ដុល្លារបន្តស្ទុះឡើងថ្លៃទៀតថ្ងៃនេះ

ការជួញដូរប្រាក់ដុល្លារត្រូវបានគេមើលឃើញថា បានបន្តស្ទុះឡើងថ្លៃទៀតនៅថ្ងៃនេះបើធៀបទៅនឹងលុយយ៉េនរបស់ជប៉ុន ខណៈដែលលុយផោនបានធ្លាក់ថ្លៃបន្តិចវិញពីតម្លៃឡើងថ្លៃខ្ពស់បំផុតមិនធ្លាប់មាននៅក្នុងឆ្នាំនេះ ក្រោយវាបានឡើងថ្លៃ ភ្លាមៗនៅពេលមានរបាយការណ៍ដ៏ល្អមួយលើកំណើនអតិផរណារបស់ខ្លួន។

នៅព្រឹកនេះ ប្រាក់ដុល្លារត្រូវបានជួញដូរក្នុងតម្លៃ ១១០,២៧០ យ៉េន ពោលគឺបានឡើងថ្លៃ ០,២% ដែលជាតម្លៃឡើងថ្លៃ ខ្ពស់បំផុតមួយមិនធ្លាប់មានជិត២សប្តាហ៍កន្លងទៅនេះ។ កាលពីថ្ងៃសុក្រចុងសប្តាហ៍មុន វាបានធ្លាក់ថ្លៃដល់តម្លៃ ១០៧,៣២០ យ៉េនក្នុងមួយដុល្លារ ដែលជាតម្លៃទាបបំផុតមិនធ្លាប់មាននៅក្នុងរយៈពេល១០ខែមកនេះ នៅពេលដែលព្យុះ Irma បានបោកបក់វាយប្រហារលើរដ្ឋ Florida របស់ខ្លួន និងជុំវិញភាពសង្ស័យថា កូរ៉េខាងជើងអាចសាកល្បងបាញ់មីស៊ីលជាថ្មី។

រីឯការជួញដូរប្រាក់អឺរ៉ូវិញ ហាក់នៅមានសញ្ញាណវិជ្ជមាននៅឡើយ ដោយត្រូវបានជួញដូរក្នុងតម្លៃ ១,១៩៦៧ ដុល្លារបន្ទាប់ពីបានបិទបញ្ចប់តម្លៃជួញដូរឡើងថ្លៃ ០,១% កាលពីយប់មិញ។ ខណៈដែលអត្រាការប្រាក់លើមូលបត្របំណុលរបស់អាមេរិកបានកើនឡើង ៥ ចំណុចកាលពីយប់មិញ អត្រាការប្រាក់លើមូលបត្របំណុលរបស់អាល្លឺម៉ង់ឯណោះវិញ បានកើនឡើងដល់ ៧ ចំណុចដែលជាមូលហេតុធ្វើឲ្យប្រាក់ដុល្លារត្រូវបានជួញដូរក្នុងស្ថានភាពទប់ទល់ជាមួយនឹងប្រាក់អឺរ៉ូ។

ក្រឡេកទៅមើលលុយផោនរបស់អង់គ្លេសវិញ មានការប្រែប្រួលតិចតួចតែប៉ុណ្ណោះ ត្រូវបានជួញដូរក្នុងតម្លៃ ១,៣២៨៦ ដុល្លារ បន្ទាប់ពីបានហក់ឡើងថ្លៃដល់តម្លៃ ១,៣៣០០ ដុល្លារកាលពីយប់មិញ។ តម្លៃឡើងថ្លៃយប់មិញនេះ គឺជាការឡើងថ្លៃខ្ពស់បំផុតមិនធ្លាប់មាននៅក្នុងឆ្នាំ នេះ។

ទិន្នន័យនៅយប់មិញបានបង្ហាញថា កំណើនអតិផរណារបស់អង់គ្លេសបានកើនឡើងក្នុងអត្រា ២,៩% សម្រាប់ខែសីហាកន្លងទៅ ដែលកំណើននេះខ្ពស់ជាងការព្យាករណ៍ និងស្ថិតនៅអត្រាមួយខ្ពស់ជាងគោលដៅ ២% របស់ធនាគារកណ្តាលរបស់ខ្លួន។

ការកើនឡើងនៃអតិផរណាត្រូវបានគេមើលឃើញថា មានភាពស្មុគស្មាញដល់ការងាររបស់អ្នកបង្កើតគោលនយោបាយរបស់ធនាគារកណ្តាលអង់គ្លេសក្នុងការពន្យល់ពីមូលហេតុដែលខ្លួនមិនដំឡើងអត្រាការប្រាក់។ ស្ថាប័ននេះនឹង បើកកិច្ចប្រជុំមួយស្តីពីគោលនយោបាយរូបិយវត្ថុរបស់ខ្លួននៅថ្ងៃព្រហស្បតិ៍ស្អែក៕

ប្រភព៖ cnbc