាលពីថ្ងៃអាទិត្យបានធ្វើឲ្យប្រាក់ដុល្លារមានសម្ពាធខ្លាំង ដែលជាការផ្តល់ឱកាសឲ្យប្រាក់យ៉េន និង មាសឡើងថ្លៃទន្ទឹមគ្នា។ ក៏ប៉ុន្តែអ្នកវិភាគនិយាយថា ប្រាក់ដុល្លារនឹងប្រសើរឡើងវិញដោយសារតែកត្តាផ្សេងទៀតដែលនឹងកើតមាននៅក្នុងខែនេះដែលក្នុងនោះរួមមានដូចជាកិច្ចប្រជុំរបស់ធនាគារកណ្តាលអាមេរិក និង កិច្ចប្រជុំសភាអាមេរិកលើបញ្ហាដំឡើងប្រាក់កម្ចីសម្រាប់ផែនការអភិវឌ្ឍជាតិរបស់លោក Trump។

សន្ទស្សន៍ជួញដូរប្រាក់ដុល្លារធៀបទៅនឹងរូបិយប័ណ្ណនានាវិញ កំពុងស្ថិតនៅក្នុងទីតាំងតម្លៃជួញដូរជាវិជ្ជមាន ពោលគឺ ៩២,៦៣០ បន្ទាប់ពីបានធ្លាក់ថ្លៃអស់ ០,២% កាលពីថ្ងៃម្សិលមិញ។ រីឯលុយហ្រ្វង់ស្វីស បានធ្លាក់ថ្លៃមកវិញ ហើយស្ថិតនៅក្នុងតម្លៃជួញដូរ ០,៩៥៨៥ ហ្រ្វង់ស្វីសក្នុងមួយដុល្លារ បន្ទាប់ពីបានឡើងថ្លៃ ០,៧% កាលពីថ្ងៃម្សិលមិញដែរ។

ចំពោះប្រាក់ដុល្លារអូស្ត្រាលីវិញបានឡើងថ្លៃវិញ ០,១% ត្រូវបានជួញដូរក្នុងតម្លៃ ០,៧៩៤៨ ដុល្លារ បន្ទាប់ពីបានធ្លាក់ថ្លៃកាលពីយប់មិញ៕

ប្រភព៖ cnbc